1 Samueli1
Líchugun Wabungiute aban irahü tun Ana
1Lidan aban fulasu gíriti Ramá, luagu burí luwübüri Éfürain, ñeinñein meha aban wügüri hádangiñeti liduheñu Sufu, gíriti Elikaná. Liráü Heroamü, libari Eliú. Tou, ligía lárugutibei lúguchi, hádangiñeti lani Éfürain türibu.2Biámañanu meha lúmarigu Elikaná, Ana tuma Peniná. Gíbetiña meha tirahüñü Peniná, ánhounti Ana, marahüñütu.3Sagü irumu láfuridun Elikaná lageiragiñe, lun lidin Siló adüga kultu luma adagaragüda lun Wabureme Sunti gabafu. Lidan fulasu ligía ñéinñanu biama lirahüñü fádiri Elí, gíritiña Ofuní luma Fineesi, lufadirinigu giñe Wabureme hagía.4Danha le líchuguni Elikaná ladagaragüdün, ábaha líchuguni tufanran Peniná tun luma houn sun tirahüñü,5gama lumoun tun Ana ru lumuti tufanran le buídutimabei, ladüga lueirin tínsiñe lun, lau sun buga míchugili lan Wabureme irahüñü tun.6Ligíati tañawarihanbeiha Peniná to tubuyamun tun, tadügaha bula tau, ladüga adügaali lan Wabureme lun maraüboun lan.7Ságüha irumu, dan le tidin ténpulurugu tañawarihan Peniná tun luagu maráü tan; ábatiha tayahun Ana, ani méigintuha.8Ábatiha lariñagun Elikaná le túmari tun:—Ana, ka uéigiñe bayahua? Ka uéigiñe bíruda ani meigin buguya? Ma funagia buítimatina bun sügǘ hau diisi isaanigu.9Luagu aban dan lidan fulasu le gíribei Siló, aba tásaarun Ana lárigiñe teigin. Ñeinñein fádiri Elí ñun luagu aban sesi tubenari litenpulun Wabureme.10Aba tafurieidun Ana ténpulurugu tídangiñe sun tanigi ayahuaheina lau igarigu lun Wabureme.11Ábati füramase tan Ana lun Wabureme tariñaga lun:
—Bungiu Sunti gabafu; ánhana agudemeda bun lun bíchugun aba irahü nun, nederegerubei lun leseriwidun bun lidan sun libagari, ani masarúnbei lídiburi, ligíaba seini luagu anuadirúaali lan lun leseriwidun bun.12Keiti tílübei Ana afurieida lun Wabureme, aba letenirun Elí lun tiyuma,13gama lumoun hámaruti tafurieidun, maganbúngubeiti tumalali; ladüga tídangua tafurieida. Tiyumarurügüñein ánhinha. Ábati laritagun Elí luagu bacharuañoun lan,14aba lariñagun:
—Ídaba san bígirei bacharuaü? Hebé batun diwéin!15Tariñaga Ana lun:
—Uá, mabacharuantina, mátuntina diwéin, matun nuguya ni amu uniñein héreti, le suserebei, hírutina, níchuguñein nuáguti ligibugiñe Wabureme.16Maritaguabá luagu aban lan hiñaru wuribatu nuguya, nafurieiduña sun dan le, ladüga hüchütina ani nidiheri nuguya.17Lariñaga Elí tun:
—Beiba darangilañu, rulei Lubungiute Ísüraeli le bamuriahabei luma bun.18Tariñaga lun:
—Seremei numutibu.
Lárigiñe aba tagiribudun le buga ñéingiñe lubéi tiabin, aba tidin eiga, aba mírudundigiaaru lan.19Larugan binaafin saragiatiña, lárigiñe háhuduragun lun Wabureme aba hagiribudun hábiñoun Ramá. Lárigiñe aba lóundarun Elikaná tumoun Ana, aba laritagun Bungiu luagu le buga tamuriahabei luma.20Ábati tadageinadun Ana, dan le lagunfulirunbei dan, aba tagaraüdün aban wügüri irahü, aba tíchugun Samueli luagu, ladüga tamuriahan lan luma Bungiu.21Lárigiñe aba lidin Elikaná Siló hau sun liduheñu, lun hagunfuliruni hani füramasei, luma lun hadagaragüdün le lánina sagü irumu;22ánhounti Ana, mídintu, tariñaga lun túmari:
—Mídinbadina darime chulaali irahü. Ábameti nanügüni lun nederegeruni lun Wabureme, ábame lerederun ñein lun sun dan.23Lariñaga Elikaná tun:
—Adügabéi le babusenrun. Rédeiba darí lachularun irahü, lun lagunfuliruni Wabureme le füramase laalibei.
Ábati terederun, aba tetenirun lun tiráü darí lachularun.24Dan tachularagüdünbalin, ábangili irahü ñǘgili, aba tanügüni túmagua tidoun lani Wabureme ténpulu Siló. Barütu giñe aban bágasu le ǘrüwati irumu lau, wein bián líburu türigu luma aban budéin diwéin.25Ábati háfaruni bágasu lun hadagaragüdüni, aba harufuduni irahü lun Elí.26Tariñaga Ana lun:
—Feruduna humana, gama lumoun inarüni le lunbei nariñaguni hun, nuguya meha hiñaru to afurieiduboun lun Wabureme ya, yarafa hun.27Namuriahaña meha luma Wabungiute lun líchuguni irahü le nun, ani ru laali nun.28Nuguya luéigiñe nóubadina, anúadira naali lun Bungiu, ani anuadirúañu luba lun Wabureme lidan sun libagari.
Ábati láhuduragun Elí ligibugiñe Wabureme, dagá lerebe múarugu.
Bible Society of Honduras