Ariñawagúni1
Lebegi burí ariñawagúni
1Anihán burí ariñawagúni le labürühabei Salomón, lurúeite Ísüraeli, le liráü Dawidi.2Labürühanbalin dimurei burí le lun larufudahan houn lumutuniña lun habagaridun lau lichú aau, richaguaü, ísuruni luma arumani.3Lun líchugun aban igaburi lánina ibagari le richati ani úaraguati houn.4Lariñaga: «Busentina lun lachuuduba lan hau gürigia ha harumabaña anigi, luma lun narufudahan houn nibureintiña ida luba lan hagagibudagun ani aranseha hameime turobuli lidan ibagari le!»5Gürigia chu tau ha aganbuti dimurei le, lachuudatimaba hau, ánhañati nibureintiña gunfurandatimahañame ani gayaraahalime haransehan turobuli le hénrenguti.7Linebenwa Bungiu lagumesehabei lichú aau. Hárügüñanu ibidiouguabaña aau máhabaña lun arufudahani ru hagía mebereseni lun lichú aau.Eweridihani burí houn nibureintiña
8Niráü, aganbabéi lererun búguchi, teni buguyame lun tarufudahan búguchu;9ladüga ítara luba kei aban uéndeni bun, kei aban iñari o kei lan aban ridi.10Ánhaña abusenra gafigountiña heyeedunibu, mígiraba lun hadügüni, niráü!11Ánhaña ariñaga bun: «Higabu wama, le wáhureragun, wesetiruba sádara lubá aban madurunti lun wáfaruni hilagubei danme lásügürün.12Wáhuluchubaña gürigia buítiña wínwanñu, kei láhuluchuniña óunweni ha ábürühatiña lidoun umúahaü.13Wadariruba sun luwuyeri irisini, wabuinchagüdüboun waban lau sun le wíweruhan!14Higabu, houchabéi bubunurun wama; wafanreinhabei sun le lunbei wadariruni».15Méibugaba hama, niráü! Disebá luéi lagübüri hémeri.16Ladüga éibaaguatiña lun hadügüni le wuribabei, óufudahatiña lun háwiyurun hitaü.17Lau sun mala lan tesetirúniwa sádara habá dunuru anhein aríagu haña lubéi tun;18gürigia hagía, sétitiña sádara habaruagua ani ru hamuti habagari lidoun denchaü.19Ítara liña hagumuchagun ha igaaduabaña, áfaragua lumutiña uámaahabu le hawagubei.Lagunbirahan lichú aau
20Agúarahati lichú aau ǘmadarugu, aganbagüda lumuti lumalali párükerugu;21adimurehati lubadu burí bena, lidan burí fulasu le ñein lumuti guririguaü uburugu, lariñagati:22«Nibureintiña, gadaaguaditiña bula, ibidiougua tau, ídaba san hígirei libidiounigan aau, ladarirúniwa ugundani lidan ladaawagun bula, luma mebereseni lau lichú aau?23Ru huméi harigei lun narufudahan, ábame nabuinchagüdünün lau nani sífiri; nasubudiragüdübei nisaminan hun.24Agúahaadina hun, agunbiraha naadün lun hiabin, gama lumoun máhagidün hadügün gasu.25Lubaragiñe lira, rúrügü huguya mebereseni lau neweridihan, máhatün heresibiruni nererehan.26Néherahaba giñe danme liabin lamiselu hun! Nadaaguba bula hau danme buin humá lau anufudei,27danme liabin anufudei hun luma lénrengunga, asufuriruni luma idiheri, kei liabin aban hiriri le agünrinchagubalin sun katei!28Lídanme weyu ligía, hagúahaba nun, gama lumoun móunabun nubadün, háluahabadina ani madari hubadina,29ladüga rutün mebereseni lau subudi, ani máhatün híchugun inebesei lun Bungiu.30Máhatün heresibiruni neweridihan, meberesentün lau nererehan.31Hasufurirubei lafayeiruaha hóuserun! Labuchadagüdüba luriban haritagun huagu!32Ha lóuguabaña isubudin, áfaragua lumutiña lilouguan hasubudin; ha ibidiouguabaña aau, günringua lumutiña mebereseni le hádanbei.33Ánhaña ha íchugutiña harigei lun le nubeibei, habagariduba darangilu, ani manufudeuga luéi denchaü».Bible Society of Honduras