Rudu4
Lamarieidun Boosu tuma Rudu
1Dan lárigiñe, aba lidin Boosu añuura luagu lubenari aüdü, fulasu le ñein lubeiha hóundaragua gürigia. Lidan oura ligía, ligía lásügürün iduhei le buga uágubei ladimureha Boosu tun Rudu. Aba lagúarun Boosu lun, lariñaga lun:—Higabu ñahoun, ñuruba ya.
Aba liabin, aba lañuurun.2Lárigiñe, aba lagúarun Boosu houn diisi wéiyaaña mutu lílana fulasu, aba giñe lamuriahan hama lun hañuurun luma. Lárigiñe hañuurun.3Aba lariñagun Boosu lun liduhe:
—Busentu Noemí to agiribuduboun Moábügiñe taluguruni fulasu le meha lani waduhe Elimélekü.4Busentina basubudiruni katei le, anhein busén bubéi bagañeihani, lun badügüni guentó, hagibugiñe gefentiña luma hagibugiñe wéiyaaña mutu ha lílana fulasu. Kei buguya lubéi iduhei yarafaguatimagilibei luma Elimélekü, garichatibu lun bagañeihani lufulasun. Gama lumoun anhein magañeihan ban, subudigüdabei nun, ladüga bárigiñe, au garichabei lun nagañeihani.
Aba lariñagun iduhei:
—Nagañeihabei.5Ábati lariñagun Boosu lun:
—Subudibéitia luagu anhein lan bagañeiha tufulasun Noemí, gasu lan giñe bamarieidun tuma Rudu, lun lasigirun fulasu lidan liri hilaali.6Dan laganbunbalin iduhei katei le, aba lóunabun:
—Anhein ítara liña lubéi, siñabei nagañeihani, ladüga ítara, gayaraabei nañawarihani nalagante. Gama lumoun anhein busén bubéi bagañeihani, gayaraati bagañeihani, ru numuti irichaü bun.7Lidoun meha dan ligía, ítara liña meha hagaburi Ísüraelina: Dan le líchuguni aban gürigia liricha le lánina iduheguaü lun amu, o dan lan le ladügün aban daradu luáguti agañeihani o alugurahani, le ederegehabei o alugurahabei, aba laragachunu aban ligeidin, aba líchugunu lun le aban. Lauti échuni le,8aba laragachunu liduhe Boosu ligeidin, aba líchugunu lun Boosu; lariñaga lun:
—Bagañeiha.9Ábati lariñagun Boosu houn wéiyaaña mutu luma houn sun ha ñéinbaña:
—Sun huguya gefentün uguñe luagu nagañeihani lufulasun Elimélekü, Kilión luma Malón túmagiñe Noemí.10Gefentün giñe luagu nanügaaru lan Rudu to Moábüna númarime lun lerederun fulasu laumeme liri finóu Malón le meha túmari. Ítara luba magumuchagun lan liri Malón hádangiñe lánigu, mabulieidúniwa ligíame lidan fulasu le.11Aba hóunabun wéiyaaña mutu hama sun ha ñéinbaña, hariñaga:
—Anha, gefentiwa luagu. Adügalá Wabureme lun würi lan to lunboun tebelurun búbiñoun, lun ítara tan kei Rakeli tuma Lía, ha ídangiñebaña wayabin sun wagía Ísüraelina! Buguyati, lun aban ban wügüri wéiriguti Éfürata, aban wügüri inebewati Belén.12Rula Wabureme saragu isaanigu bun tau würi to. Gibe hamá biduheñu kei meha liduheñu Fáresi le tiráü Tamarü lau Hudá.13Ítara liñati lamarieidunbei Boosu tuma Rudu. Ábati tadageinadun, aba tagaraüdün aban wügüri irahü.14Ábati hariñagun würiña tun Noemí:
—Uéiriguni lun Wabureme luagu líchugun aban ibari bun lun lóunigirunibu! Wéirigu láamuga bibari uburugu Ísüraeli!15Líchuguba gurasu bun, ágüdaha lábume lidan bueiyan, ladüga tiráü lan bídiñu to wéiribei tínsiñehabu bun, to giñe gebegiboun bun sügǘ hau sedü isaanigu.16Aba tanügüni Noemí irahü ligía, aba tuguya lan etenira lun.17Dan harihini tubesinanigu, aba hariñagun:
—Garaüha Noemí aban irahü!
Aba híchugun liri, Owedi. Ligía lúguchibei Hesé, láruguti Dawidi.
Lagüchagu Dawidi
18Añahán ladügawagunbaña Fáresi: Fáresi lúguchibei Esürón,19Esürón lúguchi Ran, Ran lúguchi Aminadábü,20Aminadábü lúguchi Naasón, Naasón lúguchi Salümón,21Salümón lúguchi Boosu, Boosu lúguchi Owedi,22Owedi lúguchi Hesé, Hesé lúguchi Dawidi.Bible Society of Honduras