Sálumu105
Le ladügübei Bungiu luagu Ísüraeli
1Ru humá eteingiruni lun Aburemei! Hadimureha luagu liri! Abahüdagua humá houn burí lílana fulasu luagu katei burí le ladügübei.2Heremuha uremu luagu luéirigun. Hadimureha luagu burí katei wéinamuti le ladügübei!3Hapantaha lau liri le sándubei. Gúndaata hanigi ha áluahabalin Aburemei!4Ñübuin humá lun Aburemei, áluaha huméi lubafu; áluaha huméi súnwandan.5Haritagua huméi luéinamun luma lubuidun burí katei le ladügübei, luma burí dimurei le ariñaga láalibei;6huguya le ladügawagun Abüraámü; huguya le lirahüñü Hakobu, ha lanúadirubaña.7Ligía Aburemeibei, Wabungiute; ligía agumadihabei lidan sun fulasu!8Ni anhein ásügüra milu inebanfangu, mabulieidagunbei luéi lidaradun,9daradu le ladügübei luma Abüraámü, fiñún le ladügübei lun Isaakü,10ani gufirümalei keisi lúrudu lun Hakobu, keisi daradu magumuchaditi lun Ísüraeli,11dan le lariñagunbei: «Níchugubei lumúan Kanán bun keisi alagan».12Lau sun meha mibe hamá, fiuraü meha terencha fulasurugu,13éibugatiña lídangiñe aban néchani lun lidoun aban lídangiñe aban arúeihani lun lidoun aban,14mígirunti Bungiu lun hóuserawagun; ariñagagubeiti houn urúeigu.15«Maguura humatia hawagu nanúadirun, móuseragun humañame nani profetagu».16Ñǘbuingüdati ilamaü lidoun fulasu ligía, gidá lumuti sun éigini hawéi.17Gama lumoun aba lóunahani Hosé habá habá, le meha halugurubei lun idamunime.18Güragua hamuti lugudi lau güringüri, murú hamuti lau gürabu!19Hóuchagua lumuti lererun Aburemei Hosé, darí lagunfulirun le buga uágubei lariñaga Hosé lasusereduba lan.20Urúei, le buga agumadirubei saragu gürigia, aba lariñagun lun lígirawagüdüniwa;21aba líchuguni keisi aburemei tidan luban lau sun le lúmabei,22lun larufudahan chúgüda ligíame hau ábutigu habu wéiyaaña mutu.23Lárigiñe aba liabin Ísüraeli, le Hakobu, aba laganóun keisi terencha Ehiptu lumúanrugu Kamü.24Aba lagibedaguagüdüniña Bungiu lánigu ani héretima hagía hawéi Ehiptuna.25Gama lumoun adügati lun hiñuragun Ehiptuna houngua hawagun lánigu, luma lun heyeeduniña eseriwidutiña lun Bungiu.26Ábati lóunahani Bungiu Moisesi luma Aarón, le buga lanúadirubei,27aba hadaagun liseinin Bungiu lidan fulasu mageirawati: Katei wéinamuti luma buíduburiti lidan lumúan Kamü!28Óunahati Bungiu aban luburiga le adouragubei lau sun katei, gama lumoun madügüntiña Ehiptuna gasu lau lererun.29Saliguagüda lumuti hadunari hítaüme, aba láfaraguniña úduraü;30Buíngüda lumuti fulasu hau húa chülǘ tidoun lubarari urúei.31Aba ladimurehan Bungiu, aba hayabingua saragu mabarawa hama íñenaü lidan sun hageira Ehiptuna.32Óunahati lúbara huya dereguati leweñegua huya luma ligemeri watu luagun fulasu.33Günringua lumuti burí tídibu beibei luma tídibu igu; günringua lumuti burí tídibu wewe Ehiptu!34Aba ladimurehan Bungiu, aba hayabin chigangaru: Gíbetiña, darí lun siñá lan habahüdǘniwa!35Aba héigini híduru le áraabubei luma sun nadü le áhüchübei yebe ligibuagu múa!36Áfara lumutiña ígiramaü tidan sun muna Ehiptuna!37Lárigiñe aba láfuridagüdüniña Bungiu lánigu buin lau golu luma pülata Ehiptugiñe, ani úati ni aban hádangiñe hani türibu achugeraguti.38Aba hagundaaragun Ehiptuna dan le harihini houdin, ladüga hanufude hawéi.39Óunahati Bungiu aban dúeri lun ladouragun hau wéyuagu, luma aban ligemeri watu lun larugoungadagüdün hau áriebu.40Amuriahatiña éigini luma, aba lóunahan dunuru houn, aba lakimuledagüdüniña tau fein siélugiñetu.41Bougua lumuti dübü aba láfuridun duna lídangiñe, aba léibaagun duna ligía lidan fulasu mageirawati kamá aban óunwenbu duna.42Ladüga haritaguati luagun füramasei sánduti le líchugubei lun Abüraámü.43Ítara liña lubeiti láfuridagüdüniña Bungiu lánigu ha lanúadirubaña agúaraheina lau ugundani,44aba líchuguni hageira amu néchani houn luma halubahan amu gürigia lídangiñe hawadigimari.45Gama lumoun lun buga linebeduba lan houn, teni hagíame lun lilurudun luma larufudahan Aburemei.Alawahoualá Aburemei!
Bible Society of Honduras