Sálumu73
Lareini Bungiu
1Buiti Bungiu hama Ísüraelina ha lánigu, hama ha harumabaña anigi.2Ánheinti au murusunrügaali yebe lun néiguadun; ítagaraü yebe liriraagun nugudi.3Ladüga aba nagimugadun lau narihin hawanserun ha salufuribaña hama ha barüguabaña houngua.4Hagía madiheriduntiña luagu óunweni, ladüga buinñu haña lau lubuidun átuadi;5masufurirungiña kei híbiri gürigia, madiheri hagía kei ha híbiri.6Ligía hanügünbalin pantaü kei hañari, luma anarimeni kei hadaüragun;7hanarimeti hadibunen darí lun kamá lan lachubara lila hagu, ani gíbeeliti luriban haritagun.8Asiadihatiña hadügün wuribani luma anarimeni, lau bula, anaaguni unguaü luma mabusigari;9adimurehatiña wuriba luagu Bungiu le siélubei, rútiña lúrudu houn sun gürigia lau pantaü ligibuagu ubóu le.10Ligía hadimurehanbei gürigia buidu hawagu madarirun hagía hadurun.11Hariñaga: «Lasubudirubei funagia Bungiu? Gefenbei funagia le Íñugubei?»12Ariha humaña wuribatiña ha! Gánwoungüda hamuti harisin lau darangilaü.13Málati haruma tan nanigi, ani haruma ligía núhabu lídangiñe sun wuribani!14Ladüga sun oura nibihiña buleseiti, ani beiwa au sagü binaafin.15Lun hamuga meha nasaminarun kei hagía, garabaguatina hamugaha hawagun birahüñü.16Hóuchatina yebe gunfuranda nani katei le, gama lumoun hénrenguti nun.17Láuhali nebelurun lúbiñoun Bungiu, ligíaali gunfurandanani haliñounba lan houdin adagara:18rúbaña lidan fulasu guyeti lun bádaruniña lidoun günringuaü.19Günrinwaguatiña lidan murusun oura! Áfaragua lumutiña óunweni gumuguagüdalaña!20Ítara kei dan le labulieiduni gürigia luénedü lidan lagagudun binaafin, ítara liña babulieidagun hawéi, Nabureme.21Buin niña buga lau íruni sandí au igarigu tidan nanigi,22ladüga buga numaganbadin úati yebe gunfuranda nan; ítara niña buga bigibugiñe kei aban animaalugu!23Lau sun lira, búmañadina súnwandan. Ragǘ baali núhabu le nóunwenren,24alidiha báadina lau barufudahan nun, lídanme lagumuhóun, beresibirubadina lau burí ubuiduni.25Kagia nánibei sielu? Buguyarügüñein! Dan le búmañadina lan, úati ni kata nabusenrun ubouagu.26Lagumuchaguba sun núgubu gama lumoun Bungiu, ligía nalagantebei le magumuchaditi ligía ágüdahabarun nanigi.27Ha adisedutiña buéi, hóunweguba; bagünrinchagubei le magunfulirunti buma.28Ánheinti au, nayarafahóuba lun Bungiu, ladüga anihán lubuidun-ágeibei katei nun. Buguya, Nabureme, buguya naramudaguagülebei, nadimurehaba luagu sun katei le badügübei.Bible Society of Honduras