Sálumu71
Lafurieidun aban weiriei mutu
1Nabureme, bóubawagu náluaha ounigirúni; mígirabana wuriba!2Sefubána, salba bana buguya le richabei! Ruba arigei lun baganbunina, sefubána.3Buguyalá dübü wéiriti le ágüdahabalina, ítaraba nun kei aban dübü le aramudaguagülei! Buguya ageindagubei náugiñe ani góunigibana!4Nubungiute, sefubána lúhaburugugiñe le wuribabei; lúhaburugugiñe le gáfarahadibei luma le hanarimebei;5ladüga buguya, Nabureme nemeniginbei luma le uágubei nachourura lúmagiñe nibureingidina.6Lúmagiñe meha turageirugugidina núguchu nabalachun buagun; adügatibu lun nágurahouniwa! Neremuhaba bun súnwandan!7Ñǘbuinhadina lun lébunabadina lan taweiridun anigi houn saragu, gama lumoun buguya naramudaguagülebei.8Sun weyu buin liña niyuma lau uremu lun buéirigun;9mágurabana danme le wéiyaadina; mígirun báname danme le méreedina!10Busentiña náganiñu háfarunina, ayanuhatiña wuriba nuagu eledegua hagía nubá.11Hariñaga: «Éibaaha huméi, ragǘ huméi, ladüga meberesenhali Bungiu lau, úati kaba lan esefurei!»12Madisedabá nuéi Nubungiute; higabu bíderaguana furese!13Rúbaña náganiñu lidoun busiganu! Rúbaña ha abusenrubaña lamiselu nun lidoun busiganu!14Ánheinti au, nagurabahaba súnwandan, ani neremuhatimaba bun.15Sun weyu nadimurehaba luagu sefu báadiwa lan adüga buguya irichaü woun. Úati gunfurandanani buéirigun!16Nabureme, nabahüdaguba luagu burí katei wéinamuti le adüga báalibei, nadimurehaba luagu buguyarügüñein lan richagua!17Nubungiute, arufudahaadibu nun lúmagiñe nibureingidina, ani anahagua adimureha luagu burí katei wéiriguti le badügübei.18Nubungiute, mígirabana, íbini danme le wéiyaadina, garuba nuguya. Ladüga mosu nadimurehan houn lirahüñüna dan le, hama ha lúnbaña hayabin hárigiñe luagu lueirin bubafu.19Wéiriti biricha, Bungiu; adügaadibu óunwenbu burí katei; úati ni aban kei buguya!20Lau sun arihagüdaadibu lan saragu mabunuruni luma idiheri nun, bíchigayaba ibagari nun; biñuraguagüdübadina lídangiñe lilulin múa,21baganwoundagüdübei nuéirigun ámalihaya báname.22Au luagu nóubadina, neremuhaba uremu bun, ru aume eteingiruni bun tau sun tuwuyeri árüpa Nubungiute lisandun Ísüraeli.23Lagundaaruba niyuma lau leremuhan bun, lagundaaruba giñe sun núgubu, le besefurubei.24Tariñaguba giñe niñeñe súnwandan luagu richá ban, ladüga ha yebe áluahabaña wuribani nun, rédeihaña lau busiganu.Bible Society of Honduras