Sálumu107
Magumuchadi lan línsiñehabu Aburemei
1Ru humá seremei lun Aburemei ladüga buiti, ani magumuchaditi línsiñehabu.2Ariñaga haméi ha sefu láañabaña Aburemei, ha lasalbarubaña luéi lubafu ágani,3ha lóundarubaña lídangiñe burí ageiraü terencha, nóruterugugiñe, súrurugugiñe luéigiñe labouchagüle weyu luma lálüdagüle.4Féridiñuhaña meha lidan fulasu mageirawati le gasagounteti, madariga haméi üma lidoun aban uburugu lun haganóun ñein;5lamatiña mágürabu hagía, hóunwegua yebe6gama lumoun aba hayumuragun lun Aburemei, aba lesefuruniña lídangiñe idiheri.7Lárigiñe aba líchuguniña luagun üma suruti lidoun aban uburugu lun haganóun ñein.8Ru humá eteingiruni lun Aburemei luagu línsiñehabu, luagu le ladügübei luagu hafulesein gürigia!9Áfara lumuti hamagürabu mágürabutiña ru ligía saragu éigini houn ha lamabaña.10Lidan meha lueirin luburiga haganóua, dáüwañu lau íruni luma güringüri.11Ladüga hiñuragun houngua luagun lugumadin Aburemei, ladüga híchugun mebereseni lau laransehan Bungiu.12Aba líchuguniña Bungiu lábugiñe lidere wadagimanu; dan le hachugeragun, úati íderagutiña.13Gama lumoun aba hayumuragun lun Aburemei, aba lesefuruniña lídangiñe idiheri;14aba lasagaruniña lídangiñe lueirin luburiga, aba lesefuruniña luéi güringüri.15Ru humá eteingiruni lun Aburemei luagu línsiñehabu; luagu le ladügübei luagu hafulesein gürigia!16Bougua lumuti burí bena le lauti buronse! Günringua lumuti burí lidaünda bena lauti gürabu!17Sánditiña ani nidiheri hagía, ladüga hariban guánarügü luma hafigoun,18siñá heigin ni aban luwuyeri éigini; hilamémeeña yebe!19Gama lumoun aba hayumuragun lun Aburemei lau áhüchürüni, aba lesefuruniña lídangiñe hadiheri;20óunaha lumuti lererun, aba lareidaguagüdüniña. Sefu lumutiña luéi umúahaü!21Ru humá eteingiruni lun Aburemei luagu línsiñehabu, luagu le ladügübei luagu hafulesein gürigia!22Ru humá adagaragüdüni lánina eteingiruni lun, hadimureha lau ugundani luagu burí katei le ladügübei.23Fayatiña alugurahatiña baranahoun, ñǘdüntiña dúnarugun tidan burí hagune,24ñein lidan lilulin barana ariha hamuti katei buíduburiti le ladügübei Aburemei.25Lau lumalali Aburemei, aba liabin aban luriban dan, aba laweinamudun lugudi barana;26iñura lumutiña chülǘ sielun, rarigüda lumutiña chülǘ lábugiñoun barana; wéiriti hanufude luéi denchaü!27Atuituihatiña kei bacharuatiña; meseriwínti hasubudin houn!28Gama lumoun aba hayumuragun lun Aburemei, aba lasagaruniña lídangiñe idiheri;29aba lásügürün luriban dan, aba lagalumadun lugudi barana.30Dan harihinbei lagalumadun lugudi barana, aba hagundaarun aba lanügüniña Bungiu lidoun fulasu le buga ñéinhinbaña lubéi.31Ru humá eteingiruni lun Aburemei, luagu línsiñehabu, luagu le ladügübei luagu hafulesein gürigia!32Wa humá luagu dan le hóundaragun! Heremuha lun lidan hóundarun wéiyaaña mutu!33Adüga lumuti Aburemei duna luma lísensen duna fulasume mábeiti;34Adüga lumuti múa le gáluleti lun málule lan ladüga hariban lílana fulasu;35adüga lumuti fulasu mageirawati lagunume, adügaléi múa mábeiti dúname;36ru lumutiña ha lamabaña ñein, aba hábunaguni haburugute ñein.37Bunaguatiña hachari, bunagua beibei, alubaha hagía le gíbeti.38Biní lumutiña, gíbeguagüdalaña, wéinamugüdalaña halügüniña bágasu.39Gama lumoun ánhaña óunwegua, lau hamibedun ladüga asufuriruni, ladüga lamiselu luma igarigu,40aba heyereegudún ha asufuriragüdübaliña lun Bungiu, aba layuridaguagüdüniña lidan fulasu mageirawati.41Sagá lumutiña gudemetiña lídangiñe íruni; gíbegüda lumutiña tílana haban kei mudún!42Dan harihini gürigia richaguatiña lira, aba hagundaarun, ánhaña wuribatiña, aba hámanichun.43Ha chúbaña aau, haritagua hamá luagu katei le, ani gunfuranda hameime línsiñehabu Aburemei.Bible Society of Honduras