Naún2
1Níniwe, anite aban agünrinchaguti buagun. Warigüdabaña óunigirutiña luagun biderebugu! Ruba aríaahati ǘmadarugu! Güraboun befeinte! Óundarabei bere!2Lugundun lagiribudagüdübei Wabureme luéirigun Hakobu, luéirigun Ísüraeli, kei lubéi meha lubaragiñebei lasagarahóun aba ligirún kei lídibu beibei le malimunti.3Funati idaüdinaü le hanügübei báganiñu, funatu giñe hadaüragun hasudaranigu. Aranseña lun wuribu! Ítara tiña hakarün kamá hamuga lautu watu gemeti; mederaguagüdünhaña hagabayun.4Éibaaguañahatiña karü ǘmada luéigiñe aban oubaü lun luagun aban párükerugu, ítara tiña burí kei tochi durunguti, awireihatu kei labirihaniga.5Wati urúei houn lani úfisigu, aba habuguchagun hawougua dan le héibaagun luagun baríeiru, lidoun aramudaguagülei le aranselibei.6Darati burí lubenari duna éibaaguati aba tábürühan palasiu.7Barüwatu urúei tageiragiñe lun tadaürǘniwa; ñǘdüntiña tumusuniña tuma, áünheina kei unhun, ayahua hagía áfaraheinei haniguagu.8Kei lésehan duna tídangiñe aban püresa to fuduharu, ítara liña hanurahan lílana Níniwe. «Ráramagua humá! Giribu humá!» Ítara liña laguarahóun houn, gama lumoun úati ni aban agiribuduti.9Íweruha huméi pülata! Íweruha huméi golu! Mébehati lirisin Níniwe!10Günrinwagua Níniwe, málougaali ñein. Günringuatu burí anigi lau anufudei, adadagarati igachürügü, féridi hamuti sun gürigia here, aba lasansiragun hagibu le hanufude.11Ka erederubei lídangiñe uburugu le meha ítarabei kei haban liñún? Chóuruguatiña meha liñún hau harahüñü houngua ñein; úati meha ni kata anufudedaguagüdütiña.12Ragǘ lumutiñaha liñún líliru, aba lafanreinhaniña tun liñún würi hau tirahüñü, buíngüda lumutuha luban hau íliru.13Lariñahare Wabureme Suntigabafu: «Anahán ya bibügürü: Nágudaaru burí bikarün to lánina wuribu, ábame nadügünu gumulelime; náfaraguaaña birahüñü; nagumuchuba lau íweru le bufulasunrugubei, maganbúndigiaalime hamalali anügütiña uganu bun».
Bible Society of Honduras