Isaíasi6
Laguarún lun Isaíasi
1Lidan irumu le lóunwegülebei urúei Usíasi, aba narihini Wabureme ñun luagu aban lala urúei íñuti; buintu ténpulu lau taru lumandan.2Ñéinñanu fiu kátaña kamá láutiña watu gemeti lóugiñe. Sísiñein larüna kada aban hádangiñe, lau bián arünaü hadouragua lau hagibu, lau biama hadouragua lau ǘnabu libiti hágubu, lau le líbiri biama háhamaha.3Aba burí hariñagun hámagua:«Sandu, sandu, sánduti Wabureme Suntigabafu; buin liña sun ubóu lau luéirigun».4Dan le laganbúnbei umalali ligía, aba ladadagarunga tubenari ténpulu, aba tabuinchun ténpulu lau gumuleli.5Aba nariñagun núnguarügü:
—Fugiabu au, nounwe! Ariha naali Urúei Wabureme Suntigabafu lau nagu; au, aban wügüri le wíyeti niyuma, ani hadan gürigia wiye tiyuma naganawa.6Lidan dan ligía, aba láhamarun aban hádangiñe kátaña hagía ha ítarabaña kei watu gemeti, aba liabin nuagun. Ñeinñein aban leñegura watu luma ragüñuléi tau aban tenasa, leñegura watu ligía luéigiñe latarü lanügei,7aba laguuruni niyuma lau leñegura watu ligía, aba lariñagun nun:
«Dagaali leñegura watu le luagu biyuma. Gidawaali buriban, ferudunawaali bifigoun»8Ábati naganbuni lariñagun lumalali Wabureme: «Kaba san nóunaha? Kaba ñüdün lau uganu?»
Aba nóunabun: «Anahán, óunahabana».9Aba lariñagun nun: «Beiba, bariñagame houn lílana fulasu le: “Íbini híchugun harigei lun haganbun, úabei gunfuranda humá. Íbini híchaagun hungua lun harihin, mafurendeirúnbadün”.10Ibidiouguagüdabá lau hasaminan gürigia ha; darubei harigeirugu luma hagu maganbun hamaamuga, marihin hagíame ua ligíame gunfuranda hamá, miabin hamaamuga nun lun nareidaguagüdüniña».11Aba nálügüdüni, nariñaga lun: «Átiribeigia dan ladurarun katei le, Nabureme?»
Lariñaga nun: «Darime günringuaali sun burí uburugu ua ligíame ni aban aganóuti ñein; darime terederun burí muna málouga, mabei ligíame múa,12darime láfuridagüdüniña Wabureme gürigia keisi adaürǘtiña lidoun amu fulasu, redei ligíame ageiraü málouga sunsuinagubei.13Íbini ánhaña eredera aban hádangiñe kada diisi lílana fulasu, hagünrinchawaguba giñe, ítara kei dan le lachugún aban tídibu wewe to róbüle o aban lan ensina, ugudinaürügüñein eredera». (Gama lumoun láhüchaguba ugudinaü ligía, ani sándubei.)
Bible Society of Honduras