Rudu2
Rudu licharirugu Boosu
1Ñeinñein aban tiduhe Noemí luéigiñe Elimélekü, le túmari, gíriti Boosu; rísiti meha wügüri ligía.2Luagu aban weyu, aba tariñagun Rudu tun Noemí:—Ruba üma nun lun nidin áraabu ariha anhein ánhara somu alubahati nidin lárigi lárigi abudaheina türigu.
Tariñaga tágürü tun:
—Beiba niráü.3Ábati tidin Rudu áraabu, aba tagumeserun abudaha uburébu le gálati türigu, le hígirahan alubahatiña. Gabunuruntuti, lugundun ichari ligía, lichari Boosu, le liduhe Elimélekü.4Ligíati lachülürün Boosu Belengiñe, aba labusurun houn alubahatiña. Lariñaga houn:
—Humalá Wabureme!
—Binilabu Wabureme! —liña hóunabuni.5Ábati lálügüdüni Boosu hábuti alubahatiña, lariñaga lun:
—Ka tiduheñubaña irahü to?6Lariñaga hábuti alubahatiña lun:
—Moábüna, Moábügiñe tiabin tuma Noemí.7Amuriahatu üma numa lun tidin hárigi hárigi alubahatiña abudaheina uburébu le gálati türigu, nadagimeinhaaruti sun binaafin, darí guentó tiabin emeraagua murusun.8Ábati lariñagun Boosu tun Rudu:
—Niráü, midinbátia abudaha türigu lidan amu ichari. Rédeiba ya hama numusuniña würiña,9ábame bafalaruniña le ñein lumuti barihaña alubahatiña awadigimarida. Rúhadina dimurei houn numusuniña wügüriña lun mañawarihan lan ni aban bun. Danme bamagürabudun, bídinme le ñein lubéi lagei duna, bátame lídangiñe le hadaburun.10Aba táhuduragun Rudu dagá terebe múarugu arufudei tinebenehabu, aba tálügüdüni Boosu:
—Ka uagu betenira nun ítara, ani hínsiñehabu buguya nun lau sun terencha nan?11Lariñaga Boosu tun:
—Subudi numuti sun le badügübei tuagu bágürü lúmagiñe lounwen búmari, subudi numuti giñe luagu ígira bániña bagübürigu luma bageira lun biabin aganawa wama, wagía gürigia ha buga ibidiñetiña bun.12Fáyeilei Wabungiute bun! Rula Wabureme, le Lubungiute Ísüraeli, le úmabei báluaha ídemuei bafayeiruaha luagu sun le badügübei!13Tariñaga lun:
—Wéiriti lubuidun bigaburi numa, ani buíngüda lumutina bererun lau gurasu. Adimurehaadibu nun lau ínsiñehabuni, lábugiñe sun maweiriguntina lan íbini kei aban hádangiñe bumusuniña hiñaruñu.14Óurabei lun éigini, aba lagúarun Boosu tun Rudu, lariñaga tun:
—Higabu, ragüba fein, anihán gürebí lauti binigá beiga wama.
Aba tañuurun Rudu hama alubahatiña, aba líchugun Boosu ilaü le ásarahouaali tun. Aba teigin darí takimuledun, ígiragua tuéi.15Danya le tidin abudaha, aba lariñagun Boosu houn lumusuniña:
—Ígira humóun giñe lun tuguya lan furumiñetu abudaha uburébu le ginti taganagua sebada. Mamahara humá lun tadügüni.16Ígira humá giñe lun léiguahan uburébu ginti lídangiñe hufuñein lun tabudahani. Meberesehalá ni aban tun!17Aba tabudahan Rudu uburébu ginti licharirugu Boosu darí laguñeedun. Dan le léferehounbei uburébu le tabudahabei, ruti sügǘ lau bián-wein-gádürü líburu sebada.18Ábati tagiribudun uburugun barüina saragu ilaü, aba tidin arufudei tun tágürü. Lárigiñe, aba tasagaruni éigini le buga ígiragubei tuma, aba tíchuguni tun Noemí.19Halía bawadigimarida uguñe? —liña tálügüdünu Noemí:
—Halía babudaha saragu uburébu ginti? Biniwalá le íderagubalibu ítara!
Aba tabahüdaguni Rudu tun tágürü ka lan uma tuadigimarida.
—Boosu líribei gürigia le úmabei nawadigimarida —tugia tun.20Tóunabounti Noemí:
—Binilei Wabureme! Luagu ladügün areini woun guenlé, kei meha ladügüni houn ha hilaguaañabaña. Waduhe gürigia ligía, ligía lubeiti aban hádangiñe ha lúnbaña híderaguniwa.21Tariñagaya Rudu:
—Ariñagati giñe nun lun nasigirun awadigimarida hama lumusuniña hiñaruñu darí lagumuchun alubahani.22Ábati tóunabunu Noemí tídiñu:
—Niráü, buiti lun berederun hama lumusuniña hiñaruñu, lun midin ban lidoun amu ichari luéi hañawarihan bun.23Aba lubeiti tasigirun Rudu abudaha uburébu le ginti hama lumusuniña Boosu ha hiñaruñu darí lagumuchun lalubahóun sebada tuma türigu. Sunti dan le, tuma tágürü taganawa.
Bible Society of Honduras