Sálumu72
Afurieiduni luagu aban urúei
1Bungiu, rubei biricha luma búaragun lun urúei,2lun gayara lan lalidihaniña bumutuniña, hama gudemetiña lau irichaü.3Lun íbini lan áraabu luma wübü lun líchugun darangilaü houn bumutuniña.4Rulei urúei haricha gudemetiña houn! Sefuláña hasaanigu ha mégeihabubaña, günringua láñame ha asufuriragüdübaliña gürigia!5Hanufudelá urúei buéi lun súnwandan, sun anihagua lan weyu luma hati!6Ítarala kei huya luma serenu le áturagubalin múa luma sagadi!7Ñeinlá saragu darangilaü luma úaraguni lidan lidaani larúeihan, darí lachülürün dan lun lúadun hati!8Lagumadiha lúmagiñe aban barana lumoun le aban, lúmagiñe duna le wéiribei darí lumoun lagumuhóun larigeirugu ubóu!9Deregegua hamá láganiñu ha lílana fulasu mageirawati houngua lun!10Fayei hamá urúeigu ha Esüpáñabaña, hama ha luágubaña ubouhu liseinsuna gumadi lun, barǘ hagíame lurúeitegu Arawia luma Etiopía edewehani lun.11Hudugua hamá sun urúeigu ligibugiñe! Seriwi haméi sun néchanigu!12Lesefurubaña gudemetiña ha ayumuragubaña, hama giñe ha míderawagunbaña.13Gudemehabubei houn ha gudemebaña, lesefurubei habagari gudemetiña.14Lesefurubaña hawéi ha óuseragubaliña, ladüga barǘ lumuti habagari kei katei gebegiti.15Gabagarilá urúei! Rualá golu le Arawiabei lun! Amuriahoualá luma Bungiu luagu súnwandan! Alawahoualá súnwandan!16Ñeinlá saragu türigu fulasurugu, gibelá türigu lábulugu burí wübü! Ñeinlá saragu alubahani kei Líwanu, ñeinlá giñe lugule türigu kei híduru áraabu!17Mabulieidawalá liri urúei lun súnwandan; ani adimurehoualá luagu sun anihagua lan weyu! Ibiha hamá sun gürigia ubouagu abiniruni lídangiñe! Ariñaga hamá sun gürigia lun, fuleseiwati!18Alawahoualá Bungiu, Aburemei, le Habungiute Ísüraelina, le ligíarügübei adüga burí katei wéinamuti;19biniwalá luéirigun liri súnwandan. Buinla sun ubóu lau luéirigun! Ítarala!20Ya lagumucha burí lafurieidun Dawidi le liráü Hesé.Bible Society of Honduras