Esekiéli29
Ñunsu kóntüra Ehiptu
1Weyu duusu lidan diisi hati, lidan lidiisin irumu, aba ladimurehan Bungiu nun, lariñaga nun:2—Liráü wügüri, guentó, badimureha lun urúei Ehiptuna, badimurehame lidan niri kóntüra ligía luma sun Ehiptu.3Bariñagame lun:«Anihán lariñagubei Aburemei: Náganihadibu guentó, urúei Ehiptuna, buguya le óunwenbu animaalu roun lidan bidunari ani ariñagatibu: Nani duna le Nilu, au adügübalin.4Náfulachagubei biyuma lau günwi, ábame habadülerun úduraü ha lídanbaña bidunari buagu. Nadigibadibu bidunarirugugiñe hau sun úduraü ha badüleñubaña buagu.5Nágurubadibu lidoun fulasu mageirawati, úara hama sun úduraü ha bidunarirugubaña; bábürühaba lidan áraabu wásati, úabei abudutibu lun lábununibu. Nadügüba lun héiginibu animaalugu áraabuna hama dunuru.6Hasubudirubei sun lílana Ehiptu luagu au lan Aburemeibei. Álugati Ísüraeli labalachun buagun, gama lumoun ítara biña kei aban maburu:7Dan le hárügüdünbalibu háhaburugu, aba báhalachagun, aba bímiruni houba; dan le hálugunbei habalachun buagun, aba báhalachagun, aba héiguadun».8—Ligía nariñagunbei, au le Aburemei: «Ehiptu, nadügüba lun hageindagun buma tau eféin luma lun háfaraguniña buwügüriñanigu hama bibiñanigu.9Berederuba ábanme fulasu mageirawati, ábame hasubudiruni gürigia luagu au lan Aburemeibei. Ariñagatibu: Nani duna le Nilu, au adügübalin.10Guentó lubeiti, buguya lau sun bidunari, háganihadina. Nadügaadibu ábanme fulasu mageirawati hanufunati le mábeiti, lúmagiñe Migüdólu darí Asuán, dagá lumoun fadaguaü luma Etiopía.11Ni gürigia, ni animaalugu, másügürünbaña ñéingiñe. Lerederuba maganóunga ni aban ñein, luagu bián wein irumu.12Ehiptu, nadügübadibu ageiraüme létima málabei; lerederuba burí buburugute lidan günringuaü luagu bián-wein irumu, nasagarubaña bílana hageiragiñe, ábame nachagaraguniña haganaguóun híbiri néchanigu».13—Nariñahare au le Aburemei: «Lárigiñeme bián-wein irumu ligía, ábame nóundaraguniña Ehiptuna lídangiñe burí ageiraü le buga ñeinhin lubéi nachagaraguaña.14Nadügüba lun hagiribudun Ehiptuna ha buga anaawagúbaña hageiragiñe, lun haranseragun houngua luéigiñe suru libiti Ehiptu le hageira, ñeinba lubéi hadüga hábiñe, aban arúeihani le maweirigunti.15Ligíaba arúeihani le maweiriguntimabei lídangiñe súngubei, miñuragunhaalime lungua hóugiñe híbiri néchanigu; nañüraüdagüdübei saragu darí lun siñabei lan gabafu lan luagu burí amu ageiraü;16memenigidundigiaañame lánigu Ísüraeli luagu Ehiptu, ladüga larufudubei lira houn luagu bulíeigua hamá meha dan le hóudinbei áluaha híderawagun Ehiptu. Ábameti hasubudiruni luagu au lan Aburemeibei».17Weyu furumiñe lidan furumiñeti hati, lidan irumu wein-sedü, aba ladimurehan Aburemei numa, lariñaga nun:18—Liráü wügüri, óunaha laaña Nabukodonosoru le lurúeite Babilónia lisudaranigu luagun Tiru; darí lun leha lan hábulugu, dagá ligía guméi hégewagu, gama lumoun ni ligía, ni lisudaranigu, masagatiña katei buiti houngua lau houdin luagun Tiru.19Ligía nariñagunbei au le Aburemei: Nadügüba lun lárügüdüni Nabukodonosoru Ehiptu, lun lagidaruni lirisin luéi luma sun le lúmati; laume le líweruhabei luéi, leseriwiduba lun lun lafayeiruniña lisudaranigu.20Nadügüba lun lárügüdüni Nabukodonosoru Ehiptu lafayeiruahame luadigimari, lugundun nadagimeinhaali nun. Au le Aburemei ariñagubalin.21—Lídanme dan ligía, nadügüba lun laganwoundun here Ísüraelina, luma lun gayara lan badimurehan houn furangu, Esekiéli. Ábameti hasubudiruni luagu au lan Aburemeibei.
Bible Society of Honduras