Ariñawagúni3
Ligaburi libihíniwa lichú aau
1Niráü, mabulieidabei le narufudahabei bun haritaguabei nugumadin súnwandan,2ábame líchugun aban ibagari migifeti le buin umuti lau ugundani bun.3Mígirabei ínsiñeni luma inarüni; barübei búmagua súnwandan kei aban iñari. Dabei tidoun banigi,4ábame fuleseihabu lánibu Bungiu, hínsiñe buguyame houn gürigia.5Afiñebá luagu Bungiu tau sun banigi, mamalá luagu lualin bichügü.6Haritaguabá luagu Bungiu lidan sun le badügübei, ábame lanügünibu luéigiñe üma le surubei.7Maritaguabá buougua luagu weiri lan lichú bau; ruba inebesei lun Bungiu direi buguyame luéi wuribani:8Ligía lubuidun-ágeibei árani lun líchugun erei lun búgubu!9Ruba inebesei lun Bungiu lau birisin luma lau furumiñeti balubahan bicharirugugiñe;10ítara luba tabuinchun lagei balubahan lau ilaü, ani gíbeboun diwéin buma darime básiñarunu areida.11Niráü, mamaharabá lun leweridihan Bungiu, magañidun buguyame dan le ladeinhan bun;12ladüga wéridi lumutiña Bungiu gürigia ha hínsiñebaña lun, kei ladüga aban úguchili lun liráü le hínsiñetimabei lun.13Fuleseiwatiña gürigia ha adarirubaña lichú aau, ha ibihubaña lualin ichügü;14ladüga buítimati sun lira sügǘ lau pülata; gebegitimati sügǘ lau golu.15Gebegitimati lichú aau sügǘ lau dübü buíduburiti; buiti sügǘ lau katei le burí hínsiñegutimabei!16Ruti lichú aau ibagari migifeti lau lóunwenren, ru ligía irisini luma inebesei lau lubaünan.17Buiti lasigirúniwa lugudárigi; darangilaü líchugubei leibugúniwa lidan lémeri.18Ibagari lichú aau houn ha gámabalin; fuleseiwatiña ha árügüdübaña luagu!19Lau lichú aau ladügei Bungiu ubóu; lau lisubudin líchigei sielu lidan lubara;20lau lichú aau ladüga lun lafanreinragun barana luma lun lábürühan serenu dúerirugugiñe.21Niráü, ragüba luagu lichú aau luma gunfurandaü súnwandan, mígirun buguyame lun ladisedun buéi;22ítara luba bun kei lísensen ibagari, lewendedagüdübadibu kei aban iñari.23Gayaraabei béibugun ǘmada madiheriga, ani machugeragundügübadibu.24Danme bemeraagun, manufudebadibu, danme barounrun, barumuguba darangilañu.25Manufudebadibu luéi denchaü le sódiniti, ni luéi günringuaü le lunbei liabin hawagun ha salufuribaña,26ladüga líchuguba Bungiu manufudei bun, ani mígirunbei lun bábürühan tidoun ni aban sádara.27Mamaharabá badügün fulesei lun le amuriahati buma dan le gayara lan badügüni.28Ídehani le gayaraabei bíchuguni uguñe, mígirabei lubá haruga.29Meledaguabá wuribati habá ha hemenigibaña buagu.30Máluahaba wuribu ni ka uma anhein ua lubéi ni aban adügüti damichi bun.31Magimugarabaña gürigia ha salufuribaña, máyeihanbeime luriban housan;32ladüga mínsiñetiña ha wuribabaña igaburi lun Bungiu, ánheinti hama ha buídubaña, gamadaguati lungua.33Íñaragua lumutu Bungiu haban gürigia ha salufuribaña, gama lumoun biní lumutu haban ha richaguabaña.34Adaaguati Bungiu bula hau ha gadaaguadibaña bula; gama lumoun óusera lumutiña ha ǘnabugubaña lau areini.35Inebesei hibihubei ha chúbaña aau; ánhaña ibidiougua tau, arufudaguatiña houngua lau minebenwa hamá.Bible Society of Honduras