Rudu3
Lareini Boosu
1Luagu aban weyu, aba tariñagun Noemí tun Rudu:—Niráü, lúntitia náluahan aban búmari, le lunti lagundaaragüdünibu.2Waduhe Boosu, le hayubudiri musu hiñaruñu háñaha úmabaña buadigimarida, lídiba licharirugu guñoun le ewenihei ilaü lídangiñe aruraü.3Anihán lubeiti katei le lunbei badügüni: Ágawaba, hurugua buguyame ibiñein, ábame badaürünu tubuiduntima badaüragun, ábame bidin ñein. Gama lumoun houchabá lun masubudirun lánibu Boosu lubaragiñe lásurun leigin luma latun.4Bariheime buidu halía lan larumuga, ábame bidin, ábame badaarun lau lugudi, ábame barounrun ñein lugudigiñe. Ligía guánarüba ariñaga bun kaba lan badüga.5Tariñaga Rudu tun Noemí:
—Nadügübei sun le bariñagubei nun.6Aba tidin Rudu áraabun, aba tadügüni sun le tariñagubei tágürü tun.7Aba leigin Boosu, gurá ligía, aba lagundaarun! Lárigiñe, aba larounrun arumuga lubadu saragu ilaü le ñeinbei. Aba tiabin Rudu hámareina, aba tadaaragun lau lugudi aba tarounrun ñein.8Lamidangua áriebu, aba lagagudun Boosu sódini; danti le lagarabaagun, aba taweiridun lanigi luagu anuhán lan aban würi roun lubadu lugudi.9Aba lariñagun tun:
—Kátabu san?
—Rudu nuguya. Niduhe le yarafatimabei nun buguya; lunti bíderagunina. Busentina lun bamarieidun numa.10Lariñaga Boosu tun:
—Binilabu Wabungiute! Arufudatima baali luagu gúnfuli ban lun finóu búmari. Gayaraati hamuga bálugun aban le nibureingili nuéi, gudemeti o rísiti gama lumoun madügün bumuti.11Manufudedabá, niráü, ladüga sun gürigia ya, subudi hamaali luagu aban ban würi to rutu buíduti hénpulu. Ligía nadügübei lubéi le bamuriahabei numa.12Lau sun lira, lau sun inarüni lan luagu yarafaguagili lan niduhegua buma, anihein aban biduhe yarafaguatimagili buma sügǘ nau.13Rédeiba ya áriebu le. Haruga, anhein busén lagunfulirun lau le yuubei lun keisi iduhei ladügeime; gama lumoun anhein madügün lan, ru numuti nererun ligibugiñe Wabureme luagu nadügübei lan. Guentó, barumuga darí larugadun.14Aba tarumugun Rudu áriebu ligía lugudigiñe Boosu. Larugan, aba tásaarun lubaragiñe larugadun, dan le búrigagili, ladüga buga ariñagaali lan Boosu: «Moun lumuti lasubudiruni ni aban luagu ñübuin tan würi to áraabu».15Ábati lariñagun Boosu tun:
—Ragaboun bidáü, ábame bátulerunu buidu.
Sun anuhán lan lidan tátulerunu Rudu tidáü, aba labuinchagüdünu Boosu lau sebada. Lárigiñe, aba líderagunu iñuroun tégewagun, aba tidin uburugun.16Dan tachülürünbei Rudu le ñeinhin tubéi tágürü, aba tálügüdünu, tariñaga tun:
—Ida liñagie lidin bun, niráü?
Aba tabahüdaguni Rudu sun le ladügübei Boosu tun,17ariñagatu giñe tun:
—Ru lumutu giñe sun sebada to nun, aba lariñagun nun: “Moun lumuti bagiribudun tumoun bágürü málouga búhabu”.18Aba tariñagun Noemí:
—Guenleti niráü, agurababá, kaba lan asusereda. Memeraagunbei eyeri le uguñe darí laranseruni katei le.
Bible Society of Honduras