Abakúku1
1Anihán uganu le larufudubei Wabureme lun Abakúku lidan aban uénedü.
Lekeharun Abakúku
2Bungiu Baba, ídaba san lásura nagúarahan amuriahei bídehan, móunabungabana? Ídaba san lásura nagúarahan ladüga anarimeni miábinga buguya esefurana?3Ka san uagu barihagüdana saragu idiheri luma wuribani? Geyeguniña lau anarimeni luma günringuaü; anihein wuribu lidan sun fulasu.4Magunfulirunti lúrudu, dügüwaguati irichaü, éibaaha hamutiña ha wuribabaña ha buídubaña, ligía madügǘniwa lubéi irichaü.Lóunabagüle Wabureme
5Lariñahare Wabureme houn Ísüraelina: «Ariha humá houn néchanigu ha geyegubaña hau; ariha humá houn hanufudegua humaamuga. Ánhaadina lun nadügün katei le burí mafiñenbadün hamuga luagu anhein abahüdawagúa hun.6Le lunbei nadügüni, nawuribuhagüdaaña Babilóniana, gürigia fásitiña, ha aransebaña súnwandan lun héibuguni ubóu, lúmagiñe luéigiñe aban oubaü lun luagun le aban, lun hóuyedun lau múa le mama hani.7«Hanufudewati hawéi, hanarime hagía, lúnrügüñein halurudun hánhara.8Óufutiña hagabayun sügǘ hau leoparüdu, gáñitiña sügǘ hau ounli áraabuna ha lídanbaña fulasu mageirawati. Gíbetiña hánigu ha gagalufehatiña, ani fureseti hagalufehan, dísegiñe hayabin, aba hábürühan luagun hágani, kei tábürühan ágila luagun tíliru.9Dan le hásügürün günringua hamuti sun le hadarirun habarua, Dan le hawanserun hanufudewati hawéi, gíbetimatiña hadaürün sügǘ lau sagoun le lárubei beya.10Adügatiña bula hau urúeigu luma hau gürigia íñugutiña. Éherahatiña lau burí uburugu le ayarawaguati lau dübü, adügatiña burichi ligibugiñe aba hárügüdüni.11Lárigiñe aba hásügürün kei aban hiriri; mabungiutetiña amu luéidigia here guánarügü».Lekeharunya Abakúku
12Nabureme, ma funagia abunhein gumugua dan, Nubungiute le sándubei le móunwedadibei? Nubungiute le ágüdahabalina, rúhadibu erei houn Babilóniana lun hagíaba lan abeichawa.13Wéiriti baruman, siñati bánharun lun wuribani, siñati bagundaarun lau barihini wuribani; ida liñati maní bubéi dan barihiniña gáfarahatiña, maní buguya sun añaha lan ha wuribabaña agünrinchaguaña ha buítimabaña hawéi?14Ka san uagu bóuseraña gürigia kamá hamuga úduraü baranahana, kamá animaalugu magumadirúntiña?15Barǘ hamutiña Babilóniana híbiri néchanigu kei lanügüniña óuchahati úduraü. Ragǘ lumutiña tau seni luma lau günwi, lárigiñe, dan larihiniña súngubei lidan aban, aba lagundaarun.16Ligía tínsiñebei lisenin óuchahati lun tuma lirünhüre, adügati adagaragüdüni, águdaha ligía kupali lidan hiri, ladüga hagía íchugubaña éigini buiti ani gíbeti lun.17Ítarameme haba san Babilóniana añugawa tau hasenin? Ítarameme haba áfaragua gürigia magudemehabuga?Bible Society of Honduras