Ayahuni3
Abeichúni, asakürihani luma emenigini
1Au le sandí naalibei asufuriruni lábugiñe lagayuahan ligañi Wabureme.2Barǘ laadina lidoun burí fulasu búrigati, éibugagüda láadina lidan üma magemeriti,3aban lárigi aban, sagü murusun oura lagayuahan nuagu.4Wéiyagüdala nǘgürügü luma nura, halagualá nabu.5Iñuraguaali aban baríeiru lánina súfuri geyegua nau,6aganawagüda láadina lidan lamuñounga kei ha óunwegubaña lúmagiñe binarü.7Da lumutina lidoun aban baríeiru le siñabei náfuridun lídangiñe, gürá lumutina lau güringüri hǘrüti;8lau sun wáguana amuriaha ídemuei, meberesegúnti lau nayumuragun;9Darú lumuti üma nuéi lau baríeiru, geyé lumuti némeri!10Ítara liña nun kei aban liñún aramudaguñu, kei aban osu aranseñu lun lachubarun nuagun.11Direi láadina luéi üma, günringua láadina, ígira láadina buin lau anufudei!12Seti lumutu ligimaran, aba líchugunina lun nuágunba lan tadagara!13Beluharu gimara to lachüürüboun Wabureme nuagun buidu.14Adaaguatiña numutuniña bula nau. Au habulanbei sun oura.15Buíngüda láadina Wabureme lau idiheri, gífiti uniñein le líchugubei nun.16Halá lumuti nari lau láhuchurunina múarugun; hóugüda lumutina sagoun.17Díseeli darangilaü nuéi, darí lun bulieiná lan lubuidun dan.18Darí lun saminaadina lan luagu hilá lan lederaagüdün nemenigin luagu Wabureme.19Haritagua numuti nirun luma nábugua nan, nidiheri luma nasufurirun;20rédeitina asaminara luagun, aba lábürühan nuguraasun.21Gama lumoun mabusenruntina nabulieidun aban katei, lun níchuguni nemenigin luagu.22Luagu mébeha lan línsiñehabu Wabureme, ani malouguadungili lareini.23Iseriguati sagü binaafin, wéiriti ligunfulin!24Aba nariñagun nungua: «Wabureme, ligía sun káteibei nun; ligía hemenigi nubéi luagu!»25Areidati Aburemei houn ha hemenigibaña luagu, houn sun ha áluahabalin.26Buítimati wámanichun agurabaha líderaguniwa Bungiu.27Buítimati lederegeragun gürigia lungua lúmagiñe ñǘraügili.28Lunti lerederun gürigia lábugua ani maniñu, dan le ítara liña lan labusenruni Aburemei;29lunti ǘnabugubei lan darí ladagarun ligibu múarugu, luéidügü aniheingua lan emenigini;30lunti líchuguni lubuyubu lun le agayuahati luagu, lunti lawanduni luéirintima anabawaguni.31Mágurun lubadiwa Aburemei lun súnwandan.32Lau sun súfurigüda lan, gudemehabuti giñe, ladüga wéiriti línsiñehabu.33Lidan linarün katei, mínsiñeti lun lun ladiheridagüdün gürigia ni lun lasandiragüdün igari.34Subudi lumuti Aburemei dan le hadügürawagun adaürǘtiña ha lílana fulasu magudemehabuga35Subudi lumuti Aburemei dan le ladüraawagún liricha gürigia, ligibugiñe guánarügü Aburemei.36Subudi lumuti giñe dan le lésegerun liricha aban guséi, sun burí katei le, ani magundanti lau.37Dan le lariñawagún aban katei, dan le lasuseredun aban katei; ladügarügü ígiraali lan Aburemei lun lasuseredun.38Dandu buiti kei wuribati, liábinbei, ladüga ítara liña lan laransehani Aburemei.39Gafigountiña gürigia, kati uagu hekehara lidan ibagari le?40Samina wamá buidu luagu ligaburi wóuserun, giribuya wamá lun Aburemei.41Iñura waméi wasaminan luma wafurieigin lun Aburemei le siélubei.42Wagía afigouhatiwa, mabuchahatiwa, aba ua lan feruduna bániwa.43Geyegua bumutiwa lau bigañi; éibaaha bumutiwa, gidá bumuti wabagari magudemehabuga!44Daruguatibu bougua lidan aban dúeri lun maganbunbani wayumuragun.45Óusera báadiwa kei lagübüri ifei hagibugiñe sun gürigia.46Wagatiña sun wáganiñu kóntüra wagía;47anufudei, sádara luma günringuaü, ligía wafanranbei!48Áwiyuhati saragu águiraü nágurugugiñe luagu lagünrinchagun nuburugute le hínsiñebei nun.49Memeraagunti nayahun lugundun úabei dǘgüdaguaü,50darime larihin Aburemei le siélubei wawagun íñugiñe.51Gáriti nagu chülǘ tumoun nuani luagu le asuseredubei houn lirahüñü nuburugute.52Agaliruha hamaadina náganiñu kei dunuru lau sun mébuna lan;53buná hamutina wínwanñu lidan aban fusu, aba hadouruni liyuma lau aban dübü.54Daruguaali duna nau le gumuti, nariñagati núnguarügü: «Féridihadina».55Aburemei, Wátina buagu lídangiñe luhulilin-agei fusu,56aganba bumuti numalali; ténitibu lun nayumuragun.57Weyu le nagúarun buagu, ñǘbuintibu numoun, aba bariñagun nun: «Manufudedabá».58Ageindaguatibu nuéigiñe lidan náfaagun, Aburemei, sefu bumuti nibagari.59Nabureme, ariha bumuti marichaü le burí nasufurirubei, rubei niricha nun!60Ariha bumuti sun le hayumahabei luma le haransehabei kóntüra nuguya.61Aganbabéi hanabagunina, Aburemei, luma le haransehabei kóntüra nuguya;62sun le hadimurehabei náganiñu nuagu sun oura.63Au lébunabei habulan lidan sun le hadügübei.64Rubei le hadünabei houn, Aburemei, rubei le ladünabei hadüga houn.65Deregüdaboun hanigi, íñaraguabaña.66Éibaahabaña lau igañi, Aburemei, gumuguagüdabaña ubouagugiñe!Bible Society of Honduras