Esekiéli24
Liyawadi sóudieru
1Weyu diisi lidan lidiisin hati, lidan linefun irumu, aba lariñagun Aburemei nun:2—Liráü wügüri, bürübei weyu le uguñe, ladüga ábürühaali lurúeite Babilónia luagun Herusalén uguñe.3Ariñagabá aban poema houn gürigia mabuchahatiña ha, lun leseriwidun houn keisi hénpulu. Ariñagabá houn luéigiñe nóubadina:“Dagagüdabá aban sóudieru wáturugun, ábame béserun duna lidoun;4bíchigame úi añügürihóuaali lidoun, iyadaü, anagani luma lubuidun-agei abun.5Banügame aban hádangiñe habuidun-agei mudún, ábame bíchugun watu lábugiñe lun láhurahan buidu, darí léfedun abun.6Lugundun lariñahare Aburemei: Fugiabu uburugu gáfarahati! Ítara liña kei aban sóudieru gáhühali, le magidati ligahü. Badigeime úi aban aban darí lamaladun sóudieru.7Buin liña uburugu lau hitaü áwiyuruti, mama múarugu láwiyurua lun ladouragun sagoun lau, luagu dübü láwiyurua.8Nígirubei hitaü ligía ñein ligibuagu dübü, lun siñá lan ladourawagun lau, lun ladurangun nigañi lun ladügǘniwa irichaü.9Lugundun lariñahare Aburemei: Fugiabu uburugu le gáfarahadibei! Au guánarügü, nadügüba aban watu gemeti.10Buguyati, barüba ílemei, bebei watu, ábouguabei úi buidu, darí ladararun iraü, darí lágudun abun;11lárigiñe, ábame bíchuguni sóudieru málouga ligibuagu watu gemeti, darí láfunadun kóbüre, haruma ligíame lídangiñe liwiye; darí lagumuchagun ligahü!12Gama lumoun wéiriti ligahü darí lun siñá lan larumadun ni lau watu gemeti”.13—Herusalén, hóuchaadina narumadagüdünibu lídangiñe biwiye, gama lumoun marumaduntibu. Darime narariragüdüni nigañi buagun ligíaba barumadun.14Au, le Aburemei ariñagubalin ani ítara luba. Au guánarüba adügei, ani nagunfulirubei; magudemehabubadina, masakürihan aume. Nabeichubadibu luagu busan. Au, le Aburemei ariñagubalin.
Tounwen lúmari Esekiéli
15Aba lariñagun Aburemei nun:16—Liráü wügüri, nagidaraaru gürigia to hínsiñetimaboun bun buéi. Gama lumoun mayahuahabá.17Súfuriba maniñu, ani mamuiserabá kei lamuiserúniwa hárigi hilaaña. Méibugaba lau bichügü madaüga, méibugun buguyame mageidinga, madouraguabá lau bigibu le liseinin igarigu, méiginbounme fein to eigiboun lidan libe kesi le.18Binaafin, nadimurehaña hama gürigia, rábounweyu, aba tounwen númari; larugan binaafin, aba nadügüni le buga lubeibei Aburemei nun.19Ábati hariñagun lílana fulasu nun:—Ariñagabéi woun ka lan mini lan katei le, le badügübei.20Aba nariñagun houn:
—Adimurehati Aburemei nun, lariñaga nun:21“Ariñagabá houn lílana Ísüraeli: Lariñahare Aburemei: Nadügüba katei le moun lumuti ladügǘn tidan nitenpulun, to hínsiñeboun hun to giñe hínsiñeboun hun lun haríagunu, to hapantagüle luma here; hóunweguba hirahüñü ha hígirubaña Herusalén áfarawaguarügü”.22—Ariñagabá giñe houn: “Huguya, hadügübei libe le nadügübei: Madouragunbadün lau higibu kei liseinin igarigu, meigin huguyame fein to eigiboun lidan libe kesi le.23Siñabei héibugun lau hichügü madaüga ni mageidinga. Mayahuahanbadün. Herederuba méreuga ladüga huriban, ábame hayahun húmawagua.24Ábanbei hénpulu Esekiéli hun, hadügübei sun le ladügübei. Danme lasuseredun ítara, hasubudirubei luagu au lan Aburemeibei”.25—Guentó nagidaraali here Ísüraelina hawéi, ténpulu to auboun hagundaara saragu luagu tuenden, to hínsiñeboun houn saragu, hínsiñe houn lun haríagunu. Nagidarubaña giñe harahüñü hawéi.26Lídanme weyu ligía, le gayaraati lesefurun, liábinba íchigei uganu bun.27Lídanme weyu ligía lagumuchuba mariñagadi ban, gayaraabei badimurehan luma le esefurubei. Beseriwiduba ítara kei hénpulu houn gürigia, ábame hasubudiruni luagu au lan Aburemeibei.
Bible Society of Honduras