Isaíasi7
Furumiñeti uganu líchugun Isaíasi lun Aasi
1Dan meha le Aasi lan le liráü Hotamü, libari Usíasi urúeibei Hudá aba liabin Resín le lurúeite Siria luma Peka le liráü Remalíasi lurúeite Ísüraeli, aba hábürühan luagun Herusalén lun yebe hárügüdüni, gama lumoun siñá hamuti.2Aba hanügüni uganu le lun urúei Asi luma houn liduheñu, hariñaga houn: «Adügaaña Síriana umadaguaü hama ladügawagun Éfürain». Aba lagumeserun urúei hama lílana fulasu adadagara ítara kei ladadagarun burí tídibu wewe dabíararugu dan le láfurun garabali.3Ábati lariñagun Wabureme lun Isaíasi:—Barübei Searü-yasubu le biráü, beiba adunragua luma urúei Aasi lígirugu chanili le wéiritimabei, luagu üma le luágunbei tachibaguagüle gamisa,4bariñagame lun:
“Góunigiba gama lumoun malouchabá manufudedabá madüraagun buguyame luéi bián leñegura watu agumulahati le. Resín le, hau lánigu Síriana, luma liráü Remalíasi ha águdubaña lau igañi.5Beluhaña Síriana hama lánigu Éfürain luma liráü Remalíasi lidoun daradu lun hadügün wuribani bun. Ariñagaaña:6Ábürüha wamá luagun Hudá, da wamá anufudei lidoun; ragǘ waméi, wíchigeime liráü Taweli urúeime.7Gama lumoun lariñahare Wabureme: Masuseredunbei lira!8Damasüku luburugutebei arúeihani Siria, ani Resín lurúeitebei Damasüku. Samaria luburugutebei arúeihani Éfürain, ani liráü Remalíasi lurúeitebei Samaria; gama lumoun yáagiñe lumoun ǘrüwa-wein-seingü irumu, mámaalime néchani Éfürain; ani huguya anhein mederebugu lubéi hafiñen, meredebadün giñe rara”.
Emanuéli, Bungiu wama
10Ariñagati giñe Wabureme lun Aasi:11—Amuriahabá luma Aburemei le Bubungiute lun ladügün aban milaguru lun leseriwidun bun kei seini, ǘnabu yebe lidan lilulin-agei o iñu lan lidan liñun-agei.12Lariñaga Aasi lun:—Uá, móuchagun nubéi Wabureme amuriaha seini luma.13Ábati lariñagun Isaíasi:
«Aganba humana huguya le tílana lúbaana larúeihan Dawidi. Ni kata san larihín hun hañawarihan houn gürigia, habusenrubei giñe hañawarihan lun Nubungiute?14Líchugubati Wabureme guánarügü aban seini hun: Tadageinaduba aban würi nibureingiru, ábame tagaraüdün aban wügüri irahü, ábame tíchugun Emanuéli luagu.15Lidan burime furumiñeti irumu lau irahü, léigiba burí furumasu luma sírudu.16Gama lumoun lubaragiñeme lachuurun lau irahü ligía, lerederuba hageira bián urúeigu ha uéibaña banufudeda málouga.17Lóunahaba Wabureme súfuri buagun, hawagun lílana bageira luma hawagun biduheñu ñeinbei anufudei kei le úagilibei lúmagiñe lafanreinragun Éfürain luéi Hudá». Liábinba lurúeite Asiria hau lisudaranigu.18Lídanme dan ligía, ladügüba Wabureme lun hayabin ha aganóubaña lígirugu Nilu le lidunari Ehiptu kei werewere, ñübuin hagíame ha aganóubaña Asiria kei maba.19Sun hagía hayabinba adüga hábiñe lidan burí fulasu wayati le hilumati, luma burí lidan lagadábugiñe dübü, lidan sun búbugati le gímiramirati luma burí lidan fulasu le ñein lubéi hata bágasu duna.20Lídanme weyu ligía, layusurubei Wabureme lurúeite Asiria keisi gusiñu akilahóutu yagürounmeme luéi duna Éufüratesi, ábame lásaraguni hádiburi Ísüraelina, hádiuma luma liyu hagudi.21Lídanme dan ligía, le agüriahati aban bágasu hama bián mudún22ñeinbei saragu míligi luma, darime lun gayara lan leigin furumasu. Ani sun ha esefurutiña lídangiñe lagünrinchawagun fulasu, gayaraabei heigin furumasu luma sírudu.23Lídanme dan ligía, leme fulasu le ñein lubéi beibei-agei lau milu lídibu beibei ani milu murusun seinsu pülata lebegi, lerederuba hiiyu-ágeime luma búbugati-ágeime.24Táurügüba gimara gayara lan lebelurún ñeinhin éibaaha, ladüga sun fulasu ligía, lerederuba hiiyu-ágeime luma búbugati-ágeime.25Luagu burí wübü le meha ñein lubéi láhuruhoua tau hu, ñeinbei saragu hiiyu luma búbugati darime lun siñá lan lidin ni aban ñein. Lúnrügüba héigini bágasu hama mudún leseriwida.
Bible Society of Honduras