Isaíasi10
1Fugiabugu huguya le íchugubei lúrudu le marichati, sagá huguya gumadi le mawandúaditi,2huguya le míchugunbalin haricha ha débilibaña houn, maha huguya lun haricha nánigu ha gudemebaña, huguya le átubalin hata würiña hilaguaaña úmari, íweruha huguya hawéi méteñuhaña.3Kábagia hadüga danme lachülürün weyu lun hálügüdawagun, danme harihini liabin abeichúni dísegiñe? Kábagia uma hamuriaha ídemuei? Halíabagia hígirei burí hirisin?4Anhaün mǘnabudawagüdün, barüwa huguyame adaürǘwa, hábürühaba kei ha óunwegubaña áfarawaguarügü. Ani lau sun lira, magalumarúngili ligañi Wabureme, anihamémegua ayawadagua.
Lanúadiruni Wabungiute lurúeite Asiria lun labeihagüleme
5«Lurúeite Asiria! Ligía wewe le nayusurubei lun nabeihan, ligía wewe le nayusurubei dan le nagañidun.6Óunaha numuti ageindagua hama lílana aban fulasu ha wuribatiña, hama néchanigu ha anabagutina, lun líweruhan hawéi, gidaléime harisin, lun ladügüraguniña kei gubegubeti ǘmadarugu.7Gama lumoun masaminarunti lurúeite Asiria ítara, ani mama giñe ligía le laritagubei ladügün. Laritagun lúnrügü lagünrinchagun luma lun lagumuchun hau saragu néchanigu.8Lariñahare: “Sun urúeigu ábutigu lábugiñe nererehan.9Aban labu uburugu Kalünó nun kei Karükémisi, aban labu Amatü kei Arüpádü, aban labu Samaria luma Damasüku.10Dúnguaadina hama néchanigu ha gibe tubungiutegu, ha gibe tiguariuan sügǘ lau Herusalén luma Samaria.11Le nadügübei lun Samaria luma houn lubungiutegu, siñabei funagia nadügüni lun Herusalén hau liguariuan?” »12Danme adüga laali Bungiu sun le lunbei ladügüni luagu luwübüri Sión luma Herusalén, labeichubei Wabureme lurúeite Asiria ladüga lupantan luma lanaagun lungua.13Ariñagaali lurúeite Asiria: «Lau nere nadügei; huáliti nichügü, au aransehabei lun ítara luba lan. Sansi naali láfadaragun burí néchani barǘ naali burí lirisin nánime, ani huchú naaña urúeigu kei aban le ganigiti.14Ru naali núhabu luagu lirisin burí fulasu, ragǘ naali sun fulasu ítara kei hanügǘn gañé lídangiñe aban umasaü, úouga kaba lan ánhingichei larüna ni kaba lan áwagacha ayahua».15Gayaraati funagia tanaagun harawa tungua wéirigu sügǘ lau le ahandilihabarun? Odi siyara sügǘ lau le íbaahabei lau? Kéigubeirügü hamuga badun, le mámabei amu katei luéidigia aban wewe, Gayaraabei funagia lánhingichuni gürigia le laubei?16Ligía lígirubaña lubéi Wabureme Suntigabafu ha dídeiburibaña méreuga, ábame lásüdagüdüni hágubu lau abiruaü.17Wabungiute le sándubei, le lilanpun Ísüraeli, lasaliraguba watu gemetime, ábame láguduni sun hiiyu luma dabíara le fulasurugubei lidan aban weyu.18Lagünrinchagubei luenden burí dabíara luma fuluri-agei sunsuinagubei. Lígirubei kei aban sánditi le méreeli.19Míbebei lídibu wewe erederuti dabíararugu, darime lun gayara lan labahüdüni aban irahü.20Lídanme dan ligía, fiuraü hame erederubaña hádangiñe lánigu Ísüraeli, hame esefurubaña hádangiñe lánigu Hakobu, márügüdündigiaañame luagu le agünrinchagubaliña, luéigiñeba Wabungiute le Sándubei le Lubungiute Ísüraeli hárügüda.21Fiu hádangiñe lánigu Hakobu, hagarabaaguba lumoun Wabungiute le meferidiradibei.22Ísüraeli, lau sun gibe hamá bánigu kei lagu sagoun le lárubei beya, fiúrügübaña agiribuda, aranseli günringuaü, ani ladügǘba irichaü le gumuti.23Ladüga ru laali Wabureme Suntigabafu laritagunrugun lun ladügǘn günringuaü, ani ladügübei lidan sun fulasu.24Lariñahare Wabureme Suntigabafu: «Numutuniña ha aganóubaña Sión, manufudeda humá hawéi Asiriana, íbini hagayuahan huagu lau hawewen, iñura hameime habadun huagun kei meha hadüga Ehiptuna.25Ladüga málühali anhein ábürüha abeichúni hawagun, ábame lagünrinchaguniña nigañi.26Labeichubaña Wabureme Suntigabafu kei dan le láfaraguniña Madianna luagu lidübüri Orebü, ábame larufuduni lubafu luagu Asiria kei dan le larufudunbalin luagu Ehiptu.27Lídanme weyu ligía, lagidarúba ihürügu le híchugubei banagawagu, halagua ligíame ihürügu le híchugubei bégewagu». Hawanserun Asiriana Luéigiñeba Rimón liabin ágani,28chülüha Ayatün, sügüha Migüróngiñe, ígirala lanügün Mikümási,29hiñugualá lémeri ébeini héreti, tulela likianpun uburugu Geba; buinha Ramá lau anufudei, anurahouga Gibeana, ha luburuguteruguna urúei Saulu.30Bagúaraha, Batü-galimü! Aganbabáña, Laisa! Óunababa Anatótu!31Anuraha Madümená, aramudaguouga lílana Gebimü.32Lerederaguba híweruti uguñe Nobu; líchigei seini lun lábürühoun luagun wübü Sión, le luwübüri Herusalén.33Águha lumuti Wabureme Suntigabafu tídibu wewe lau lanarime lere; Cháünwati le burí íñutimabei, ábürühati múarugun.34Fui lumuti liduru-agei dabíara tau aban harawa, ábürühati tídibu wewe le buíduburitimabei Líwanurugu.Bible Society of Honduras