Esekiéli27
Uremu lánina ábunahani lun Tiru
1Aba lariñagun Aburemei nun:2—Liráü wügüri, eremuhabei uremu lánina ábunahani le libügürü Tiru,3uburugu le luágubei lebelaagüle barana, le adaagubei marasun hama néchanigu, luma saragu ageiraü le baranahabei. Ariñagabá lun luagu lariñahare lan Aburemei:«Buguya Tiru, apantahatibu luagu aban ban ugunei to wéndetu sunsuinagubei;4chülüti bagumadihan darí tumoun lanigi barana, wéndeti hadügünibu ha adügübalibu.5Lau fulansu le gudi, le anügǘti luéigiñe wübü Senirü ladügǘwa burageirugu, lau hibúari Líwanuna ladügǘwa bibirebu;6lau tídibu wewe Basangiñeti ladügǘwa bufagayun; lauti gudi le anügǘti Chípüregiñe bidegün, lau marüfíli labadinagua.7Bibiran, tauti linu aborudahóuatu to Ehiptuna, seriwiti bun keisi fanidira; bidaüdina, tautu gamisa guchu tuma funatu, anügǘtu Elisagiñe.8Wügüriña subuditiña hagía meha abugurubalibu ánhañati ha énheunhabaña uburuguna Sidón luma Arüwadü.9Wügüriña wéiyaaña ha Gebalüna, sarafangeibaña. Adaaguatiña tumadulunigu sun ugunei to baranahaboun marasun lau bebegidina.10Súdaragu Pérüsiana, Lídiana hama Líwiana, eseriwidubaña keisi wuriburuguna hadan bisudaran; wéndegüda hamutibu lau burí hadaüdina luma habunidin lánina wuribu».11—Ñéinñanu gürigia Arüwadüna hama bisudaranigu geyegua lau bubarieirun, ñéinñanu wügüriña Gamadüna luagu buayelesin. Dibigüda hamuti burí hadaüdina luagu bubarieirun, aganwoundagüdei buenden.12Wéiriti bugaha birisin darí lun ladaagun Tárüsisi marasun buma, aba líchugun pülata, gürabu, esütáñu luma balu bun luagu bebegidina.13Adaaguati giñe Güresia, Tubali luma Mesekü marasun buma, hafayeirabu hau idamuni luma burí ílagu le lauti buronse.14Ha lílana Betü-togarüma, hau gabayu ha lánina wadagimanu hama ha lúntiña hagalufehoun hama mile hafayeirabu.15Adaaguatiña gürigia ha lílana Ródasi marasun buma. Adaaguatibu bugaha marasun luma saragu ubouhu, ha afayeirubalibu lau marüfíli luma lau ébanu.16Adügati bugaha Edomu marasun buma ladüga lueirin birisin. Leweñegua bebegidina, ibihatibu güranate, gamisa féindiwatu lau funati, gamisa aborudahóuatu, linu, korali luma rubí.17Adaaguati giñe Ísüraeli luma Hudá marasun buma, aba hafayeirunibu lau türigu Minitüna, sírudu, garaba luma bálüsamu.18Agañeihati bugaha Damasüku saragu katei búmagiñe; aba lafayeirunibu tau diwéin to Elibóunna luma lura mudún le Saárüna.19Barüwatiha diwéin bun Usaligiñe, gürabu aranserúaali, kanela luma maburu hémeti luagu bebegidina.20Adaaguati bugaha Dedán marasun buma lau hasadilin gabayu.21Arawia hama sun lábutigu Kedarü, adaaguatiña bugaha marasun buma: hafayeirabu hau mudún hama gábara.22Bánigu bugaha agañeihatiña ha lílana Sabá luma Ramá, hafayeirabu lau lubuidun-agei ibiñein, dübü gebegiti luma golu.23Adaaguti bugaha Arán marasun buma, Kane, Edén hama alugurahatiña ha lílana Sabá, Asiria luma Media;24haluguraha gamisa fínutu bun, manda funatu, gamisa aborudahóuatu, luenden touba muna to ámuñegueinarügü koloru luma gúrudu.25Ñǘbuintu burí ugunei Tárüsisina aban tárigi aban lau ilaü bun.
«Ítara biña bugaha kei aban ugunei ganalirugu, buin lau irisini.26Ha énheunhabalibu, barǘ hamutibu lidoun burí duna huliliti, gama lumoun aba lagünrinchagunibu suedi ganalirugu.27Bídiba guribinin lau sun birisin, bebegidina, bumadulunigu luma sun bumegen, heferidiruba súngubei wéyume babuluchun.28Ladadagaruba lugudi barana lau hagúarahan bumadulunigu.29Harariraguba énheunhatiña hagunerugugiñe; hachubaraguba mádulun hama abugurutiña múarugun.30Hiñurubei hamalali ayahuaha bárigi. Híchuguba kaliki hábulugu, abalabahóua hagíame lidan baligi.31Hásarubei hádiburi bárigi, hadaüraguba ludu, hayahuba lau igarigu.32Heremuhaba uremu lánina ábunahani bárigi, hariñagame lau íruni lidan uremu ligía: Ka meha ítarabei kei Tiru, uburugu le meha baranahabei?33Dan meha lachülürün bílagu baranahagiñe, gúndaaguagüda bumutiña saragu néchanigu. Rísigüda bumutiña bugaha saragu urúeigu lau bílagu luma liibe birisin.34Guentó günringua láadibu barana, abunhein buluñu guribini. Ñǘdüntiña sun bumadulunigu luma sun bumegegun buma guribinin.35Wéiritu hanigi sun lílana burí ubouhu bau; lóuñuhaña urúeigu, arihúati anufudei hagibuagu.36Lóutiña alugurahatiña ha lílana amu burí ageiraü dan le harihinibu. Ábanhadibu katei hanufunati; gumuguaadibu lun sun dan».
Bible Society of Honduras