Sálumu51
Bungiu Baba, gudemená bun
1Gudemená bun Bungiu Baba luagu bínsiñehabu; luagu lueirin bubuidun, ferudunabéi nidurun.2Chibabana lídangiñe wuribani le gádanbalina! Harumagüdabana lídangiñe nifigoun!3Subudi numuti luagu mabuchaha nan; magidati nifigoun lídangiñe nisaminan.4Afigouhaadina bigibugiñe lau nadügüni katei le aubei magundan ban. Ligía richá lubéi bisiadin; richagua ligía baguseragüdün.5Lidan linarün katei, wuribatina lúmagiñe nágurahouniwa; gafigountina lúmagiñe turageirugugiñe núguchu.6Lidan linarün katei, hínsiñetu anigi harumatu bun, ani rúhadibu lichú aau nun nídangua.7Gidabei nifigoun nuéi ábayame narumadun, chibabana, ábame lagidarun dáseiti nuéi.8Buíngüdabana lau ugundani; gundaaguagüdayabana lau sun dürügua baali lan buga nugundan.9Dísegüdabei sun nifigoun luéi barihin, gidabei sun nuriban.10Adügabá aban anigi to harumatu nidan, Nubungiute! Ru buguyame aban iseri sífiri le gúnfuliti nidoun!11Magidarabana biñuarürugugiñe, magidarunbeime bani sífiri le sándubei nuéi.12Sandigüdayabei ugundani le lánina besefuhan nun; ágüdahabana lau lareini bani sífiri,13gayara láamuga narufuduni bémeri houn ha mabuchahabaña, áluaha hamaamugabu gafigountiña.14Sefubána luéi áfarahani, Nubungiute, buguya Bungiu le esefurubalina, ábame nariñagun lau uremu luagu richá ban.15Nabureme, darabei niyuma, ábame náwahan uremu bun.16Ladüga mama lau burí idewesei bagundaara; íbini hamuga nadagaragüdün bun, mama ligía babusenrubei.17Aban sífiri le gagariguti lárigi figóu, ligía edewehani aubei lagundaara Bungiu, Nubungiute, mamahantibu tun aban anigi gagarigutu!18Adügabá buiti lun Sión lau bareini; ráramagüdayabei lubarieirun Herusalén.19Ábameti bánharun lun beresibiruni burí adagaragüdüni le yuubei lun ladügǘn, idewesei le gudawarügüti le gumuti, ábameti hadagarawagüdüniwa bágasu ligibuagu bani latarü.Bible Society of Honduras