Isaíasi9
Lurúeite darangilaü
1Furumiñe ǘnabugüda lumuti meha Wabungiute Galiléa le lumúan Nefütalí luma Sabulón fulasu le yarafabei houn gibe tubungiutegu, le lúmagiñebei loubafurugu Hordán darí laru barana; gama lumoun lárigiñe aba líchugun saragu uéiriguni lun.2Gürigia ha meha lídanbaña luburiga, arihatiña aban óunwenbu larugounga; harugoungaali houn ha meha aganóubaña lidan lamuñounga le lánina óunweni.3Wabureme, barühadibu aban óunwenbu ugundani; wéiriti ugundani le. Gúndaatiña sun gürigia bigibugiñe kei lidan lidaani alubahani, kei hagundaarun ha afanreinhabaña óunwenbu irisini hádangua.4Lugundun günringuabá amudirawaguni le meha gádanbaliña lílana fulasu, lidere dan le meha adiheridagüdübaliña, lanarime meha lidere gumadi le gábugiñebaliña. Ítara liña kei dan le bagünrinchagunbalin Madián.5Hageidin súdaragu to meha gamuriboun tuma daüguaü to dáseiboun lau hitaü, tagudúba, lagumuchaguagüdüboun watu gemeti.6Ladüga águrahouaali aban irahü, rúhali Wabungiute aban isaani woun le unbei lichugúa ubafu lun lagumadihan. Anihánba burí iri le liri: Garíawaseti, Bungiu Gabafuti, Úguchili Magumuchaditi, Lurúeite Darangilaü.7Lañuuruba luagu lálana larúeihan Dawidi; lachawaraguba lubafu le lánina larúeihan lidoun sun fulasu ani magumuchadibei darangilaü; lárügüdüba larúeihan buidu buidu, irichaüba lugudina larúeihan, lúmagiñe guentó lun súnwandan. Lanarime línsiñehabu Suntigabafu, ligíaba adügei katei le.Ligañi Wabureme luma Ísüraeli
8Óunahaali Wabureme aban uganu lun Ísüraeli, houn lánigu Hakobu;9Gunfuranda hamaali sun lánigu Éfürain ha aganóubaña Samaria, ariñagatiña lau pantaü luma anaaguni unguaü:10«Heigua ladiríyu gama lumoun wábunaguba lau dübü. Chaün hamá índanu le lauti fulansu le igu gama lumoun wíchuguba le hibúari leweñegua».11Óunahaali Wabureme hanarime burí áganiñu; ligía guánarügü ariñagubei houn lun hageindagun.12Síriana luéigiñe oubaü le ñéingiñe lubéi laboucha weyu, Filistéana luéigiñe oubaü le ñeinhin lubéi lálüda. Láurügü aban háwagachun, hulú hamuti Ísüraeli. Ani lau sun lira, magalumarúngili ligañi Wabureme; anihamémegua ayawadagua.13Gama lumoun magiribudúntiña lílana fulasu lun Wabungiute le abeichubaliña; máluahan hamuti Wabureme Suntigabafu.14Ábati lóuseruni Wabureme larúeihan Ísüraeli kei íbuguti lichügü aban animaalu luma lili, kei táchuahoun yaraüwa úara luma maburu. Sun le lidan ábanrügü weyu!15(Ábulugu, hagía wéiyaaña baña mutu hama ábutigu, ili, hagía profetagubaña ha arufudahabaña iyeeni.)16Yuriguagüda hamaaña ábutigu lílana fulasu ha, hati áluahabaña aban adundehati aba heferidiragun.17Ligía magudemedun habéi nibureingiña lun Wabureme, ni méteñuhaña, ni hilaguaaña úmarigu. Lugundun wuribatiña sun lílana fulasu, bóugudin luéi irichaü hadimureha ani lau sun lira magalumarúngili ligañi Wabureme; anihamémegua ayawadagua.18Ígirati wuribani günringuaü kei aban gudáü le agumuchaguagüdüti hiiyu-agei luma áraabu lárigiñe aba lágudunu burí tídibu wewe to dabíararuguboun, aba lachüürünu garabalirugun labadinagua gumuleli.19Ladüga ligañi Wabureme Suntigabafu lágudunbei fulasu, lagumuchuña watu hau lílana fulasu; hou hamuti hágürügü hasaanigu guánarügü, ani magudementiña hábirigu houn. Anihein aban ya áhuluhati gama lumoun lamamémeti, anihein aban yágüta houti gama lumoun makimuledunti.21Günringua lumuti Manasési Éfürain, günringualéi Éfürain Manasési, ani biángubei hagía ábürühatiña luagun Hudá. Ani lau sun lira, magalumarúngili ligañi Wabureme, anihamémegua ayawadagua.Bible Society of Honduras