Alidihatiña1
Lárügüdüni Hudá luma Simeón Adonisedekü
1Lárigiñe lounwen Hosué, aba hálügüdüni Ísüraelina Wabureme kaba lan türibu ageindagua hama Kananna furumiñe.2Aba lóunabun Wabureme:—Hudaaba furumiñe, ladüga derege naali múa lúhaburugun.3Ábati hamisurahaniña lani Hudá türibu hábirigu ha lani Simeón türibu lun hóundarun hama lun hebelurun anügei fulasu le yuubei lun Hudá, lárigiñeme ábame hebelurun lidan aban anügei le yuubei lun Simeón. Aba hánharun lánigu Simeón lun hóundarun hama lánigu Hudá,4ítara liña hárügüdüni lánigu Hudá hamúan Kananna luma hamúan Féresüna, ha lederegerubaña Wabureme háhaburugun. Áfaratiña diisi-milu hádangiñe Bésekü, ñeinñein Adonisedekü hadan.6Anurahati yebe Adonisedekü, gama lumoun aba héibaahani, aba hárügüdüni, aba hadürühani lúguchi lifinga lúhabu luma lúguchi lifinga lugudi.7Ábati lariñagun:
—Dürǘ numuti meha lúguchi lifinga háhabu luma lúguchi lifinga hagudi ǘrüwa-wein-diisi urúeigu, aba nígiruniña abudaha life éigini lábugiñe nidabulan. Guentó, adüga Bungiu nun, kei meha nadüga houn.
Aba hanügüni Herusaléun le ñein lubéi lounwe.
Lagañeiruni Hudá Ebürón luma Herusalén
8Aba hábürühan lánigu Hudá luagun Herusalén, aba hárügüdüni, lárigiñe háfaraguniña sun lílana fulasu tau eféin, aba háguduni uburugu.9Lárigiñe aba hábürühan hawagun Kananna ha burí aganóubaña áraabu, lóubawagu Négebü luma lidan burí fulasu mawübüriti.10Ábürühatiña giñe hawagun Kananna ha uburugubaña Ebürón, le meha gíribei Kiriatü-arüwá furumiñe, aba háfaruni Sesái, Aimán luma Talümái, ǘrüwa lirahüñü Anakü.Lagañeiruni Otoniéli Debirü luma leresibirunu Áküsa
11Lárigiñe aba hábürühan luagun uburugu Debirü, le meha gíribei Kiriatü-séferü furumiñe.12Aba lariñagun Kalebü:—Le agañeiruti Debirü, níchuguboun Áküsa to niráü lun, lun lúmarime.13Aba lagañeiruni Otoniéli le liráü Kenasi, le lamulen Kalebü; ábati líchugunu Kalebü Áküsa lun, lun lúmarime.14Dan le lanügünbarun Otoniéli, aba lariñagun tun lun tamuriahan aban fulasu luma túguchi. Dan larihinbei Kalebü tararirun Áküsa luéigiñe burigü, aba lálügüdünu:
—Ka suserebei?15Tariñaga lun:
—Kei rúhadibu lubéi múa nun lóubawagu Négebü ruba giñe lísensen duna nun.
Aba líchuguni Kalebü lísensen duna le ǘnabugiñebei luma le íñugiñebei tun.
Lagañeirun Hudá luma Benhamín
16Aba háfuridun ladügawagun Obabü le Kenitana, le límedamuru Moisesi tuburuguterugugiñe fáluma-agei hama lirahüñü Hudá, aba houdin lidoun fulasu mageirawati le lani Hudá, luéigiñe suru libiti Aradü, aba herederun aganawa ñein hama lílana fulasu.17Ábati houdin lánigu Hudá hama lánigu Simeón, aba hábürühan hawagun Kananna ha aganóubaña Sefatü, aba hagünrinchaguni uburugu ligía sunsuinagubei lidan liri Wabungiute. Ligía híchugunbei Orumá lírime fulasu ligía.18Gama lumoun siñá hamuti Gasa, Asükalón luma Ekürón anüga, ni lumúan le burí yarafabei lun.19Lau sun íderagua lániña Wabureme lánigu Hudá, gañei hamuti burí áraabu, gama lumoun siñá hamutiña gürigia ha burí aganóubaña lidan fulasu mawübüriti asagara, lugundun anuhein burí karü to lautu gürabu hama.20Aba líchuguniwa uburugu Ebürón lun Kalebü, kei buga lariñaguni Wabureme lun, aba labugaguniña ǘrüwa lirahüñü Anakü ñéingiñe.21Ánhañati lani Benhamín türibu, siñá hamutiña Hebusuna ha aganóubaña Herusalén asagara ñéingiñe. Ligía añaheingua lubéi Hebusuna aganawa lidan aban hama lani Benhamín türibu chülǘ lumoun dan le.Hagañeiruni lani Hosé türibu Beteli
22Aba haranserun lánigu Hosé türibu lun hábürühan luagun uburugu Beteli, le meha gíribei Lusu, ani íderagua lumutiña Wabureme. Aba hóunahan aríaahatiña lidan uburugu ligía.24Aba harihin ha ñǘdünbaña aríaahei fulasu aban wügüri láfuriduña uburugugiñe, aba hariñagun lun:—Arufudabéi lebelaagüle uburugu woun ábame gudemehabu wamá bun.25Aba larufuduni houn ida luba lan hebelurun uburugun, aba hebelurun, aba háfaraguniña sun ha aganóubaña ñein tau eféin, gama lumoun feruduna hamuti libagari le buga arufudubalin üma houn, hau sun liduheñu.26Ábati lidin wügüri ligía hageiroun Étüna, aba lábunagun aban iseri uburugu ñein, aba líchuguni Lusu lírime uburugu ligía, ligiamémegili liri uburugu ligía chülǘ lumoun dan le.
Néchanigu ha mabugawagúnbaña
27Siñá hamutiña lani Manasési türibu néchani ha aganóubaña Betü-seán, Taanakü, Doru, Ibüleámü luma Megidu asagara ñéingiñe, ni ha aganóubaña lidan burí lirahüñü aüdü yarafa lun uburugu burí ligía, rédeitiña lubeiti Kananna aganawa ñein.28Dan le laweiriduntimabei habafu Ísüraelina, aba híchuguni wadagimanu dereti houn Kananna, gama lumoun siñá hamutiña asagara.29Siñá hamutiña giñe lánigu Éfürain Kananna ha aganóubaña Géserü asagara ñéingiñe, añaheingua lubeiti Kananna aganawa hadan.30Siñá hamutiña giñe lánigu Sabulón Kananna ha aganóubaña Kitürón luma Naalali asagara ñéingiñe, añaheingua lubeiti Kananna aganóua hadan adaagua wadagimanu dereti.31Siñá hamutiña giñe lánigu Aserü Kananna ha aganóubaña Akó, Sidón, Alabü, Aküsíbü, Elibá, Afekü luma Reobu asagara ñéingiñe, keiti siñá hamaniña asagara, aba herederun aganawa haganagua.33Siñá hamutiña giñe lánigu Nefütalí Kananna ha aganóubaña Betü-sémesi luma Betü-anatü asagara ñéingiñe, aba híchugun wadagimanu dereti houn, aba herederun aganawa haganagua.34Giribugüda hamutiña Amoruna lánigu Dan dagá áraabun, mígirun hamutiña lun haragachun lidoun fulasu burí mawübüriti.35Aba hasigirun Amoruna aganawa Éresi, Ayalón luma Saalübímü. Gama lumoun dan le héreduntimabei ladügawagun Hosé, aba híchugun wadagimanu dereti houn Amoruna.36Lagumesera láfadaragun hafulasun Amoruna lúmagiñe lamudeirun Akürabímü darí Selá, lasigira iñun.Bible Society of Honduras