Sálumu106
Hamabuchahan Ísüraelina
1Alawahoualá Aburemei!Ru humá eteingiruni lun Aburemei, ladüga buiti Bungiu, ladüga magumuchaditi línsiñehabu.2Ka gayaraabei labahüdaguni sun lagañeirun Aburemei? Ka gayaraabei lalawahani keisi aubei ladüna?3Fuleseiwatiña ha éibugubaña lidan irichaü adüga haméi le richaguabei súnwandan.4Baritaguame nuagun, Nabureme, danme le badügün buiti houn bumutuniña; mabulieidunbáname danme le biabin esefuha,5ariha náamugei hagundan ha banúadirubaña, lun nagundaarun apantaha aume úara hama gürigia ha bánigu.6Afigouhaadiwa kéisigubeirügü wagübürigu; adüga wamaali le wuribabei.7Rútiña meha wagübürigu mebereseni luagu burí luéinamun katei le badügübei yágüta Ehiptu, bulíei hamuti lueirin bínsiñehabu, iñuraguatiña houngua buagun laru Barana Funati.8Lau sun lira sefu lumutiña Bungiu luagu liri, luma lun larufuduni lubafu.9Ébecha lumuti Barana Funati darí lamabeidagüdüni; sügügüda lumutiña lamidanguagiñe barana mábeiñu kei aban fulasu mageirawati.10Ítara liña lesefuruniña hawéi háganiñu, lídangiñe habafu ha iyereehabúbaña houn.11Daruguati duna hau háganiñu, mesefuti ni aban hádangiñe.12Ábati hafiñerun luagu le lariñagubei Bungiu, aba heremuhan lun.13Gama lumoun málüti lúmagiñe, ábaya habulieidagun luéi le buga ladügübei Bungiu, magurabuntiña hasubudiruni laransehan;14aba hóuchaguni Bungiu lidan fulasu mageirawati, éreda luagu lun líchuguni le habusenrubei houn.15Aba líchuguni Bungiu le hamuriahabei houn, gama lumoun óunahati aban sandi gáfarahati hawagun.16Gimugatiñaha lun Moisesi, kianpu-ágeirugu luma lun Aarón, le deregeguabei lungua lun Aburemei.17Ábati ladaaragun múa, aba láhuluchuni Datán hau sun lánigu Abirámü;18aba ladurangun watu hawagun sun hagía! Aba láguduniña watu gemeti sun ha adaagubaña wuribati!19Adügatiña aban bágasu lidan wübü le Orebü, aban guáriua lauti golu rǘrüguati, aba háhuduragun lun:20Sansi hamuti Bungiu le inarüniti tuagu liyawa aban bágasu le éigiti híduru!21Bulíei hamuti Bungiu, le hesefuragüle, le buga adügübei katei wéinamuti Ehiptu;22le buga adügübei lubuidun burí katei lidan lageira Kamü, luma burí katei le aweiridagüdüti anigi lidan Barana Funati.23Álugati yebe Bungiu lagünrinchaguniña, gama lumoun aba ladimurehan Moisesi luagu hafulesein, aba ladilirun ligañi Bungiu, aba magünrinchagun lániña.24Lárigiñe, aba hanügün aban fulasu buídumeraüti kei ni kata, mafiñeruntiña luagu lani Bungiu füramasei;25adimurehatiña wuriba luagu Aburemei tidan hakianpun, ani mídintiña lau lugumadin.26Ábati liñuruni lúhabu aba láfiñurun houn luagu ladügüba lan lun hóunwegun lidan fulasu mageirawati,27luagu ladügüba lan lun hóunwegun hadügawagun chagagua láñame haganagua néchanigu ha gibe tubungiutegu.28Rúguatiña houngua lidamunme Baali-peoru, hou hagía lídangiñe adagarawagüdüti houn búngiugu ha mabagaritiña.29Gáñigüda hamuti Bungiu lau wuribati le hadügübei, aba lubéi ladagarun aban igei haganagua.30Gama lumoun aba lásaarun Finesi, aba láfaruni le gadurunbei, aba hagidarun igei.31Aba líchuguni Bungiu katei le ladügübei Finesi ligibugiñe lun súnwandan hámagiñe agübürigu hamoun isaanigu.32Gáñigüda hamuti giñe Bungiu laru duna Meribá, ábati lidin wuriba lun Moisesi ladüga sun lira,33gífigüda hamuti luguraasun, aba ladimurehan masaminarunga ka lan lariñagubei.34Magünrinchagun hamuti fulasu burí le uágubei lariñaga Aburemei houn lun hagünrinchaguni.35Lubaragiñe lira, ábarüga hádaragun houngua hadoun ha gíbebaña ubungiute aba hafurendeiruni hagaburi:36Aba háhuduragun houn haguariuan gibe tubungiutegu, ha lébunabaña hagadeirun,37barǘ humutiña harahüñü kei adagaragüdüni hagibugiñoun máfianu hagía.38Wiyugüdatiña hata maduruntiña, hata hasaanigu ha hanügübaña keisi adagaragüdüni houn lubungiutegu Kanán. Aba ladaseirun múa lau hata,39hagía aba hadaseirun wiye hagía lau sun wuribati le hadügübei.40Aba lagañidun Aburemei hama lánigu, aba heyereegudún ha buga lánigubaña lun,41aba lígiruniña háhaburugu gibe tubungiutegu, aba herederun lábugiñe hagumadihan háganiñu;42aba haburechaguniña háganiñu, aba híchuguniña ǘnabu lábugiñe habafu.43Saraguñein wéiyaasu lesefuruniña Bungiu, gama lumoun ábayaha hiñuragun houngua lun aba habuluchun lidan hariban guánarügü.44Gama lumoun, lídanbei larihiniña lau idiheri, luma dan le laganbuni hayahun,45aba laritagun luagu lidaradun hama, aba lasansiruni laritagun, ladüga wéiriti línsiñehabu:46Adügati lun mariban lan hóuseruniña ha erederubaña kei haburiña!47Sefubáwa, Aburemei, Wabungiute! Óundaraguagüdabawa haganaguagiñe néchanigu, eremuha wamaamuga lun biri le sándubei! Eremuha wamaamuga bun lau ugundani!48Alawahoualá Aburemei, Lubungiute Ísüraeli, lun súnwandan! Ariñaga hamá súngubei: «Ítarala!»
Alawaha waméi Aburemei!
Bible Society of Honduras