Isaíasi33
Asufuriruni luma esefuruni
1Fugiabu buguya le agünrinchagubei ani magünrinchawaguntibu! Agarabahati le magarabaawagunti luagun! Danme lásurun bagünrinchagun, bagünrinchawaguba, danme lásurun bagarabahan, lagarabawaguba giñe bun.2Wabureme, gudemehabubá woun, wagía le hemenigibei buagu. Buagulá wabalacha sagü weyu, Wesefuragülebá lidan lénrengunga.3Éibaaguatiña gürigia dan haganbuni bumalali, dan le biñuragun bungua aba hachagaragun néchanigu;4aba hábürühan háganiñu hawagun kei chigangaru, aba hagidaruni harisin hawéi.5Íñuguti Wabureme lugundun sielu laganóua; buíngüda laali Sión lau úaraguni luma irichaü.6Ani líchuguba achoururuni lun súnwandan, lichú au luma subudi, aban irisini le esefuhati; aban irisini inebehabu lun Wabureme.7Aganbabéi hagúarahan ganigitiña ǘmadarugu luma hayahuahan ha ounahóubaña áluahei darangilaü!8Mala buriti üma úatiña éibugutiña luagu, dürüwaguati daradu; úati inebenehabúni ni ka un.9Lamuiseruña múa, híruti. Lásaürüña Líwanu lau busiganu, rédeiha lani Sarón fulasu wayati kei fulasu mageirawati, hiyá Basán luma wübü Karümélu.Ñunsu houn áganiñu
10Lariñahare Wabureme: «Nuadigimarida guentó; narufudaali sun nuéirigun.11Huguya, sun le haransehabei luma sun le hadügübei, ítara liña kei ifei; lagumuchaguagüdübadün náfurun kei lagumuchaguagüdün aban gudáü.12Lasaliraguba burí fulasu baligime; láguduba kei hiiyu cháünwaali lidan watu gemeti.13Ha dísebaña, aganba haméi le nadügübei, ha yarafabaña, subudi haméi nubafu».14Adadagaratiña gafigountiña Sión, ha salufuribaña buíntiña lau anufudei aba hariñagun: «Ka wádangiñe gayaraabei labagaridun lidan watu gemeti le gagünrinchaguaditi, lidan aban watu gemeti magumuchaditi?»15Le úaraguabei igaburi ariñagaléi inarüni, le marisidunbei lau erei, mígiraguagüdün ligía lungua lun lagañeihóun lau edewehani, le madügünbei gasu lau ínchahani lun áfarahani ani muruléi lagu luéi laríagun wuribani,16ligíaba abagarida chóuruñu, lídanbei aban baríeiru laramudaguagüle, géiginbei súnwandan ani memegeirúnbei duna lun.Emenigini houn lánigu Bungiu
17Barihayabei urúei lidan luéirigun; lachülürüba burí láfadaragun fulasu dise.18Danme baritagun luagun anufudei le meha gádanbalibu, bariñaguba: «Hagéi san le meha abahüdübalin liseinsuna fulasu? Hagéi le meha abahüdübalin wáyelesi? Hagéi le meha óunigiruñahabalin baríeiru?»19Maganóunhadibume haganagua gürigia salufuritiña, gürigia ha hénrengubei gunfurandawa lan hererun.20Arihabá lun Sión, luburugute wefeduhan; arihabá lun Herusalén, uburugu chóuruti; ítara luba kei aban kianpu-agei derebugutu, to mahulúnti tuenwena, mátumurun ligía tuguruduna.21Ñeinbei Wabureme wama lau luéirigun. Aban fulasu le ñein lumuti duna éibaaguati, le dabubereti, Herusalén, gama lumoun mebelubaña áganiñu ñeinhin tau burí tuéinamun hagune.22Siñá lumuti burí tugurudun ugunei tuguya birebu ágüdaha; siñati látuleragun bira. Wabayuruba saragu irisini hawéi áganiñu, darime lun libihini marihinti lufanran asagaraha hagíame méibuguntiña. Lugundun Wabureme wánibei aguseragüdüti, ligía íchugubei lúrudu woun, ligía warúeitebei, lesefurubadiwa.24Mariñagunbei ni aban lílana fulasu: «Sándiñadina». Ladüga feruduna lubéi Wabungiute hafigoun lílana Sión.Bible Society of Honduras