Isaíasi32
Arúeihani le richati
1Anihein aban urúei le lunbei larúeihan lau ísuruni hama gumadimatiña ha lúnbaña hagumadihan lau irichaü.2Ítara luba kada aban hádangiñe kei aramudaguagülei luéi garabali luma luéi luriban dan, kei lísensen duna lidan múa mábeiti, kei lamuñadina aban óunwenbu dübü lidan fulasu mageirawati.3Fegeñu luba hagu buidu buidu, ani aranseñu haba lun haganbun;4Móufudahanbaña adüga aban katei, hadügübei lau lichú aau, ariñaga hameime katei lau lufurangun.5Mariñagunbaña gürigia lun le wuribabei buiti, manügün hameime le wíyebei igaburi kei gürigia wéiriguti.6Lugundun le wuribabei igaburi, kei wuriba tigaburi ladimureha, lagübüri aritaguni laritagunrugubei; áluahati láfarahan, adimurehati iyeeni luagu Wabureme; méigagüdün lumuti le lamabei, mátagüdünlei le mágürabubei.7Le wíyebei adaaguati iwiyei; añawariha lumutiña gudemetiña lau liyeeni, hama mégeihabutiña ha amuriahabaña irichaü.8Ánheinti le harumabei, harumati laritagun, ani deregüdagu liña lidan laruman aritaguni ligía.Ñunsu houn würiña Herusalénna
9Huguya würiña ha meberesenbaña lau ni kata, aganba huméi le lunbei nariñaguni hun. Würiña hemenigitiña, aganba huméi nererun.10Hemenigitün guentó, gama lumoun aban irumu átiriraüya lárigiñe le, hanufudedaguba, lugundun lagumuchuba alubahani, mabudahanhaadünme beibei.11Huguya le meberesenbei lau ni kata, hadadagara; huguya le sandiguabei hungua lau emenigini, hingi humá, ragá humoun daüguaü to huáriua, daü humá daüguaü súsutu arufudei higarigu.12Arufuda huméi higarigu luagu burí ichari luma beibei-agei hilumati.13Láhüchüba hiiyu hamúanrugu nánigu. Hayahuaha luagu uburugu le lánina ugundani, luma burí tuagu muna to buinboun hau gürigia gúndaatiña.14Terederuba luban urúei luma uburugu le meha gíbebaña gürigia ñein málouga; lerederuba uburugu baríeiruati málouga lun súnwandan; haganóuba burigü áraabuna ñein, hou hagíame bágasu sagadi ñein.15Gama lumoun liábiyaba lubafu Bungiu wawagun íñugiñe, ábame liabin fulasu mageirawati lun múame lánina tábunawagun nadü ani larandaratimaba múa le ñein lumuti nadü.16Larúeihaba úarani luma irichaü tidan sun muna fulasurugu.17Lanügüba irichaü, darangilaü luma emenigini lun súnwandan.18Haganóuba numutuniña lidan aban fulasu gálumati, tidan burí rumu chóurutu, tidan burí muna darangilatu,19íbini anhein achugúa sun dabíara, ǘnabugüdawa uburugu.20Huguya habagariduba gúndaañu, lau duna buídurügüti lun hichari luma éigini chóuruti lun burigü luma lun bulu bágasu.Bible Society of Honduras