Esekiéli22
Wuribani le Herusalénbei
1Aba lariñagun Aburemei nun:2—Liráü wügüri, basiadiraali uburugu gáfarahati. Bíchuguba lidurun luagu sun luriban burí katei le ladügübei,3bariñagame lun: Anihán lariñagubei Aburemei: Buguya, uburugu le áfaragubaliña bumutuniña, adaagua buguya guáriuagu lun badaseiragun bungua hau, yarafaali bóurate!4Gadurunhadibu luagu áfarahani le badügübei, dáseihadibu hau guáriuagu ha badügübaña; adügaadibu lun layarafadun bóurate, luma lun lachülürün lagumuhóun bidaani. Nadügüba lubeiti lun hanabunibu gürigia, lun hadügün sun néchanigu bula bau.5Dandu ha yarafabaña keisi ha dísebaña, hadügüba bula bau, buguya le uburugu le aganbahóuabei uagu ladüga báhuduragun houn guáriuagu luma bachagaragun.6Añahein lani Ísüraeli gumadimatiña ñein, ha aganóubaña bidan, ha adügübalin sun luwuyeri áfarahani le hayaraati.7Gürigia ha aganóubaña bidan, minebentiña hagübürigu houn, óusera hamutiña terencha wuriba, gidá hamuti hámati gudemetiña hama würiña hilaguaaña úmari hawéi.8Minebenti nufulasun sánduti houn, ni luéyuri emeraaguni.9Ladüga hayeeni, saragu haña lílana fulasu gaduruntiña luagu hóunwegun amu, ñǘdüntiña lidan burí fedu le adügǘbei houn guáriuagu luagu burí wübü, adüga hagía burí katei le iyereehabúti.10Añahein hádangiñe gámari hamutu lúmari háguchi, añahein, agamaridutiña würiña ha láutiña hadaani.11Añahein, agabarahatiña hámari tuma lúmari gürigia háledi o gámari hamutu hádiñu, o aban lan hatu to liráü háguchi mama tiráü háguchu.12Añahein hádangiñe aluguraguatiña houngua lun háfarahan. Afuredeihatiña seinsu lun haguburahan lóugiñe le híchugubei, barǘ hamuti le lúmati gürigia háledi luéi, ani bulíei hamutina. Au, le Aburemei ariñagubalin.13—Wéiriti nigañi ladüga báfarahan luma wuribati le badügübei.14Maritaguabatia luagu gayaraabei lan bawandun danme naranserun lun nabeichunibu. Au, le Aburemei ariñagubalin ani nagunfulirubei:15Nachagaragubadibu hadoun sun néchanigu luma lidoun sun ageiraü, ábame narumadagüdünibu sunsuinagubei lídangiñe biwiye;16bígirubadina wuriba hagibugiñe híbiri néchanigu, gama lumoun bánharuba luagu au lan Aburemeibei.17Aba lariñagun Aburemei nun:18—Liráü wügüri, ítara haña lílana Ísüraeli nun, kei ígiraguti lídangiñe kóbüre, esütáñu, gürabu, balu o pülata dan le lichugún lidoun régigi.19Ligía nariñagunbei au, le Aburemei: Kei sun lan huguya ítara hiña kei ígiraguti le wuribaali, nóundaraguagüdübadün lamidangua Herusalén.20Ítara kei lichugún pülata, kóbüre, gürabu, balu luma esütáñu lidoun régigi, aba láfurawagun watu lun larürüdagun, ítara luba nadüga hun lidan nigañi, nóundarubadün, ábame narürüdaguagüdünün.21Náfuhabei lílemena nigañi, ábame nóundarunün lun narürüdaguagüdünün lamidangua uburugu.22Ítara kei larürüdawaguagüdün pülata régigirugu, ítara luba harürüdagun lamidangua uburugu, ítara luba hasubudiruni luagu au lan le Aburemei óunahabalin nigañi huagun.23Aba lariñagun Aburemei nun:24Liráü wügüri, ariñagabá houn lílana Ísüraeli: «Aban ageiraü huguya le abeichúbei lau lúan duna luma huya,25aban ageiraü hau gumadimatiña ha ítarabaña kei liñún, ha adürürühabaña günringua haméi háliru; ha éigibaña gürigia hamúanrugu, íweruha hamuti hálagu luma harisin, áfaragua hamaña hámarigu saragu würiña.26Sánsigua hamuti lufadirinigu ageiraü le lanichigu narufudahan, wíyeda haméi burí katei le nanügübei kei sagüráuti; aban labu hanügüni katei le harumabei kei le wíyebei, marufudahantiña houn amu katei lan harumabei luma katei lan wíyebei lun Bungiu. Metenitiña lun luéyuri emeraaguni, mineben au houn.27Ábutigu ha lídanbaña ageiraü le, ítara haña kei ounli áraabuna ha agünrinchagubalin háliru, aranseñu haña lun háwiyuragüdün hitaü luma lun háfarahan gürigia lun harisidun.28Aramuda hamuti profetagu inarüni, kei lefeindihoun touba muna lau haruti; ariñagatiña luagu gewenedü hamá, aba hapurichihan katei málati, le iyeeni. Ariñagatiña lau achoururuni luagu lidan lan niri hadimureha, ani hayeeni.29Rúguatiña lílana fulasu houngua lun anarimeni luma íweruni; nadagimeingüda hamutiña gudemetiña luagu ni kata, adügatiña marichaü houn terencha.30Áluahaadina hadan gürigia ha, aban le hamuga adügüti somu katei luagu lufulesein fulasu, luma lun lafurieidun nun lun magünrinchagun nániña, gama lumoun madari numuti.31Ligía nabeichunbaliña, günringuanaña lau lanarime nigañi, lun hóunabun luagu housan. Au le Aburemei ariñagubalin».Bible Society of Honduras