Neemíasi3
Lafanreinrawaguniwa wadagimanu
1Ábati haranseruniya Eliasíbü fádiri le íñugutimabei hama líbirigu bena le unbei hariñaga habenari Mudún. Aba hanúadiruni lun Bungiu, aba hafidiruni bena. Ábaya giñe hararamagüdüni baríeiru lúmagiñe wáyelesi le gíribei San, lumoun wáyelesi le gíribei Ananéli.2Le lárigiñebei le hararamagüdübei fádirigu, aba hararamagüdüni Herikóna, le erederubei hawéi Herikóna, aba lararamagüdüni Sakuru le liráü Imürí.3Aba hararamagüdüni ladügawagun Sená ebelaagülei le gíribei habenari úduraü. Aba híchuguni lebu bena, lárigiñe aba hafidiruni bena lau lidaünda.4Le aban líbiri baríeiru aba laranseraguni Meremótu le liráü Uríasi, libari Kosu, le asigirubei lárigiñe Meremótu, aba laranseruni Mesulámü le liráü Berekíasi, libari Mesesawéli; le asigirubei aba laranseraguni Sadoku le liráü Baaná.5Le aban murusun, lárigiñe Sadoku aba hiñuraguni Tekoana lau yebe sun maha hamá wügüriña ha wéirigutimabaña Tekóa híderaguniña ha adundehabalin wadagimanu.6Hoyadá le liráü Paséa luma Mesulámü le liráü Besodíasi, hagía aranseragubalin bena le gíribei, lubenari Hesaná. Aba híchuguni lebu bena, lárigiñe aba hafidiruni bena lau lidaünda.7Le aban murusun baríeiru laranserun Melatíasi le Gabaónna luma Hadón le Meronótuna, hama gürigia ha lílana Gabaón luma Misüpá, fulasu burí le lábugiñebei lagumadihan gumadimati le luéigiñebei oubaü le ñéingiñe lubéi laboucha weyu loubafurugu duna Éufüratesi.8Le aban murusun baríeiru, laranserun Usieli le liráü Harühaíasi le nadagimeinbei pülata; le aban murusun laranserun Ananíasi le adaagubei ibiñein; hagía biámagubei araramagüdübalin lubarieirun Herusalén le bürüraübei dagá lumoun baríeiru le dabuberebei.9Le ábanya murusun, laranserun Refaíasi le liráü Uru le gálidibei lidan lamidan munisípiu le lani Herusalén.10Le ábanya murusun, laranserun Hedaíasi, le liráü Arumáfü, so tigibugiñeñein luban; le ábanya murusun, laranserun Atusu, le liráü Asabüníasi.11Le ábanya murusun, laranserun Malükíasi le liráü Arimü luma Asubu le liráü Paatü-moabü, lau sun wáyelesi le gíribei luayelesin Régigi.12Le ábanya murusun, laranserun Salumu le liráü Alohési, le meha gálidi lidan le ábanya lamidan munisípiu lani Herusalén, hau lisaanigu würiña.13Anún hama lílana Sanóa, hagía aransehabalin lubenari Wayati aba hafidiruni bena lau lidaünda, iñuraguatiña giñe gádürü-san-dimí méturu baríeiru darí lumoun lubenari Hime.14Malükíasi, le liráü Rekabü, le gumadimatibei lóubawagu Betü-hakeremü, ligía araramagüdünbalinya lubenari Hime, aba lafidiruni lubenari luma lidaünda.15Salumu, le liráü Kolosé, le gumadimatibei Misüpá, ligía aranserubalin lubenari Lísensen: Aba laranseruni ani ru ligía lábulugu kei tábulugu muna, aba lafidiruni bena lau lidaünda, aranse lumuti giñe baríeiru le geyegubei lau lagei duna le gíribei Siloé lóubagiñeñein fuluri-agei le lani urúei, darí luagun kalera le ararirubei luburuguterugugiñe Dawidi.16Neemíasi le liráü Asübúku, le gumadimatibei lidan lamidan munisípiu Betü-suru, ligía aranserubalin le aban murusun baríeiru dagá ligibugiñe burí lufulasun umúahaü le lani Dawidi, darí lagei lareidaha duna, luma darí tumoun haban súdaragu.17Baríeiru le asigirubei, aba haranserun Lewitagu: Reumu, le liráü Baní; yagürounmémeraü, Asawíasi, le gumadimati lidan lamidan munisípiu lani Keilá, luagu liri lani munisípiu ladügei.18Le ábanya murusun, haranserun gumadimatiña kei ligía: Bawái le liráü Enadádü, gumadimati lidan le aban lamidan munisípiu lani Keilá;19Éserü, le liráü Hosué le gumadimati Misüpá aranseti giñe murusun lídangiñe baríeiru, ligibugiñe amudeiragülei tidoun muna tareidagüle áruma to erederuboun lidan aban kaaná.20Baruku le liráü Sawái, ligía aranserubalin le ábanya murusun lúmagiñe Kaaná dagá lumoun tubenari luban Eliasíbü, fádiri le íñugutimabei,21Meremótu, le liráü Uríasi, libari Kosu, ligía aranserubalin le ábanya murusun, lúmagiñe luéigiñe tubenari luban Eliasíbü, darí lumoun tébeha muna tugía.22Le ábanya murusun, haranserun fádirigu ha aganóubaña lidan fulasu mawübüriti loubafurugu duna Hordán.23Benhamín luma Asubu, hagía aranserubalin baríeiru le tigibugiñebei haban. Aba giñe laranseruni Asaríasi le liráü Maseíasi, libari Ananíasi le tigibugiñebei luban.24Le ábanya murusun, laranserun Binúi, le liráü Enadádü, lúmagiñe tuéigiñe luban Asaríasi, darí luagun kaaná.25Lárigiñe Binúi, Palali le liráü Usaí, ligía aranserubalin baríeiru ligibugiñe kaaná, luma wáyelesi íñuti le tóugiñebei lani urúei palasiu, le lídanbei bürürü le ñein habéi óunigihatiña. Le ábanya murusun, laranserun Pedaíasi le liráü Parosu,26darí ligibugiñe bena le gíribei lubenari Duna luagun oubaü le ñéingiñe lubéi laboucha weyu luma giñe luagun wáyelesi le ñein habéi óunigirutiña ténpulu. Fulasu le luéigiñeñein meha aban louba uburugu le gíribei Ofeli, ha meha aganóubaña Ofeli, hagía eseriwidubaña ténpulurugu.27Tekoana aranserubalin le ábanya murusun, lúmagiñe ligibugiñe wáyelesi le íñutimabei, íbini tóugiñe palasiu darí lumoun lubarieirun Ofeli.28Kada aban fádiri aranserubalin baríeiru tigibugiñe luban, lúmagiñe bena le gíribei habenari Gabayu.29Hárigiñe fádirigu, Sadoku le liráü Imerü, aranserubalin baríeiru tigibugiñe luban; le ábanya murusun, laranserun Semaíasi le liráü Sekaníasi, le meha óunigirubalin bena le gíribei lubenari oubaü le ñéingiñe lubéi laboucha weyu.30Le ábanya murusun, laranserun Selemíasi, luma Anún le hasisin lirahüñü Salafü, le ábanya murusun, ladüga Mesulámü le liráü Berekíasi tigibugiñe luban.31Le ábanya murusun, laranserun Malükíasi le nadagimeinbei pülata darí tuagun haban eseriwidutiña ténpulurugu luma haban alugurahatiña ligibugiñe bena le gíribei lubenari Aríaahani darí lumoun le ñein habéi óunigihatiña lidan kaaná.32Le ábanya murusun, haranserun ha nadagimeintiña pülata hama alugurahatiña, lúmagiñe luéigiñe lubara óunigihati Kaaná darí luagun bena le gíribei habenari Mudún.Bible Society of Honduras