Neemíasi1
Lafurieidun Neemíasi luagu lufulesein lageira
1Anihán asusereduti luáguti Neemíasi, liráü Akalíasi. Irumu wein lidan larúeihan Árütaherühesi, lidan liduusun hati lememe Kisüléu uburuguñadina Susa, au, Neemíasi,2ligía lachülürün namulen Ananí hama fiu wügüriña ñǘbuintiña Hudaagiñe. Ábati nálügüdüniña luagu uburugu Herusalén luma hawagu huríu ha agiribudubaña hageiroun Babilóniagiñe.3Hariñaga nun:—Ha agiribudubaña Babilóniagiñe, mabuidunti gádantiña guentó ani nibusigarídünati hadariragun houngua: Ánheinti luagu Herusalén, fuiwa lubarieirun, gudawa burí giñe lubenari.4Dan le naganbunbalin uganu le, aba nayahun, rédeitina saragu weyu lau íruni, ayunaratina afurieida au lun Bungiu le siélubei.5Nariñaga lidan nafurieidun:
—Nabureme, Bungiu le siélubei, Bungiu wéiriguti ani hanufunati, buguya le masansiragunbei hama ha úmatiña badaradura, hama ha hínsiñehabubaña bun ani gúnfuli haméi bugumadin.6Ayumuraguatina bun lun baganbuni nafurieidun bun áriebu wéyuagu hawagu Ísüraelina ha bánigu. Subudi numuti luagu afigouhaadiwa lan wagía Ísüraelina bigibugiñe; íbini au hama niduheñu, afigouhaadiwa!7Óuseraadiwa lidan we le wuribatimabei bigibugiñe; magunfulirun wamuti gumadi, lúrudu luma burí sun le bubeibei woun lídangiñe Moisesi le bubuein.8Haritaguabá luagu wéridibalin Moisesi ánhawa lan afigouha, bachagaragubadiwa lan lidan sun ubóu,9gama lumoun ánhawa lan agiribuda bun, gúnfuli wameime bugumadin ani adüga wameime, bagiribudagüdübadiwa lan wárigoun íbini lídangiñe larigei ubóu le dísetimabei, lidoun fulasu sánduti Herusalén le banúadirubei búbanme.10—Bánigu wagía, ani wagía bageirabei ha besefurubaña lau lueirin bubafu luma bere.11Ayumuraguatina lubeiti bun Nabureme lun baganbuni nafurieidun, luma hayumuragun bánigu, ha ayumaharügübaña híchugun uéiriguni bun. Amuriahatina giñe buma lun buidu lan lidin nun, luma lun bagaguduni línsiñehabu urúei luagu nufulesein.
Bible Society of Honduras