Esekiéli21
Lefeinte Aburemei
1Ábati lariñagun Aburemei nun:2—Liráü wügüri, gararaguabá luagun Herusalén, badimurehame kóntüra litenpulun. Badimureha lidan niri kóntüra uburugu Ísüraeli,3bariñagame lun: “Anihán lariñagubei Aburemei: Báganibadina, nasagaruboun nefeinte, ábame náfaraguniña dandu ha richaguabaña, keisi ha gafigounbaña.4Ninarün, nasagaruboun nefeinte lun náfaraguniña súngubei, dandu ha richaguabaña keisi ha gafigounbaña, lúmagiñe luéigiñe nórute darí luagun suru.5Ábame lasubudiruni sun ubóu luagu sagá naaru lan nefeinte, au le Aburemei, ani mareidun nubóun”.6—Liráü wügüri, bayahuaha lau íruni tau sun banigi; bayahua hagibugiñe lílana fulasu.7Ánhabu hálügüda ka lan uagu bayahuaha, bariñagame houn luagu lan uganu luáguti aban katei le madiseelibei lun lasuseredun, ani herederuba lan sun gürigia maguraasunga, héiguañu harüna; úabei ganigiti, ladadagaruba hagachürügü súngubei lau anufudei. Aniteeli oura, lasusereda. Au, le Aburemei ariñagubalin.8Aba lariñagun Aburemei nun:9—Liráü wügüri, badimureha lidan niri, bariñagame luagu au lan le Aburemei ariñagubei bun lun bariñagun:“Eféin, eféin! Ayarahóuaaru, írirawagua tuguya.10Ayarahóuaaru lun táfarahan, írirawagua tuguya lun támirihan kei labirihaniga;11tírirawaguña eféin, málüboun anhoun ayusurúa. Yarawaaru eféin, írirawagua tuguya, lun tichugúniwa lúhaburugun gáfarahati.12Liráü wügüri, bagúaragua, aünha buguyame, lugundun táfaraguaaña numutuniña, hama sun lani Ísüraeli gumadimatiña! Siádiwaaña lun hóunwegun hama numutuniña, bagayuaha lubeiti buougua lau igarigu.13Au le Aburemei ariñagubalin”.14“Liráü wügüri, badimureha lidan niri, ínchahaboun eféin lun tímirahan lau biangua luma ǘrüwagua tigañi. Aban eféin to lunboun táfarahan, tanarime eféin to lánina áfarahani to anufudedaguagüdübaliña lílana fulasu.15Tabuinchagüdübaña lau anufudei, gíbebaña táfaragun. Ru naaru eféin gáfarahatu tidan sun haban. Eféin to írirawaguaaruboun lun támirihan kei labirihaniga, yarawañu lun táfarahan.16Hamanañu nabusenrabu, báchuaha luéigiñe bóunwenren luma luéigiñe bubaünan, báchuaha luéigiñe sun oubaü.17Nínchahaboun giñe, darí lagalumadun nigañi. Au le Aburemei ariñagubalin”.18Aba lariñagun Aburemei nun:19—Liráü wügüri, adügabá bián üma lun lásügürün lurúeite Babilónia tau lefeinte. Biánguabei üma ligía, lídangiñememeba aban ageiraü láfurida, bíchigame aban seini luagu lagumeseha kada üma, lun larufuduni ka lan uburugu ñéinhinbei lubéi.20Gasu badügün aban üma le ñéingiñeba lubéi lásügüra urúei tau lefeinte. Rabá le hani Amonna luma Herusalén, uburugu derebuguti le lani Hudá, ligía burí uburugu ligía.21Ráramaali lurúeite Babilónia le ñein lubéi lagumesera biángubei üma, lálügüdahaña luma lubunurun: Aríaaha lumutu burí eféin, álügüdahati hama lubungiutegu, aríaaha lumuti habana animaalugu.22Saliguatu eféin to arufuduboun luagun Herusalén lidan lúhabu le lóunwenren, mini lan lira, luagu lunti lan lábürühan luagun Herusalén, lun líchugun dimurei lun áfarahani, lagúarahan agúarahani le lánina wuribu, ladügün aban wáyelesi luma lun legeyedaguni sunsuinagubei.23Gama lumoun haritaguatiña lílana Herusalén luagu aban lan profesía iyeeniti lira, ladüga daradu le adüga hamaalibei, gama lumoun lidan linarün katei, aban katei lira le arufudubalin hafigoun, larufuduña giñe luagu hárügüdüwaba lan.24Ligía nariñagunbei au le Aburemei: Furanguti huriban luma háfarahan. Arihúati sun hifigoun, ligía hárügüdüwaba lubéi.25Buguya, lurúeite Ísüraeli, le gáfarahadibei, le wuribabei, yarafaali dan lun beresibiruni lagumuhóun babeichún.26Nariñahare au, le Aburemei: Tagidarúba bibunedun, habayurubei biridin, ábame ámuña lan sun katei. Niñurubei le ǘnabugubei, narariragüdübei le íñugubei!27Nagünrinchagubei súngubei. Gama lumoun dánmeba liabin le níchugubei lun laguseragüdün, ligíaba lasuseredun sun le.
Labeichuniña Bungiu Amonna
28—Liráü wügüri, badimureha lidan niri, bariñagame houn Amonna ha anabubalin Ísüraeli, luagu sagawaaru lan eféin tídangiñe tagei, aranseru lun táfarahan, írirawaguaaru lun támirihan kei labirihaniga luma lun tagünrinchagun.29Iyeeni hawenedü, iyeeni le hariñagubei. Tábürühaba eféin luagun hagiina wuribatiña ha gáfarahatiña ha. Yarafaali lidaani lagumuhóun habeichún.30—Eféin, giribubá tidoun bagei. Naguseragüdübadibu ñein, le ñein lubéi nadügabu, lidan fulasu le ñein lubéi bágurahoua,31ábame narariragüdüni nigañi buagun, keisi aban lanarime gudáü, nederegerubadibu háhaburugun gürigia hanarimetiña.32Báguduba, günrinwagua buguyame; láwiyuhaba bita fulasurugu, maritawagúnhalime buagun. Au, le Aburemei ariñagubalin.Bible Society of Honduras