Esekiéli28
Ñunsu kóntüra urúei le Tírubei
1Aba lariñagun Aburemei nun:2—Liráü wügüri, ariñagabá lun lurúeite Tiru:«Lariñahare Aburemei: Buintu banigi lau pantaü, aba banaagun bungua kamá aban bungiu ñun luagu lálana harúeihan búngiugu, geyegu barana bau. Gama lumoun mama aban bungiu buguya, aban wügüri, le haritaguabei luagu anihein lan lichú lau aban bungiu lidan.3Chuti funagia bau sügǘ lau Daneli? Subuditi funagia sun katei le aramudaguabei bun?4Ibihaadibu saragu irisini lau lichú bau luma biyara, buíngüda baaru burí bubagüsin lau golu luma pülata.5Lau lueirin bubuidun lidan marasun gánwoungüda baali birisin, ani pántagüda láadibuti irisini.6Ligía lariñagunbei Aburemei: Kei haritagua bubéi luagu chu lan bau kei aban bungiu,7nadüga lun hayabin terencha buagun, ha hanarime-agei gürigia, ábame hasagarunu hefeinte lun hageindagun buma, buguya le wéndebei ani weiri lichú bau, ábame hígiruni buéirigun múarugu.8Habuluchagüdübadibu lidoun ilulini-agei, bóunweba lau aban óunweni hanarimeti ganalirugu.9Basigiramémeba san anaagua bungua kei aban bungiu danme hagibugiñe ban ha lúnbaña háfarunibu? Mámabadibu amu katei luéidigia aban furumiñeguarügü wügüri háhaburugu ha lúnbaña háfarunibu!10Bóunweba háhaburugu terencha kei hóunwegun gibe tubungiutegu. Au, le Aburemei ariñagubalin, ru naali nererun».
Uremu lánina ábunahani luagu lurúeite Tiru
11Aba lariñagun Aburemei nun:12«Liráü wügüri, beremuha aban uremu lánina ábunahani luagu lurúeite Tiru, bariñagame lun:“Anihán lariñagubei Aburemei: Aban meha hénpulu lánina le buídubei buguya, buin lau lichú aau, ani wende buguya meha le gumuti.13Lídanñadibu meha Edén le lufulurin-agei Bungiu, wéndeñu lau sun luwuyeri dübü gebegiti: Rubí, kürisólitu, hade, topasiu, kórunalina, hásüpe, safiru, güranate luma ésümeralüda. Lauti meha golu bumegen le lánina uéndeni tuma barigeila, aranserutu lúmagiñe weyu le badügǘnbei.14Ru numutibu lábugiñe laríaahan aban ánheli, luáguñadibu meha luwübüri Bungiu le sándubei, habadinagua meha waruguma béibuga.15Úati meha mégeiti luagu bóuserun lúmagiñe weyu le badügǘnbei darí lasaliragun wuribani bidan.16Lau liibe bumarasun aba babuinchun lau anarimeni luma figóu. Ábati nabugunibu niñúarürugugiñe; aba nabugunibu luéigiñe luwübüri Bungiu, aba lasagarunibu ánheli le buga búniri haganaguagiñe waruguma.17Buíngüda lumutibu buenden lau pantaü; féridigüda lumuti buéirigun lichú bau. Aba nágurunibu múarugun hagibugiñe urúeigu, aba níchugunibu lidoun busiganu lun harihin.18Gíbeti figóu badügün, wéiriti maricha lan bumarasun darí lun bafigouhan ténpulurugu. Ábati naduranguagüdün aban watu gemeti lun lágudunibu. Gayaraati harihinibu súngubei guentó múarugu, baligihadibu lan.19Sun néchanigu ha subudihabúbaña bun, hanufudeguatiña dan le harihinibu. Ábanhadibu katei hanufunati; gumuguaadibu lun sun dan!” »
Ñunsu kóntüra Sidón
20Aba ladimurehan Aburemei numa, lariñaga nun:21—Liráü wügüri, gararaguabá luagun Sidón, badimurehame lidan niri kóntüra ligía.22Bariñagame lun, lariñahare lan Aburemei:«Sidón, báganihadina; lichugúba uéiriguni nun bamidangua. Ani danme nadügüni le aubei nasiadirabu lun narufuduni luagu sandu nan, lasubudirúba luagu au lan Aburemeibei.23Nóunahaba sandi burí buagun, láwiyuhaba hitaü lidan burí bémeri; hábürühaba bílana óunwegua, háfarawaguba tau eféin lídangiñe sun oubaü. Ábameti lasubudirúniwa luagu au lan Aburemeibei».24«Masufurirundigia láalime Ísüraeli hiiyu gágiriti le gáribei, le lánina hayereehabu gürigia ha geyegubaña lau. Ábameti lasubudirúniwa luagu au lan Aburemeibei».25—Nariñahare au le Aburemei: «Nóundarubaña lumutuniña Ísüraeli hádangiñe néchanigu ha ñein habéi chagagu, ábame narufuduni luagu sandu nan hagibugiñe sun néchanigu. Laganóuba Ísüraeli lageira, lidan ageiraü le níchugubei lun Hakobu.26Haganóuba ñein chóuruñu, darangilu, hábunaguba haban, bunagua hagíame hanadüri beibei. Nadügübei le aubei nasiadiraña sun ha anügübalin Ísüraeli kei ni kata. Ábameti lasubudirúniwa luagu au lan Aburemeibei, le Lubungiute Ísüraeli».
Bible Society of Honduras