Esekiéli23
Samaria tuma Herusalén biama ítunu gafigountiña
1Aba lariñagun Aburemei nun:2—Liráü wügüri, ñéinñanu bugaha bián würiña, tirahüñü aban úguchuru.3Lúmagiñe nibureingiña bián würiña ha, aba híchaagun houngua lun ahoruhani; ígiraguagüdatiña houngua lun laguruhóuniwa haniguagu ani aba heferidiruni hañǘn uburugu Ehiptu.4Aulá tíribei to íbugañaü (tomeme Samaria), Aulibá tiri tamulelua (tomeme Herusalén). Aba nanügüniña nánigume weiriou, aba hagaraüdagun nau.5Magunfuliruntu Aulá numa, aba hínsiñedun tubúaligu tun, ha wuriburuguna Asiriana,6tau hadaüragun funatu, sun hagía ábutigu hama gumadimatiña, nibureingiña magadiñetiña, wariñu hawagu halügüniña gabayu, ha habuidun-agei gabayu Asiriana!7Aba tíchaagun Aulá tungua lun tahoruhan hama, aba giñe hínsiñedun haguariuan tun, aba tǘnabudaguagüdün tungua áhuduragua houn.8Lúmagiñe uburugu tan Ehiptu; aba tagarabaagun lun ábanme horu, ani mígirun tumuti tahoruhan. Lúmagiñe meha nibureingiru, saragu haña agamaridutu ani aba hagidaruni tiñǘn, aba hadügünu ábanme horu.9Ligía nederegerunbarun háhaburugun tubúaligu ha Asiriana, ha ínsiñedubaña tun;10aba hagidaruni tibusigari; lárigiñe aba hagidaruniña tirahüñü tuéi, aba háfarunu tau eféin, lau lira hagunfulirei siadi le ábürühabei tuagun. Aba laganbahoun luagu tikesin hadan würiña.11—Ariha tumuti Aulibá to tamulelua katei le, gama lumoun lau sun lira ábatima tederegeragun tungua lun ahoruhani sügǘ tau tíbugaña.12Aba giñe hínsiñedun Asiriana tun, sun hagía ábutigu hama gumadimatiña, wuriburuguna wéndetiña, wariñu hawagu halügüniña gabayu, nibureintiña magadiñetiña.13Aba narihin luagu dáseiharu lan giñe, ani falá taali lan tani tíbugaña hénpulu.14Gama lumoun hanarimetimati tahoruhan: arihatu hayawa Babilóniana luagu burí touba muna, iyawaü burí to féindiwatu lau funati; sun hagía haganóun kamá úfisigu, según larihín habelitin luma habunidin.16Dan tarihinbaliña Babilóniana, aba hínsiñedun tun aba tóunahan hawagu;17aba hayabin Babilóniana, aba harounrun tuma, aba hagamaridunu adaseiroun lau tahoruhan. Dasei hamutu saragu darí lun táhünedun houn.18Ábati tederegeragun tungua lun tahoruhan hama furumiñeguarügü, arufudagua tungua surusu darí lun náhünedun tun, kei buga náhünedun tun tíbugaña.19Gama lumoun ábatima tederegeragun tungua lun ahoruhani, aritagua luagu tidaani dan le meha nibureingiru dan le tahoruhanbei Ehiptu,20aba hínsiñedun tubúaligu ha Ehiptuna tun, ha ítarabaña kei burigü hama gabayu dan le hagamaridun aban würi.21Buguya Aulibá, haritaguatibu meha lau íruni luagun nibureinban, dan le meha hamulidahani Ehiptuna baniguagu.22Ligía nariñagunbei au le Aburemei: Nadügüba lun bagaganiruniña bubúaligu ha, ha únbaña báhüneda guentó. Nóunahabaña Babilóniana buagun,23hama Kalüdéana, Pekoduna, Soana hama Koana hama sun Asiriana; sun hagía, nibureintiña magadiñetiña, ábutigu hama gumadimatiña, úfisigu hama wuriburuguna; sun hagía, gürigia agalufehatiña gabayu.24Hayabinba buagun tau saragu karü hama súdaragu; hegeyedagubadibu lídangiñe sun oubaü tau hárumate, lau bunidi lauti gürabu luma idaüdinaü, níchuguba üma houn lun haguseragüdünibu, ábame haguseragüdünibu según halurudun.25Nóunahabei nigañi buagun, ábame hóuserunibu lau irofuni; híbugubei bígiri luma biángubei barigei, hame erederutiña wínwanñu, háfarawaguba tau eféin. Habayurubaña birahüñü buéi, ábame bábürühan lau lágudunibu watu.26Hagidaruboun badaüragun buéi; barǘ hameime bílagu lauti golu.27Ítara luba nagumuchaguagüdüni ahoruhani le unbei bíchaagua bungua Ehiptu, marihindigia báañame Ehiptuna, maritagun buguyame hawagun.28—Nariñahare au le Aburemei: “Nábürügüdübadibu labun habafu néchanigu ha iyereegubaña bun, ha únbaña báhüneda.29Hóuserubadibu lau iyereehabúni, hanügübei le bagañeirubei lau buadigimari buéi, hígirubadibu surusu sunsuinagubei; lerederuba búgubu furangu. Bumaricharagun luma bahoruhan30lébunabei le asuseredubei bun guentó, ladüga bederegeragun bungua ahoruha hama néchanigu ha, ǘnabudaguagüda buguya bungua áhuduragua houn haguariuan.31Falá bumuti le tadügübei bíbugaña; ligía nátagüdübei lubéi uniñeinméme le nátagüdübei tun, bun”.32«Nariñahare au le Aburemei: Bátuba lídangiñe weru le ídangiñebei tata bíbugaña, aban weru wéiriti, tuleti ani hulili, buin lau bula luma iyereehabúni,33buin lau günringuaü luma lamiselu. Ligía tuerunbei Samaria to bíbugaña, le lunbei babacharuadun lau, gagarigu buguyame.34Bátubei sun lila, lárigiñe ábame babouchaguni, ábame baheiridaguni baniguagu. Au, le Aburemei ariñagubalin; ru naali nererun».35—Ligía nariñagunbei au le Aburemei: “Kei bulíei báadina lubéi, ru bei banagan nuagun, basufurirubei abeichúni luagu bahoruhan”.36Aba lariñagun Aburemei nun:—Liráü wügüri, busentibu san basiadirunu Aulá tuma Aulibá? Adimurehabá houn hagibuagun luagu lagübüri housan.37Magunfuliruntiña numa dáseiñu liña háhabu lau hitaü. Magunfuliruntiña numa ladüga háhuduragun houn haguariuan, águdaha hamaña harahüñü houn, harahüñü ha hagaraüdübaña nau.38Anihein giñe ábanya katei hadüga nun: Lídanmeme aban weyu, wíyegüda hamutu nitenpulun luma luéyuri emeraaguni.39Lememe weyu le hágudahanbaliña harahüñü houn haguariuan, aba hayabin tidoun nitenpulun, aba hawiyedagüdünu. Ligía hadügübei núbiñe guánarügü!40—Óunahatiña anüga wügüriña dísegiñe, aba hayabin. Biángubei hagía aba hagoun, aba hefeindihani hagu aba hadaüragun uéndeni lauti golu lun heresibiruniña;41aba hañuurun tuagu aban gabana wéndetu lau dábula seriwiwaali, aba híchuguni kupali luma garaba le anúadirawaalibei lun leseriwidúniwa nun.42Aganbúati hareinchun saragu gürigia efeduhatiña; wügüriña ha ñǘbuintiña lídangiñe fulasu mageirawati, ha ewendedagüdübaliña würiña lau hadaürün bángüli luagu harüna luma ridi buíduburiti hábulugu.43Aba nariñagun núnguarügü: “Guentó, hagamaridaaña hórugu ha, ha wésihañabaña lárigi agabarahani.44Hayabin tumoun Aulá tuma Aulibá bián würiña mañuuragúntiña.45Gama lumoun hasiadirubaña wügüriña richaguatiña ligibugiñe Bungiu, siadi le hadünabei gagabarahatiña hama gáfarahatiña. Lugundun gagabarahatiña ani dáseiñu liña háhabu lau hitaü”.46Anihán lariñagubei Aburemei:
—Óundaragua hamá gürigia kóntüra hagía, sandigüda hamaña anufudei, íweruha hameime hámati;47áfaragua hamaña sun gürigia lau dübü, fudugua hamañame tau hefeinte; áfaragua hamaña harahüñü, gudá hamounme haban.48Nagumuchaguagüdübei lagübüri igaburi le fulasurugugiñe. Ítara luba hafurendeiruni sun würiña arufudahani ábame mafala hamani luriban hani hénpulu.49Ánhañati bián ha, habeichúba luagu liwiye housan luma luagu hafigouhan eseriwida houn búngiugu. Huguyati, ábame hasubudiruni luagu au lan Aburemeibei.
Bible Society of Honduras