Isaíasi8
Mini lan liri liráü Isaíasi
1Lariñaga Wabureme nun:—Barüba aban fulansu wéiriti, ábame babürüdün luagu lau abürühani le furanguti “Maerü-salalü-asübasi”.2Ábame banügüniña fádiri Uríasi luma Sakaríasi le liráü Heberekíasi keisi gefentiña ha afiñewati hawagu.3Lárigiñe aba narounrun tuma númari to profetisa, aba tadageinadun, aba tagaraüdün aban wügüri irahü. Ábati lariñagun Wabureme nun:
—Rubei Maerü-salalü-asübasi lírime.4Ladüga lubaragiñeme gayara lan lariñagun irahü ligía “núguchi” luma “núguchu” Lasagarahóuba Damasüku luma Samaria, ábame lanügǘn lirisin lun lurúeite Asiria.5Ábaya lariñagun Wabureme nun:6“Kei ladüga lubéi hanufude gürigia ha luéi Resín luma luéi liráü Remalíasi hamahara lun lidunari Siloé, le éibaagubei hámaru.7Ladibiraguagüdübaña Wabureme lau lanarime lere léibaagun duna le Éufüratesi (mini lan lira, lurúeite Asiria lau sun lubafu). Láwiyuhaba lídangiñe sun lichanilin luma luéigiñe sun louba,8lachülürüba chülǘ Hudá ábame labuluchagüdüni, lachülürüba chülǘ luagu ligiina. Ítara luba Emanuéli kei aban dunuru lau larüna tuleñu le lunbei ladouragun lau sun bumúan”.9Óundaragua humá, néchanigu, buin humá lau anufudei; aganba huméi katei le sun burí ageiraü le dísebei: Íbini hárügüdünu hárumate, hanufudebadün.10Aranseha huméi haritagun, lau sun lira masalibei; ariñaga huméi haritagun, gama lumoun manügünbei fulasu, lugundun anihein Wabungiute wama.
Luéi lan Aburemei lanufudedúa
11Ragǘ lumutina Wabureme here lau lúhabu, aba lariñagun nun lun mafala nani hémeri gürigia ha. Lariñaga nun:12—Mariñaga humá luagu eledeguni, eledeguni ítara kei hariñaguni gürigia ha. Maloucha humá, manufude huguyame luagu sun le ueibei hanufudeda.13Wabureme Suntigabafu, ligía lunbei lanügǘn kei sánduti; ligía lunbei inebewa lan; lunti hanufudewa lan ligibugiñe.14Ligía, ítara luba hun kei aban sádara; ligíaba dübü le uágubei hachugeraguba lan, le lunbei lábürügüdüni bián larúeihan Ísüraeli; ítara luba kei aban sádara to lunboun hábürühan lílana Herusalén tidoun.15Saragubaña ábürühatiña ábame hóunwegun; saragubaña ábürühatiña tidoun sádara, ábame tárügüdüniña.Ladimurehan Isaíasi houn lánigu
16Areida huméi uganu le buidu; aramuda huméi arufudahani burí le, le níchugubei hun.17Lau sun laramudagun Wabureme hawéi lumutuniña Hakobu, hemenigitina luagu. Luagu níchigei nemenigin.18Au hama isaanigu ha líchugubaña Wabureme nun, seini lauti milaguru wagía lun Ísüraeli, líchugun Wabureme Suntigabafu le aganóubei luagu wübü Sión.19Chóuruti luagu hariñaguba lan gürigia hun: «Hálügüdaha luma hani hilaguaaña sífiri luma hama garíaahatiña ha, ha adimurehabaña hámaru. Ma funagia lunti hálügüdahan lílana fulasu hama habungiutegu, luma lun hamuriahan dimurei hama hilaaña habügürü wínwangiña20lun heresibirun arufudahani o aban lan uganu?» Hadimurehaba ítara, gama lumoun libidiounigan aau le hariñagubei.21Hóudiba gürigia lídangiñe aban fulasu lidoun amu lau súfuri luma lau ilamaü ábameti hagañidun ladüga halama. Híñaragubei harúeite hama habungiutegu. Harihuba iñun,22lárigiñe ábame harihin ǘnabun, madaribaña amu katei luéidigia gudemei, luburiga luma súfuri. Ladouraguba áriebu lau sun katei. Ani le lábugiñebei lidere dan, siñabei lesefurun.Bible Society of Honduras