Hosué24
Layouragun Hosué
1Aba lóundaruniña Hosué sun lani Ísüraeli türibu uburugu Sikemü. Aba lagúarun houn eweridihatiña, ábutigu, aguseragüdütiña hama hábutigu súdaragu lidan liñúarü Wabureme,2aba lariñagun houn sun gürigia:—Anihán le lariñagubei Wabureme le Lubungiute Ísüraeli: “Lidan bugaha dan le sügühalibei Tera hau lisaanigu ha Abüraámü luma Naoru, ha hagüchagu, laru meha duna Éufüratesi haganawa, ani houn meha amu búngiugu háhuduragua.3Lárurugugiñe Éufüratesi nanügei Abüraámü, aba néibugagüdüni sun lóubawagu Kanán lun. Aba nagibedaguagüdüniña liduheñu lau níchuguni Isaakü le liráü lun furumiñe.4Aba níchugun bián isaanigu lun Isaakü: Hakobu luma Esaú. Aba níchuguni fulasu le dabíarabei lóubawagu Seirü lun Esaú, ánheinti Hakobu hau lirahüñü aba houdin Ehiptun.5Ábati nóunahani Moisesi luma Aarón, aba náfaraguniña Ehiptuna, darí nasagarunün ñéingiñe.6Dan le háfuridunbei hagüchagu Ehiptugiñe, aba houdin Ehiptuna hárigi éibaahaña tau karü lánina wuribu hama gabayu darí barana funati.7Aba hagúarun nuagu, aba níchugun aban óunwenbu luburiga hagibugiñe Ehiptuna, aba nadügün lun ladouragun barana hau. Gefentün luagu katei le nadügübei Ehiptu”.
Lárigiñe aba hásügürün saragu dan lidan fulasu mageirawati,8darí nanügünün lidoun hamúan Amoruna luéigiñe oubaü le ñéingiñe lubéi laboucha weyu libiti Hordán. Ageindaguatiña huma, gama lumoun aba nederegeruniña húhaburugun, aba hagañeiruniña, aba herederun lau hageira.9Lárigiñe, aba liabin Balakü le liráü Siporu le harúeite Moábüna ageindagua huma. Aba lóunahan Balakü luagu Balaamü le liráü Beoru lun yebe líñaragunün.10Gama lumoun mígiruntina lun líñaragunün Balakü, aba labinirunün, ítara liña nesefurunün.11Ábati hánhiñuraguni duna Hordán, aba hachülürün Herikó. Ha aganóubaña Herikó (Amoruna, Féresüna, Kananna, Étüna, Hérühesina Eweuna hama Hebusuna) ageindaguatiña huma, aba nagañeiragüdünün.12Ha bián urúeigu Amoruna máfaragun humutiña tau eféin ni tau gimara, au óunahabei anufudei hubá, aba hanurahan lubaragiñe hachülürün.13Rútina múa le mawadigimari humuti hun, luma uburugu le mábunagun humuti. Ñein haganawa guentó, houtün beibei tuma lin oliwu to mábunagun humutu.14—Lunti lubeiti inebe lan Wabureme hun, seriwi huguyame lun lau inarüni luma úarani. Dise humá hawéi búngiugu ha meha únbaña háhuduragua hagüchagu laru duna Éufüratesi luma Ehiptu, seriwi humá lun Bungiu.15Gama lumoun anhein mabusenrun hubéi heseriwidun lun Wabureme, anúadaha humá uguñe kaba lan un heseriwida: Houn yebe búngiugu ha meha únbaña heseriwida hagüchagu laru duna Éufüratesi, o houn lan habungiutegu Amoruna ha aganóubaña lidan fulasu le. Ánheinti au hau tílana nuban lunba Wabureme weseriwida.16Ábati hariñagun:
—Mígirundügü láamuga Wabureme lun weseriwidun houn amu búngiugu!17Wabureme asagarubaliwa hau sun wagüchagu Ehiptugiñe, ñein lubéi meha idamuni wamá. Ligía adügübei saragu buidu ligibugiñe wagu, ligía giñe óunigirubaliwa luagu üma dan le wásügürünbei lídangiñe saragu fulasu.18Bugá lumutiña sun gürigia ha wémerirugubaña hau sun Amoruna ha meha aganóubaña ya. Ladüga sun le, weseriwiduba giñe lun Wabureme, ladüga ligía Wabungiutebei.19Lariñagaya Hosué houn:
—Huguya siñabei heseriwidun lun Wabureme, ladüga aban Bungiu sánduti ligía ani emeiditi, magundanbei lau hagarabaagun luagun ni lau hifigoun.20Anhein hígira, heseriwidame houn amu búngiugu, lóunabuba Wabureme lau ladügün wuribati hun, ábame lagünrinchagunün lau sun adügaali lan saragu buiti hun.21Hóunabeiti gürigia:
—Masuseredunbei lira. Weseriwiduba lun Wabureme.22Ábati lariñagun Hosué houn:
—Huguya guánarügü gefenbei luagu anúadahaadün lan lun heseriwidun lun Wabureme.
Aba hóunabun:
—Gefentiwa.23Lariñagati Hosué houn:
—Gidá humañati sun búngiugu ha haganaguabaña, giribu humá tau sun hanigi lun Wabureme le Lubungiute Ísüraeli.24Hóunabeiti:
—Weseriwiduba lun Wabureme le Wabungiute, wadügübei le lariñagun woun.25Weyuméme ligía, aba ladügün Hosué aban daradu hama gürigia ñein Sikemü, aba líchugun lúrudu luma dimurei houn,26aba labürühani tidan liliburuna lilurudun Bungiu. Lárigiñe aba lanügün aban óunwenbu dübü, aba líchuguni tábugiñe aban tídibu wewe to ensina to tídanboun lani Wabureme sanduariu,27aba lariñagun houn sun gürigia:
—Leseriwiduba dübü le woun kei gefenti, ladüga aganba laali sun le lariñagubei Wabureme woun. Ábanbei gefenti kóntüra huguya lun meyeehan humani Hubungiute.28Lárigiñe aba lóunahaniña Hosué kada aban hamúanrugun.
Lounwen Hosué
29Málüti lúmagiñe anhein hilá Hosué le liráü Nun, san-diisi irumu lau.30Aba hábununi lumúanrugu le Timünátü-sérabei le luágubei wübü Éfürain, luéigiñe nórute libiti wübü Gaasü.31Seriwitiña Ísüraelina lun Wabureme sun wínwanñu lan Hosué, luma lárigiñe lounwen, sun wínwanñu hamá wéiyaaña mutu ha subudihabúbaña lun sun le ladügübei Wabureme hawagu Ísüraelina.Hábununi Ísüraelina labu Hosé
32Labu Hosé le buga hanügübei Ísüraelina Ehiptugiñe, aba hábununi Sikemü, lidan fulasu le meha lagañeihabei Hakobu luagu san murusun pülata hámagiñe lirahüñü Amoru le lúguchi Sikemü, lárigiñe aba lerederun houn ladügawagun Hosé.Lounwen Eleasárü
33Dan lóunwenbei Eleasárü le liráü Aarón, aba hábununi luagu wübü le lani Finesi le liráü le ichugúbei lun luagu luwübüri Éfürain.Bible Society of Honduras