Neemíasi4
Habulan áganiñu
1Dan lasubudirunbalin Sanbalátü luagu waransehañein lan baríeiru, aba lagañidun, aba ladaagun bula hau huríu.2Lariñaga hagibugiñe líbirigu luma hagibugiñe súdaragu Samariana.—Ka san haritagubei huríu lamatiña ha kátañanu lan? Haritaguatiña funagia luagu higirúayaba lan lun hadagaragüdün? O luagu hagumuchubei lan wadagimanu le lidan aban weyu? O hasagaruba lan iseri dübü lídangiñe burí le agudúbei?3Ñeinñein Towíasi le Amonna lóubagiñe, aba giñe lariñagun:
—Ariha humá lun baríeiru le hadügübei íbini aban ounli áraabuna anhein awarira luagun, lágurubei!
Lafurieidun Neemíasi
4Ábati nafurieidun, nariñaga:—Wabungiute: Arihabá hadaagun bula wau. Águyugüdabei hanabaguniwa hawagun, lun hagía lan eredera lábugiñe habafu háganiñu, lun hanügǘn adaürǘwa lidoun fulasu le mama hageira.5Meferudunabéi hariban, haritagua lubéi hafigoun, ladüga hanabuniña ha iñuragubalin baríeiru.
Heledegun áganiñu
6Aba lubeiti wasigirun aransehei baríeiru le, aranserúaali dagá lamidan. Lau ugundani hawadigimarida gürigia.7Gama lumoun dan hasubudirunbalin Sanbalátü, Towíasi, Arawiana, Amonna hama Asüdóduna, luagu lawanseruña lan laransehóun baríeiru, luagu gumeseeña lan adaruhei le aguludawagubei, aba hagañidun saragu,8aba heledegun lun hageindaguniña Herusalénna sun hagía lun hagünrinchaguni Herusalén.9Ábayati wafurieidún lun Wabungiute, aba wíchugun óunigirutiña wéyuagu luma áriebu luéi hayabin áfaraguawa.10Ábati hariñagun Hudaana:«Mérumaali here anaagutiña ladüga liibe hime lun lachagarúniwa, mabafubadiwa lun wararamagüdüni baríeiru le».11Haritagun yebeti wáganiñu, mefenbadiwa lan, marihin wagíame ni kata darime hamuga beluhaña waganaguóun lun háfaraguniwa, lun herederuni wawadigimari.12Gama lumoun aba hayabin huríu ha aganóubaña hadan, aba hawisaruniwa saragu wéiyaasu luagu haransehaña lan gürigia ha lun hageindagun wama,13aba níchugun lúrudu houn nánigu lun haramudagun lanagangiñe baríeiru hau haduheñu, o lidan burí fulasu ǘnabuti luma burí lidan hunrenti le adügǘti gámañu hamounme hefeinte tuma hagimaran.14Keiti narihin luagu hanufude hamá, aba nararamun, aba nariñagun houn ha íñugutimabaña haganagua, houn gumadimatiña luma houn híbiri gürigia:
—Manufudeda humá hawéi. Haritagua humá luagu weiri lan Bungiu, ani hanarime ligía, hageindagua haweigiñe hupaisanun, hawagu hisaanigu, húmarigu tuma huban.15Dan le hasubudirunbalin wáganiñu luagu aranseñu waña lan, ani ariha waméi luagu günringua laali lan Bungiu le haritagubei, aba wagiribudun sun wagía asigirei wawadigimari luagu baríeiru.16Lúmagiñe oura ligía, hamidan nuwügüriñanigu nadagimein, hamidan aranseñu tau eféin, luma saragu tuwuyerigu áruma. Añahati ábutigu íchigei sun hídehan houn Hudaana,17ha aransehabalin baríeiru. Aba hasigirun anaagutiña anaagua ilaü, gama lumoun añaha nadagimein lau aban háhabu, añaha árügüdoun hárumate lau le aban.18Sun ha nadagimeinbaña aransehei baríeiru, ñeinñoun hefeinte hóubawagu, ani nóubagiñeñein le lunbei línwinrunu fidu, luéidügü ñein lan denchaü.19Ladüga ariñagaadina buga houn ha íñugutimabaña luma houn gumadimatiña, luma houn híbiri gürigia:
—Wéiriti wadagimanu le, ani díseguatiwa wawariuagua luagu baríeiru.20Danme lubeiti haganbuni tumalali fidu, ábame hóundaragun wamoun, lageindaguba Wabungiute wámagiñe.21Ítara liña lubeiti, sun awanha lan nadagimein lúmagiñe binaafin darí rábounweyu, añaha hamidan gürigia tau hefeinte háhaburugu.22Aba giñe nariñagun houn gürigia lun hásügürüni áriebu uburugu Herusalén sun hagía hau sun ídehatiña lun hóunigiruniwa áriebu, hawadigimaridame wéyuagu.23Ni au, ni níbirigu, ni wügüriña ha óunigirubaña ha númabaña, maragachagúntiwa lun warumugun lúmañoun giñe kada aban wádangiñe lefeinte lúhaburugu.
Bible Society of Honduras