Sálumu50
Aban aguseragüdüti le richati Bungiu
1Adimurehaali Aburemei le Habungiute búngiugu; wáhali houn lílana ubóu luéigiñe oubaü le ñéingiñe lubéi laboucha weyu lumoun le ñeinhin lubéi lálüda.2Harugoungadagüdati Bungiu lúmagiñe Sióngiñe, uburugu le buídutimabei ani wende ligía.3Anite Wabungiute, gama lumoun miábinbei maniñu: Liábinba aban watu gemeti le gagünrinchaguaditi lubá lubá; aban guran le héreti lau huya geyegu lau.4Agúahati Bungiu íñugiñe lun sielu luma múa lun harihini haguseragüdüniwa lumutuniña.5Lariñaga: «Óundaragua humaña ha gúnfulibaña numa, ha adügaañabaña aban daradu numa lau hadagaragüdün nun».6Arufuda lumuti sielu luagu aguseragüdüti lan le richati Bungiu.7«Aganba humana Ísüraelina, numutuniña, nafuranguagüdaali burí katei hun. Au Búngiubei, au Hubungiutebei!8Madeinhanbadina hun luéigiñe adagaragüdüni, ni luagu burí idewesei le hanügübei nun súnwandan.9Mamuriahantina bágasu huma hádangiñe hibiñanigu, ni gábara hádangiñe hilügüniña,10ladüga nani sun animaalugu ha áraabuna hama burí animaalu ha luágubaña wübü,11nilügüniña dunuru ha dabíararugubaña, luma sun le ánhingichubei áraabu.12Ánhana hamuga alamacha mariñagun nubéi yebe hun, ladüga nani ubóu lau sun katei le lídanbei.13Hágürügü funagia bágasu néigibei, odi guratina hata gábara?14Eteingirunilá hidewese lun Bungiu; gúnfuli huméi le füramase hubéi lun le Íñugutimabei!15Wa humá nun dan le nidiheri humá; nesefurubadün, ábame híchugun uéiriguni nun».16Anhein houn gürigia ha salufuribaña, lariñahare Bungiu: «Ka hirichabei lun hariñaguni nilurudun odi lun hayanuhan libügürü nidaradun,17anhein magundan hubéi lau neweridirunün luéi katei le wuribabei, meberesen huguya lau nererun?18Resibi humutiña híwerutiña lau harüna tuleñu; óundaraguatün hama gürigia maríeitiña ha gagabarahatiña.19Huálitu hiñeñe luma hiyuma lun wuribani luma marasualugu.20Adimurehatün wuriba luagu híbiri; anabagua humuti híbiri guánarügü!21Adüga humaali sun le, maniñu au, haritaguatün yebe luagu aban lan nigaburi huma. Gama lumoun níchigaali hidurun higibugiñe, hafayeiha nun luagu hadüga!22Gunfuranda huméi katei le buidu huguya le abulieidagubei luéi Bungiu, gumeseniñein agünrinchaguaün ani úabei esefurutün23Ha íchugutiña eteingiruni nun, inebetina houn, Sefu numutiña ha ederaguagüdütiña lidan némeri!»Bible Society of Honduras