Áfuriduni17
Duna lídangiñe dübü
1Aba háfuridun Ísüraelina lídangiñe fulasu mageirawati le gíribei Sin, aban hasigiruni héibugun murusun murusun, kei lariñaguni Bungiu houn. Lárigiñe, aba hemeraagun Refidímü. Gama lumoun úati duna ñein lun hatun.2Ábati hariñagun lun MoisesiRuba duna woun lun watun! Lariñaga Moisesi houn:
Ka uagu hekehara nun? Ka uagu hóuchaguei Bungiu?3Gama lumoun mágürabuhaaña gürigia, aba hadimurehan luagu Moisesi. Hariñaga:
—Kame basagarawa Ehiptugiñe? Lun san báfaraguniwa lau mágürabu hau sun wasaanigu hama wabiñanigu?4Ábati lafurieidun Moisesi lun Bungiu, lariñaga Kaba san nadüga hau gürigia ha? Málübaña ánhaña busén hachamuragun dübü nuagu lun háfarunina!5Lariñaga Bungiu lun:
—Beiba habá gürigia, banügame átiri wéiyaaña mutu búmagua. Barübei giñe badun le aubei baguurei duna, ábame bidin.6Ñéinbadina agurabahabu luagu wübü Orebü, ligibuagu dübü. Danme baguuruni dübü lau badun, láfuriduba duna lídangiñe lun hatun gürigia.
Aba ladügüni Moisesi ítara hagibugiñe wéiyaaña mutu Ísüraelina,7aba lagúarun lun fulasu ligía, Meribá ladüga buga hekeharun Ísüraelina lun, wati giñe lun, Masá ladüga buga hóuchaguni Bungiu lau hariñagun: «Anihein san Bungiu wama odi úati?»
Wuribu hama Amaléküna
8Aba houdin Amaléküna Refidímü lun hageindagun hama Ísüraelina.9Ábati lariñagun Moisesi lun Hosué:—Anuadahabá átiri wügüriña, beiba ageindagua hama Amaléküna. Ñéinbadina haruga luagu wübü lau lubadun Bungiu núhaburugu.10Aba ladügüni Hosué le lariñagubei Moisesi lun, aba láfuridun ageindagua hama Amaléküna. Ábati lamudeirun Moisesi, Aarón luma Uru luagun wübü.11Danha le liñuruni Moisesi larüna, Ísüraelina ubaraübaña lidan wuribu, gama lumoun danha le larariragüdüni, ábaha hagañeirun Amaléküna.12Keiti labuchadun luagu larüna Moisesi, aba hanügün aban dübü, aba híchuguni lábugiñe, lun lañuurun luagu. Ábati hágüdahani Aarón luma Uru larüna, aban luéigiñe aban oubaü, aban luéigiñe le aban. Ítara liña iñurañu lan larüna Moisesi darí lumoun lálüdün weyu,13Aba láfaraguniña Hosué Amaléküna tau eféin.14Ábati lariñagun Bungiu lun Moisesi:
—Abürühabéi katei le tidan aban líburu, haritawagúa láamuga luagun; ariñagabá giñe lun Hosué luagu nagumuchaguagüdaaña lan Amaléküna sunsuinagubei.15Aba ladügün Moisesi aban latarü, le unbei lagúara: «Bungiu nufanidiranbei».16Lariñaga:
«Kei lidin aban fanidira habá habá súdaragu, ítara liña giñe lidin Bungiu wabá wabá! Lageindaguña Bungiu luma Amalékü lúmagiñe aban adügawaguni lumoun ábanya!»
Bible Society of Honduras