Abakúku3
Lafurieidun Abakúku
1Aba lafurieidun profeta Abakúku.2Le naganbubei bibügürü, Bungiu, luma luagu sun le adüga báalibei, buíngüda lumutina lau óunwenbu inebesei bun. Adügabéi luéinamun burí katei le meha badügübei lidan amu dan lidan wabagari guentó, subudi wamaamugei giñe. Arufudabéi bugudemehabu woun íbini labadinagua bigañi.3Anite Bungiu lóubawagugiñe Temán; luéigiñe wübü Parán liabin Bungiu le sándubei. Anihein luéirigun lidan sun sielu, buinti sun ubóu lau uremu lun.4Anite hóuburagu larugounga miriti lau, áfurihati labirihaniga lúhaburugugiñe le ñein lubéi laramudagua ubafu le lídanbei.5Ñǘdünti igei hanufunati lubá lubá, sandi gáfarahati lárigi lárigi.6Adadagarati múa dan le lararamagun Bungiu, adadagaratiña gürigia dan le lariaguniña; héiguati burí binadu áraabu, gumugua ligía burí binadu wübü, gama lumoun lémeri Bungiu, magumuchaditi.7Ariha naaña lílana Kusán lidan lamiselu, lílana Madián muñugu lau anufudei.8Wabureme, gáñihadibu san luma duna éibaaguati? Gáñihadibu san luma barana? Ligía san bawarirunbei hawagun bigabayun, diná buguya tidoun bikarün?9Aranse baali tebu bigimaran ani setibóun sun bigimaran. Abouha baali múa lau duna éibaaguati.10Adadagarati áraabu dan larihinibu; ábürühati huya gárati siélugiñe, ahuuhati barana, iñuraha ligía luéinamun lugudi.11Máfuridunti weyu luma hati lídangiñe haramudaguagüle ladüga támirihan bigimaran luma laduranhan barufunte.12Éibuga bumuti sun ubóu lidan basafaragun, dügügua bumutiña néchanigu lidan bigañi.13Furihadibu íderaguaña bumutuniña luma íderaguei urúei le banúadirubei. Günringua baaru luban le salufuribei, lúmagiñe tugudina chülǘ tábulugun.14Áfara bumuti hábuti súdara tau ligimaran guánarügü, dan le hawanserun lánigu kei aban lanarime lere dan lun hábürühan wawagun, ñǘbuintiña lau pantaü abusenra hagünrinchaguniwa, kei dan le lafarún aban gudemeti.15Agalufehatibu baranaha hau bigabayun, hakutagüda bumuti barana dan le básügürün.16Dan naganbuni sun le aba nanufudedagun. Aba ladadagarun niyumaaru, siñá lágüdahanina núruna, aba leferidiruni sun núgubu lere. Lau sun lira, nagurabahaba darangilu darime lachülürün weyu lun ladiheridagüdüniña Wabureme hasudaranigu ha íchugubaña lidere dan woun.17Ábameti nabuinchun lau ugundani ladüga Nabureme le nesefuragüle. Nalawahabei íbini megelewehan tan tídibu igu, magindun tuguya beibei luma tídibu oliwu; íbini malubahóun lan ichari; íbini hagumuchun mudún hama bágasu.19Ladüga ruti Wabureme erei nun, óufugüda lumuti núruna kei aban usari, ani barǘ lumutina lidoun fulasu le ñein lubéi séfuñunuba lan.Bible Society of Honduras