Neemíasi2
Lígiruni Árütaherühesi Neemíasi lun lidin Herusalén
1Gádürü hati lárigiñe, lidan irumu wein lidan larúeihan Árütaherühesi, dan le neseriwidunbalin luerun urúei, híruti larihinina urúei darí lun lálügüdünina:2—Híruti narihinibu. Ka mégeibei bun? Menege hamutibu sánditiña, mosu anihein lan turobuli bun.Lidan oura ligía, aba nasandirun aban óunwenbu anufudei.3Aba nariñagun lun urúei:
—Gabagarilá urúei súnwandan! Ida lubagia mirun nan, uburugugu le ñein lubéi hamúaha nagübürigu anihein agadeira ani gudawa lubenari?4Ábati lálügüdüni urúei:
—Kagia babusenrubei nadügün luagu bufulesein?
Aba nederegeragun nungua lun Bungiu le siélubei,5aba nariñagun lun urúei:
—Anhein gagundan urúei, anhein fuleseihabu nun, amuriahatina luma lun lóunahanina uburugu Herusalén, le ñein lubéi hamúaha nagübürigu lunya naranseruni.6Ñéinñounti lúmari urúei ñun lóubagiñe, ábati lariñagun nun:
—Átiribeigia dan ladurarun buéiyasun? Ídaba bagiribuda?
Aba nariñaguni lun ídaba lan nagiribuda, aba lígiragüdünina lun nidin.7Ariñagatina giñe lun, anhein lan gayara, lun lan líchugun aban gárada nun houn gumadimatiña ha loubafurugubaña duna Éufüratesi ha luéigiñebaña oubaü le ñeinhin lubéi lálüda weyu, lun hígirunina lun násügürün mañawarihanga nun darí nachülürün Hudá.8Tuma ábanya gárada lun Asafü, le óunigirubalin dabíara lun urúei, lun líchugun wewe lubuña fulansu nun lun nadügüni lubenari tibürürün ténpulu ítara kei lun lubarieirun uburugu luma tun muna to ñeinba lubéi naganawa. Aba líchuguni urúei sun le namuriahabei luma nun, lugundun númañein lareini Nubungiute.9Dan nachülürün hamoun gumadimatiña ha luéigiñebaña oubaü le ñeinhin lubéi lálüda weyu libiti duna Éufüratesi, aba nederegerunu ligaradan urúei houn, óunahati giñeti súdaragu numa lun hóunigirunina.10Dan hasubudirunbalin Sanbalátü le Oronna luma Towíasi, le nadagimeinbei luma urúei katei le, wéiriti hamagundan luagu lachülürün aban le lunti líderaguniña Ísüraelina.
Laranserunya lubarieirun Herusalén
11Aba nachülürün uburugun Herusalén. Luagu lǘrüwan weyu nau ñein,12aba násaarun áriebu, hau fiu wügüriña numa, mariñagunga ni ka un libügürü le lasandiragüdübei Bungiu nun lun nadügüni luagu Herusalén. Manügüntina amu gabayu luéidigia le uágubei nawarira.13Áriebumeme ligía aba náfuridun luéigiñe lubenari Wayati, aba nárügüdün lun luagun lísensen Düragón chülǘ lubenari Hime, aba naríaahani lubarieirun Herusalén le gululuaalibei luma lubenari le gudaalibei.14Lárigiñe aba nasigirun luagun lubenari Lísensen, luma lufusun urúei, gama lumoun siñati lásügürün gabayu le gawagubalina ñéingiñe.15Áriebugili aba namudeirun dúnarugun, lárigiñe naríaahani sun baríeiru aba nagiribudun, aba nebelurun luéigiñe lubenari Wayati.16Mefentiña gumadimatiña halía lan nidin, ni le nadaagubei. Mariñagun nágili giñe buga houn huríu, ha fádirigu, ha íñugubaña, ha gumadimatiña hama híbiri gürigia ha lúnbaña gafanran hamá lidan wadagimanu.17Aba lubeiti nariñagun houn:—Subudi humuti buidu luagu lénrengunga, günrinwagua Herusalén, gudawa lubenari. Óundara humá numoun lun wararamagüdüni lubarieirun Herusalén, lun madügünhaña lanme bula wau.18Dan nabahüdagunbalin houn, luagu areini le aubei líderaguana Bungiu, luma luagu dimurei le buga lariñagubei urúei nun, aba hariñagun:
—Gumese waméi wadagimanu!
Lau aban lubuidun sífiri aba híchugun gurasu hóuniwagua.19Gama lumoun dan lasubudirunbalin Sanbalátü, le Oronna, Towíasi le Amonna luma Gésemü le Arawiana, aba hadügün bula wau ñéingiñe hariñaga woun lau mabahüdǘni:
—Ka san haritagubei hadügün? Odi busentün hiñuragun hungua lun urúei?20Ábati nóunabuniña:
—Uá, mama ligía wabusenrubei, líderagubadiwa Bungiu le siélubei lidan le wadaagubei, lánigu wagía, wagumeseraali bunaguaü, ani huguya, mafanran hiña, maricha huguya ya Herusalén.
Bible Society of Honduras