Naún3
Ayahuni luagu Níniwe
1Fugiabu buguya uburugu ñein lumuti hagundaara lau háwiyuragüdün hitaü, buin biña lau iyeeni luma anarimeni; ñein lubéi memegeirun lan áfarahani!2Aganba huméi lamuri abeihagülei, luma lumalali ubalabaü! Añatén gabayu tuma karü lánina wuribu éibaagueina!3Hageindaguña agalufehatiña tau eféin luma arufun miriti! Saragu haña óunwegutiña bürübünu úgubu hilaali! Chugeguatiña burí súdaragu hawagu!4Sun le, ladügatimárügü tahoruhan horu magadiñetu to, méistara lidan abiñarahani, to eyeedaguboun gürigia luma burí néchani lau tahoruhan luma tabiñarahan.5Lariñahare Wabureme Suntigabafu: «Anahán bibügürü: Nárouchaguaaru bidunigun chülǘ bigibuagun ariha hamaamugabu néchanigu surusu, ariha láamugei burí arúeihani bibusigari.6Níchuguba iwiyei buagun nabuinchagüdübadibu lau busiganu, nadügüba lun baríawagun.7Sunme ha arihitibu, héibaaguba buéi ariñageina: “Günrinwagua Níniwe!” Kaba san gudemehabu lun? Halíaba san ladarira íchiguti dǘgüdaguaü lun?»8Buídutimatibu funagia luéi Tébasi, uburugu le lubadubei duna Nilu, le aubei geyegu lan saragu duna ani ligía liderebugubei?9Etiopía luma Ehiptu hagía meha lérebaña le mébehati; lílana Futu, ha Líwiana hagía meha lumadagubaña.10Lau sun lira, sagawati Tébasi lageiragiñe keisi adaürǘti; burewaguatiña lirahüñü luagu burí larigei üma; áhureratiña ubunuruni hawagu burí luwügüriñan ha íñugutiña, gürawaguatiña lábutigu lau güringüri.11Buguya, habacharuadagüdübadibu giñe, lálülüdüba bau áluaha baramudagun hawéi báganiñu.12Ítara liña sun biderebugu kei tídibu igu buin tau igu ñǘbürigiru, anhoun ánhingichua, tábürühan liyumulugun le éigitu.13Kamá hamuga würiña bisudaranigu; hunren liña lubenari uburugu lubá ágani; günringualá watu gemeti bidaünda.14Aransebá duna, gayara láamuga bawandun danme begeyedawagun; héregüdabeitima biderebugu. Beluba lidoun baribarabu, dügüguabéi gubegubeti, ragübei ladaaha ladiríyu.15Adügabéi yebe le badüga, lágudubadibu watu gemeti ñein, lagumuchaguagüdübadibu ágani sunsuinagubei kei lagumuchaguagüdüni chagagaru alubahani. Gánwounguaba kei chagagaru.16Gíbeguatiña meha adaagutiña marasun ha aganóubaña bidan sügǘ hau waruguma ha siélubaña. Guentó úaaña, ñǘdünguouga kei chagagaru.17Ítara haña búniri kei chagagaru; gíbetiña ha abudahabaña súdara bun ítara haña kei animaalugu mábutiña: Dan le diliga lan aba herederun badüleñu touba muna; dan le láfuridun weyu aba houdin; ani ibidiñewati haliñoun lan houdin.18«Lanarime san harumugun hóuniri bilügüniña mudún, lurúeite Asiria! Emeraaguatiña bani úfisigu, chagagu haña bisudaran áraabu, úati kaba lan óundaraguaña.19Máraninati biwounun; mareidaguati bugumein! Sun ha aganbubaña luagu bilamiserun apouhatiña háhabu lau ugundani, ladüga Kagia masufurirunbalin buriban le mébehabei?»Bible Society of Honduras