Alidihatiña2
Lani Wabureme ánheli uburugu Bokimü
1Aba lidin lani Wabureme ánheli Gilügáligiñe lun Bokimün aba lariñagun houn Ísüraelina:—Au asagarubalün Ehiptugiñe, ani barǘ naadün lidoun múa le meha füramase nubéi houn binadu hagüchagu dan le nariñagunbei houn: “Madüraagun nubéi nidaradun huma;2madügünrügaadün ligíame ni aban daradu hama lílana fulasu le, günringuarügü huméi hani latarü”. Ani mídintün lau le nubeibei, ariha humuti ka lan hadügübei!3Ligía nariñagunbei hun guentó: Masagarun nubaña lílana burí fulasu le huéi, hagíaba háganiñu, ánhañati habungiutegu, ábanbaña sádara hubá.4Dan le lásurunbei ladimurehan lani Wabureme ánheli, aba hayahuahan sun Ísüraelina.5Ligía háchubalin fulasu ligía Bokimü, aba hadagaragüdün lun Wabureme ñein.
Lounwen Hosué
6Dan le layouragunbei Hosué houn Ísüraelina, aba houdin kada aban lidoun fulasu le ichugúbei houn.7Sun dan le wínwangili lubéi Hosué, adügatiña Ísüraelina kultu lun Wabureme, luma giñe dan le wínwangiña ábutigu ha erederubaña lárigi Hosué, ha arihubalin sun luéinamun burí katei le ladügübei Wabureme luagu hafulesein Ísüraelina.8Gama lumoun aba lounwen Hosué luagu san-diisi irumu lau,9aba hábununi lidan lufulasun le Timünatü-sérabei le luéigiñebei nórute libiti Gaasü, luagu luwübüri Éfürain. Aba giñe hóunwegun sun Ísüraelina ha lisaisinigu Hosué.10Hati águrahoubaña lárigiñe, ibidiñeti ni kata houn luagu Wabureme, ni luagu sun katei le bugaha ladügübei luagu lufulesein Ísüraeli.Hígiruni Ísüraelina Wabureme
11Aba hadaagun Ísüraelina katei burí le auti magundan lan Wabureme, aba hagumeserun áhuduragua lun Baali.12Aba hígiruni Wabureme, le Habungiute wagüchagu le bugaha asagarubaliña Ehiptugiñe, aba háhuduragun houn habungiutegu gürigia ha geyegubaña hau, agañidagüdei Wabureme.13Ígira hamuti Wabureme lun háhuduragun lun Baali luma tun liyawa Asütarótu,14ligía lagañidunbei Wabureme luma Ísüraeli, aba ladügün lun híweruhani híwerutiña hámati luma lun háfaraguniña háganiñu ha hóugiñebaña, siñauga hararamun hagibugiñe.15Ságüha houdin wuriburugun, wuribati lidin houn, lugundun mama lan meha hámagiñeñein Wabureme, ítara kei lariñaguni houn.Ani lau sun ru lániña Wabureme Ísüraelina lidoun lénrengunga,16ruti giñe ábutigu gabafutiña lun hesefuruniña hawéi háganiñu.17Gama lumoun madügüntiña Ísüraelina gasu hau ábutigu hagía, múaraduntiña luma Wabureme, áhuduragua houn amu búngiugu hadügübei. Ñǘdüntiña meha binadu hagüchagu lau le lubeibei lugumadin Wabureme, ánhaña hagía, mafala hamuti hani hénpulu.18Ságüha líchugun Wabureme aban ábuti, íderagua lumuti giñeha, ábatiha lesefuruniña Ísüraelina hawéi háganiñu, lugundun gudemetiñaha lun dan le laganbuni hayahun luma hasufurirun.19Gama lumoun danha le lounwen ábuti, ábayaha haribadun sügǘ hau hagübürigu, eseriwida luma áhuduragua houn amu búngiugu. Mígirun hamuti luriban hóuserun.20Ligía lagañidunbei Wabureme hama, aba lariñagun:
—Halagua hamuti gürigia ha daradu le meha nadügübei hama hagüchagu, ani máhatiña houdin lau le nubeibei.21Masaga nubaña lubeiti lílana ni aban fulasu ha masaga lubaña Hosué hawéi lubaragiñe lounwen.22Lau lira, larihiña yebe Wabureme anhein hafalarubei lubéi Ísüraelina lémeri, kei meha hafalaruni hagüchagu.23Ligía masaga lubaliña Wabureme néchanigu ha mederegerun lubaña lúhaburugun Hosué, ígirarügü lumutiña lun herederun ñein.
Bible Society of Honduras