Alidihatiña3
Néchanigu ha erederubaña Kanán
1Añahán burí néchanigu ha lígirubaña Wabureme lun hóuchaguniña Ísüraelina ha meha mágurahoungiñabaña dan le lageindawagunbei luagu Kanán.2Ígira lumutiña Wabureme néchanigu hagía lun hafurendeirun Ísüraelina ha mídingiñabaña wuriburugu, awuribuha.3Rédeitiña séingügubei ábutigu Filistéana, sun Kananna, Sidonna hama Eweuna ha aganóubaña luagu wübü Líwanu, lúmagiñe wübü Baali-erümón, darí Amatü.4Lau lira, lóuchaguñanu meha Wabureme Ísüraelina, lun larihin anhein hóudiba lubéi lau gumadi le bugaha líchugubei houn hagüchagu lídangiñe Moisesi.5Ítara liñati hagumeserun Ísüraelina aganawa haganagua Kananna, Étüna, Amoruna, Féresüna, Eweuna hama Hebusuna,6ábati hamarieidunga hasaanigu Ísüraelina hama hasaanigu lílana fulasu ligía, aba háhuduragun houn habungiutegu.Lesefuruniña Otoniéli Ísüraelina luéi Kusán-risataimü
7Mabuidunti hóuserun Ísüraelina ligibugiñe Wabureme, bulíei hamuti Wabureme, aba háhuduragun houn ámuñegueinarügü liyawa baali luma asera.8Ligía lagañidunbei Wabureme hama, aba lederegeruniña lábugiñoun lubafu Kusán-risataimü, le lurúeite Mesopotámia. Seriwitiña Ísüraelina widü irumu lun Kusán-risataimü,9darí hayumuragun lun Wabureme, aba lóunahan kaba lan esefuraña. Otoniéli le liráü Kenasi le lamulen Kalebü, ligía ñǘbuinbei lun lesefuruniña;10aba liabin lani Wabureme Sífiri luagun Otoniéli, aba lidin ábutime houn Ísüraelina; aba láfuridun ageindagua, aba lagañeiragüdüni Wabureme wuribu lun kóntüra Kusán-risataimü.11Lárigiñe, aba labagaridun Otoniéli luagu bián-wein irumu, ani sun wínwanñu lubéi ñeinñein darangilaü fulasurugu. Lesefuruni Eudu Ísüraeli luéi MoabüLárigiñe lounwen Otoniéli12ábaya hagumeserun Ísüraelina adügei le wuribabei ligibugiñe Wabureme, ligía líchugunbei Wabureme saragu ubafu lun Egülón le lurúeite Moabü sügǘ lau houn Ísüraelina.13Aba lóundarun Egülón hama Amonna luma hama Amaléküna, aba hábürühan hawagun Ísüraelina, aba hárügüdüni uburugu le ñein lubéi burí tídibu yaraüwa.14Seriwitiña Ísüraelina lun Egülón luagu disiwídü irumu,15darí hayumuragun lun Wabureme, aba lóunahan Wabureme kaba lan esefuraña. Aban wügüri báünati gíriti Eudu, liráü Gerá, hádangiñeti lani Benhamín türibu ñǘbuinbei esefuraña.
Luagu aban weyu, aba hóunahani Eudu íchigei liseinsuna gumadi lun Egülón.16Gama lumoun aba ladügün Eudu aban lefeinte biangua tamana, kei burí dimí méturu timigifen, aba lagüürünu liranaagua tábugiñe ladaüragun, luéigiñe lóunwenren;17ábati lidin lau liseinsuna gumadi lun Egülón, dibunetiti Egülón.18Lárigiñe lederegeruni liseinsuna gumadi lun Egülón, aba láfuridun Eudu hau sun ha ñǘdünbaña luma,19ani dan le hachülürünbei le ñein habéi guáriua ha lubadubaña Gilügáli, aba lagiribudun Eudu le ñeinhin lubéi Egülón, aba lariñagun lun:
—Anihein aba uganu numa bun, ani gasu níchuguni bun wábuguarügü.
Ábati lariñagun urúei houn ha eseriwidubalin, lun hámanichun luma lun háfuridun ñéingiñe.20Dan le lábuguarügaali Eudu luma Egülón, ñun liña Egülón tidan rumu to lánina lárouga, aba layarafadun Eudu lun, aba lariñagun lun:
—Uganu le nanügübei hun urúei, lúmagiñeti Wabungiute.
Dan laganbuni Egülón le, aba lásaarun luéigiñe lala,21ani kei baüna lubéi Eudu, aba lasagarunu lefeinte to luéigiñeboun lóunwenren lau lubaünan, aba límiruni Egülón tau luagun luragei.22Hanarimeti límiraguni, darí lun lebelurun sun tebu lurageirugun, aba ladouragun lidibunen Egülón tau, kei masaga lubarun Eudu luéi.23Lárigiñe, aba legeleinduni Eudu bena, aba láfuridun luéigiñe funedera.24Dan le ñǘdünhali, aba hayabin eseriwidutiña lun urúei, kei harihini bena darugu, aba haritagun luagu Háfuga lan laranseraguña lan urúei lungua.25Ani lílüwagu hagurabahan, dan harihin luagu máfuridun lan urúei, aba laribadun haritagun, ábati hadaaruni bena, aba hadariruni urúei roun múarugu.26Sun buga añaha lan eferidira dan, anura buga Eudu, lárigiñe lásügürüniña guáriua ha Gilügálibaña aba laramudagun Seiratü.27Dan lachülürün hamúanrugu Ísüraelina, aba línwinrun fidu luagu luwübüri Éfürain lun lagúarun houn Ísüraelina, aba hararirun sun hagía luéigiñe wübü, Eudu habá habá.28Aba lariñagun Eudu houn lun hafalaruni, luagu lagañeiragüdübaña lan Wabureme hawagu Moábüna ha háganiñu. Ábati hafalaruni, aba hárügüdüni fulasu le ñéingiñehei lubéi hánhiñuraguei Moábüna duna Hordán, ani mígiruntiña lun lánhiñuragun ni aban.29Lidan dan ligía, áfaratiña hawara diisi-milu Moábüna, sun hagía súdaragu héretiña ani ganigitiña. Mesefurunti ni aban lau ibagari.30Ítara liña hagañeiruni Ísüraelina Moabü. Lárigiñe lira, aba ñein lan darangilaü fulasurugu luagu gádürü-wein irumu.
Lesefuruniña Samügárü Ísüraelina hawéi Filistéana
31Ábuti le ñǘbuinbei lárigiñe Eudu, Samügárü le liráü Anatü, ligía áfarubei sisi-san Filistéana lau aban hímiraagüle bágasu lun héibugun. Sefu lumutiña giñe Samügárü Ísüraelina.Bible Society of Honduras