Sálumu49
Mámarügüñein seinsu sun katei lidan ibagari
1Aganba huméi katei le buidu, huguya lílana sun ubóu;2dandu rísitiña kei gudemetiña, dandu ha gabafubaña kei ha ǘnabugubaña.3Nadimurehaba lau lichú aau, ariñaga aume saminaü huliliti;4níchuguba arigei lun ariñawagúni, nariñagubei lanichigu katei le aramudaguabei, nariñagubei lau tamuri árüpa.5Kaba san uagu nanufudeda danme liabin lidere dan; danme nadariragun nungua geyegu lau hariban náganiñu?6Hagía afiñetiña luagu burí harisin, aba hanaagun houngua luagu liibe hámati;7gama lumoun úati ni aban gayaraati lesefuragun lungua ni lun lafayeiruni Bungiu lun lesefuruni libagari.8Úati seinsu gayaraati lagañeihani libagari gürigia,9lun labagaridun súnwandan, lun lesefurun luéi óunweni!10Arihúati luagu hilá lan chu tau hilá ibidiougua tau, aba lerederun harisin houn amu.11Lau sun ru hamani burí hiri luagu hamúan, umúahaü ligíaba haban lun súnwandan; ñeinba heredera gumugua dan.12Hilati gürigia ka lan yebe lirisinbei, hilati kéigubeirügü lounwen animaalu.13Ítara liña hagumuchagun ha afiñebaña hawougua; ítara liña hagumuchagun ha adimurehabaña buiti hawougua.14Siádiwaaña lun hóunwegun kei mudún, ani óunweniba amainiruti le lunbei lalidihaniña. Hagañeirubaña ha buídubaña ha wuribabaña binaafin; agumucheina luba here, umúahaü tuguyaba haban.15Gama lumoun lesefurubadina Bungiu lídangiñe lubafu óunweni, lanügübadina lúmagua.16Meberesenbá anhein arisida amu gürigia, anhein íchiga lanwoun tuenden luban,17ladüga danme lounwen, manügünbei ni kata lúmagua, mídinbei giñe luéndegun lárigi lidoun lumuaha.18Íbini buidu lan ladariragun lungua lidan libagari, hínsiñe ligía houn gürigia ladüga lirisin,19lachülürüba weyu lun lounwen, marihindigia láalime larugounga.20Hilatiña gürigia ka lan yebe harisinbei; ítara kéigubeirügü lounwen animaalu.Bible Society of Honduras