Hobu9
1Subudi numuti buidu luagu ítara liña lan katei le, ani siñá lan lariñagun gürigia luagu madurun lan ligibugiñe Bungiu.3Anhein hamuga áluga gürigia lasigenehan luma Bungiu, siñaguabei hamuga lungua lasigenerun ni aban lídangiñe milu katei le lariñagubei Bungiu lun.4Wéiriguti Bungiu lidan ubafu luma lidan lichú aau, kaba agagibudagua luma, lun lagañeiruba lan?5Hingigua lumuti Bungiu dabíara lidan ligañi, chagagualéi ibidiñounga ni ka un.6Hingiguagüda lumuti Bungiu múa lau sun lebu.7Ruti lúrudu lun weyu lun máfuachun lan, luma houn waruguma lun marugoungadagüdün hamá.8Adüga lumuti Bungiu sielu míderawagunga; éibuga ligía ligibuagu lugudi barana.9Adüga lumutiña Waruguma: Weiritagu, Orión hama hóundaragun waruguma, hama ha luágunbaña suru.10Adügati Bungiu saragu katei buíduburiti, ani úati ni aban gayara lumuti gunfuranda.11Anhein ásügüra Bungiu nóubagiñe, násiñarubei ariha, lásügürüba ani mefenbadina.12Anhein anüga somu katei lánime, kábagia ariñaga lun kame banügei? Kábagia álügüdaguei luagu le ladügübei?13Anhein agañida Bungiu, magidarunti ligañi ítaraguarügü; ábürühatiña lumadagu Raabü labun lugudi.14Ida lubati nadarirun dimurei lun nasigeneruni Bungiu?15Ka lan yebe lueirin madurun nan siñati nóunabuni, ligía naguseragülebei, gudemehaburügüñein gayara namuriahan luma.16Anhein hamuga nagúara ligibugiñoun lúrudu, lun liabin, mafiñentina anhein adüga gasu lau nererun.17Labeichagüdübadina hamuga lun aban luriban dan, gánwoungüdaleime biti le nuágubei mébunouga;18líchuguña hamuga lanwoun numagundan, míchugunga awaraguni nun.19Ánhana hamuga ageindagua luma, gabafutimati hamuga nuéi. Lun nagúaragüdün luagu ligibugiñoun lúrudu, kábagia ñǘbuingüdei?20Ka lan yebe lanarime lubuidun nusan, ladariruña hamuga nidurun.21Maduruntina yebe, gama lumoun meberesentina lau lira, buchá nuagu abagarida.22Sun katei aban ligaburi. Ani anihán le naritagubei: Luagu günringua lumutiña lan Bungiu dandu gaduruntiña keisi maduruntiña.23Ánhaña óunwegua gürigia maduruntiña lidan aban lamiselu, éherahati Bungiu lau hadiheri.24Ígira lumuti Bungiu ubóu háhaburugu wuribatiña, güragualei hagu aguseragüdütiña. Ánheinti mama lubéi Bungiu adügübalin, kati adügübalin?25Éibaagueina liña nuéyuri marihinga ugundani.26Ítara liña lidin kei burí waporu óufutu, kei ágila to áhamarutu lárigi tíliru.27Ánhana áfaagua nabulieiduni násügürün, lun nafamurun kamá gúndaatina,28ábaya lalouchagüdünina sun nigarigu, ladüga subudi numuti luagu manügün lánina Bungiu keisi madurunti.29Ánheinti ariha lubalina keisi gadurunti, málati níchuguni sun nere.30Íbini nachibuni núhabu lau sabun, chalaguanéime lidan duna le harumatimabei,31labuluchagüdübadina Bungiu lidan baribarabu, íbinime nadaüragun háhüneboun nun.32Siñati nagagibudagun luma Bungiu kei luma amu gürigia, ni lun nariñagun lun lun woudin ligibugiñoun lúrudu.33Buiti hamuga ñein lan aban aguseragüdüti wadan le gabafuti wawagu biángubei,34le hamuga erederuti Bungiu luéi lasigirun abeichana luma abuinchagüdana lau anufudei!35Nadimurehaña hamugati manufudeuga luéi, lugundun mafiñentina anhein charaadina lubéi lun.
Bible Society of Honduras