Alidihatiña4
Débora luma Barakü
1Lárigiñe lounwen Eudu, ábaya hadügüni Ísüraelina le wuribabei ligibugiñe Wabureme,2ábati lederegeruniña Wabureme lábugiñoun lubafu Habín, aban urúei Kananna le agumadihabei uburugu Asoru. Sísara ligía líribei hábuti lisudaranigu, Aroseti-goimü laganawa.3Ñeinñoun nefu-san karü to lautu gürabu luma Habín, súfurigüda lumutiña Ísüraelina luagu wein irumu, darí hayumuragun lun Wabureme lun líderaguniña.4Dan ligía, aban würi profeta gíritu Débora agumadihaboun Ísüraeli, lúmari Lapidótu.5Héchutu méhati Débora añuura tábugiñe aban tídibu yaraüwa gíriti tinadüri Débora, to ñeinboun luagu luwübüri Éfürain, labadinagua Ramá luma Beteli, ábatiha houdin Ísüraelina tumoun aransehei luáguti hawuribun hámagua.6Luagu aban weyu, aba tóunaagüdün Débora luagu aban wügüri gíriti Barakü, liráü Abinóamü, Kedesi laganawa aban fulasu le hani lani Nefütalí türibu, tariñaga lun:—Anihán lererun Wabureme le Lubungiute Ísüraeli bun: “Beiba luagu wübü le Taworu, ábame bóundaragun hama diisi-milu wügüriña hádangiñe lani Nefütalí hama lani Sabulón türibu ñein.7Nadügüba lun liabin Sísara le hábuti lisudaranigu Habín luagun lidunari Kisón tau burí lugune hama lumutuniña lun hageindagun buma, gama lumoun nederegerubaña búhaburugun”.8Lariñaga Barakü tun:
—Ánhabugubeirügü ñüdün numa, ligíarügüba nidin, ánhabu midin, mídinbadina.9Tariñaga Débora lun:
—Nídiba buma, ani mámaba bun lichugúa uéiriguni lidan katei le, ladüga túhaburugunba aban hiñaru lederegerei Wabureme Sísara.
Ábati tidin Débora luma Barakü Kedesin.10Aba lagúarun Barakü houn lani Sabulón hama lani Nefütalí türibu, aba lóundarun diisi-milu wügüriña lábugiñe lugumadin. Ñǘdüntu Débora luma.11Yarafa lun Kedesi, tábugiñe aban tídibu wewe to lani Saanaimü, ñeinñoun likianpun-agei Éberü le ladügawagun Kaín, le meha adisedubei hawéi híbiri Kenitana ha ladügawagun Obabü le límedamuru Moisesi.12Dan le lasubudirunbalin Sísara luagu múdeiha lan Barakü luagun wübü Taworu,13aba lóundarun nefu-san ugunei to lautu gürabu hama sun lisudaranigu, aba lidin hau lúmagiñe Aroseti-goimü darí luagun lidunari Kisón.14Ábati tariñagun Débora lun Barakü:
—Saraba, lederegeraali Wabureme Sísara búhaburugun! Aningiraali Wabureme habá habá bisudaranigu!
Aba lararirun Barakü luéigiñe wübü hau diisi-milu lisudaran,15aba ládarun Wabureme anufudei hadoun lánigu Sísara danbei hagagibudagun tuma lefeinte Barakü; íbini Sísara guánarügü, rariti tídangiñe lugune, aba lanurahan eibu.16Aba lasigiruniña Barakü súdaragu tuma burí ugunei darí Aroseti-goimü. Lidan weyu ligía, meredeti ni aban hádangiñe lisudaranigu Sísara wínwanñu; hilaguatiña súngubei.17Kei buíduñein lubéi Habín le lurúeite Asoru hama lánigu Éberü le ladügawagun Kaín, aba lachülürün Sísara eibu chülǘ tumoun tikianpun Haeli to lúmari Éberü lidan lanurahan,18aba táfuridun eresibirei, tariñaga lun:
—Yáagiñe humá nabureme, yáagiñe humá, manufudeda humá.
Aba lebelurun Sísara, aba taramuduni Haeli, aba tadouragun lau tau aban gamisa;19ábati lamuriahan Sísara duna tuma, ladüga wéirihali lumagürabu. Aba tadaaruni Haeli ágeidinaü le ñein lubéi míligi, aba tíchugun lun lun latun, ábaya tadouruni.20Lariñaga Sísara tun:
—Rédeiba tubenari kianpu, ánhaña ñübuin álügüdaha anhein gálouga lubéi múnada; bariñagame houn luagu málouga lan.21Ani wéiriti lubucha luagu Sísara, aba larumugun. Ábati tanügün Haeli aban marüdiyu luma aban pegi le hayusurubei tun hakianpun, aba tiabin maniñu le ñeinhin lubéi Sísara, aba tádaraguni pegi ligía lereberugun. Ítara liña lounwen Sísara.22Danti liábinbei Barakü áluahei Sísara, aba táfuridun Haeli eresibirei, tariñaga lun:
—Higabu, narufudaali gürigia le báluahabei bun.
Aba lebelurun Barakü, aba ladariruni Sísara roun múarugu, hilaali, lau wewe charuñu lábulugu.23Ítara liña lǘnabudagüdüni Wabureme Habín harúeite Kananna, hagibugiñe Ísüraelina.24Lúmagiñe dan ligía, aba híchugun Ísüraelina lidere dan lun Habín, darí lun hagünrinchaguni.
Bible Society of Honduras