Ayahuni4
Lagumuchun labeichún Herusalén
1Burúa golu! Féridila golu fínuti límirin! Chagagu liña burí tidübüri sanduariu!2Ha lílana Herusalén, ha meha wéirigubei houserún, ha meha gebegibalin hahürü lau golu, guentó ouserúatiña kei sóudieru lauti múa le ladüga gawadigimaridaditi katei lauti múa.3Íbini ounli áraabuna, guragüda tumutiña tirahüñü, ánheinti numutuniña, wuribatiña, wuribatiña kei aban awesüturusu houn tirahüñü lidan fulasu mageirawati.4Wéiriti hamagürabu irahüñü figigiña darí lun tabadülerun hañeñe luagu lisielun hayumulugu. Amuriahatiña irahüñü fein, gama lumoun úati íchugutu houn.5Ha meha aniheinbei saragu éigini hama, hilaguatiña halama ǘmada guentó. Ha meha aweinamudubaña lidan lubuiduniga, hímerugu haganóua guentó.6Wéiritimati habeichun numutuniña sügǘ lau labeichún Sodoma, le agünrinchawagubei lidan murusun oura mageindawagunga luma.7Ámirihati meha hagibu luwügüriñanigu ha anuadirúbaña sügǘ lau míligi; ani úati dáseiti hawagu kei niewe, dídeitiña, buin lau erei, ámirihati hagu le lubuidun hátuadi.8Gama lumoun guentó, hamuñati hagibu sügǘ lau lamuñounga; úabei gayaraati lasubudirúniña ǘmada. Badüle hara luagu habu, mábeiha kei watu!9Buítimati lidin houn ha óunwegubaña wuriburugu sügǘ hau ha láfaragubaña halama, ladüga ha láfaragubaña halama, murusun murusun hóunwegua lidan lúadun éigini le líchugubei múa.10Ñéinñanu würiña ha buítiña anigi ábougutiña hasaanigu houngua, hou hamutiña hasaanigu guánarügü dan le lagünrinchawagunbei Herusalén.11Óunaha lumuti Wabureme sun ligañi, ígiragüda lumuti súngubei. Gudá lumuti Herusalén, günringua lumuti íbini lebu.12Maritaguntiña yebe lurúeitegu fulasu, ni sun ha agumadihabaña ubouagu, luagu lebeluruba lan ágani luéigiñe lubenari Herusalén.13Ani sun lira, ladüga hafigoun profetagu, ladüga hariban fádirigu, ha gadurunbaña luagu hóunwegun gürigia maduruntiña!14Machoururunga héibuga kei marihintiña, lémerirugu uburugu; dáseiñu haña lau hitaü darí lun ua lan ni aban aguuruti tuagu hadaüragun.15Wáguati ariñaga houn: «Gidá humá harugabugiñe gürigia wíyetiña ha, maguura humaña!» «Éibugañahadügütiña anurahatiña hagía, liña hariñagun gibe tubungiutegu, siñati hasigirun aganóua ya».16Chagaguagüda lumutiña Wabureme, aba marihinhali lan hawagun. Minebenwatiña fádirigu, magudemenwa ligía houn wéiyaaña mutu.17Bucharuaali luagu wagu aguraba ídemuei ani machülüti. Agurabañu waña hachülürün gürigia ha siñabei hesefuruniwa.18Aríaaha hamuti sun wapasun, siñati wáfuridun ǘmadarugun. Yarafaali wagumuchagüle, éibaaha hamutiwa áraabu, sétitiña sádara wabá lidan fulasu mageirawati!19Furesetiña ha éibaahabaliwa sügǘ hau ágila, éibaaha hamutiwa áraabu, sétitiña sádara wabá lidan fulasu mageirawati!20Daüwa le lanúadirubei Wabureme, léñaha íchugubei gurasu lun wabagari, urúei léñaha uágubei wariñaga: «Lábugiñeba lamuñadirun waganawa hadan gürigia».21Béheraha, gundaabá uburugu Edomu; buguya le arúeihabei lóubawagu Usu! Lachülürüba giñe uniñein gífiti bun, ábame berederun bacharuañu, surusu!22Sunha babeichún, uburugu Herusalén; masagadigia láadibu Wabureme bageiragiñe. Gama lumoun labeichubei buriban, uburugu Edomu, lafuranguagüdübei bifigoun.Bible Society of Honduras