Ariñawagúni2
Buiti le líchugubei lichú aau
1Niráü, furendeibéi le narufudahabei bun, mabulieidabei nugumadin.2Ruba arigei lun lichú aau, deregebéi bisaminan lun lualin ichügü.3Bamuriaha lichú aau luma lubuidun ichügü lau sun bere.4Rúguaba bungua lun báluahani, kamá hamuga báluahaña pülata o aban lan irisini le aramudaguati.5Ítara luba basubudiruni lanichigu lichugún inebesei lun Bungiu; ítara luba basubudiruni lanichigu lasubudirúniwa Bungiu!6Ladüga Bungiu íchugubalin lichú aau, ani lúmagiñe liabin subudi luma gunfurandaü.7Íderagua lumutiña ani góunigi laña ha abagaridubaña lidan úarani luma lidan arumani le gumuti.8Góunigi lumutiña ha éibugubaña richaguañu, areida laña ha gúnfulibaña luma.9Basubudirubei giñe ísuruni luma irichaü teni buguyame lun sun katei le buídubei,10ladüga lachuuduba bau, ábame giñe bóuchuni libimen lichú aau.11Lóunigirubadibu lichú bau luma gunfurandaü le bídanbei súnwandan,12leweridirubadibu luéi üma wuribati luma hawéi gürigia salufuritiña,13gürigia ha ígirubalin üma buiti lun héibugun lidan émeri búrigati;14gürigia ha asandirubaña ugundani lau hadügüni katei le wuribabei, efeduha haméi luriban hadaagun;15ha ígira hamaalibei üma le surubei lun héibugun lidan émeri le segebei.16Lesefurubadibu lichú aau tuéi würi to gámaritu, tuéi terencha, to achawahaboun lau burí libimen dimurei;17to ígirubalin túmari le úmabei tamarieida, bulieitéi le táfiñurubei ligibugiñe Bungiu.18Ánhabu ñüdün tuma túbiñoun, kéigubeirügü bídiña lan lidoun óunweni.19Ha ebelurutiña tuma túbiñoun, magiribudúnhaña, magiribudúndigiaaña éibugei lémeri ibagari.20Béibuga lubeiti luéigiñe üma le buídubei; falabei hóuserun ha richaguabaña.21Ladüga ha abagaridubaña lidan ísuruni sunsuinagubei, habagariduba súnwandan ubouagu;22ánhaña ha salufuribaña hama ha múaranbaña, hahulúba, bugawa hagíame ubouagugiñe.Bible Society of Honduras