Áfuriduni16
Líchugunu Bungiu éigini to gíriboun Maná
1Aba háfuridun Ísüraelina Elimügiñe aba hachülürün Sin, fulasu mageirawati labadinagua Elimü luma Sinaí. Weyu ligía, keinsi lidan libiaman hati lúmagiñe háfuridun Ehiptugiñe.2Ñein lidan fulasu mageirawati, aba hagumeserun sun hagía adimureha wuriba luagu Moisesi luma Aarón.3Hariñaga:—Áfaragua láadiwagubei hamuga meha Bungiu Ehiptu! Ñurutiwa meha ñein lubadu sóudieru lau úi, ábaha weigin darí wakimuledun, ánheinti huguya, hanügawa ñahoun lidoun fulasu mageirawati lun háfaraguniwa lau ilamaü.4Ábati lariñagun Bungiu lun Moisesi:
—Náhuyagüda éigini houn siélugiñe. Lunti háfuridun gürigia sagü weyu abuda lérügü lunbei héigini lidan weyu ligía. Busentina narihini kaba lan ñüdün lau le nubeibei luma kaba lan adüraaguei.5Lidan lisisin weyu, danme haranseruni le lunbei hanügüni húbiñoun, lunti habudun dóbuli luéi le habudubei sagü weyu.6Ábati lariñagun Moisesi luma Aarón houn Ísüraelina:
—Rábounweyume hasubudirei luagu Bungiu lan asagarubalün Ehiptugiñe,7binaafinmeti ábame harihini luéirigun Bungiu; ladüga aganbaali luagu agülülüha humá wuriba luagu, ladüga kátañadiwagia lun hadimurehaba lan wawagu?8Lariñagaya Moisesi:
—Rábounweyu, líchuguba Bungiu úi hun lun heigin, binaafin, líchuguba saragu fein hun, ladüga aganba laali hagülülühan luagu. Ladüga, kátañadiwagia? Mama wawagu hagülülüha, luagu Bungiu.9Aba lariñagun Moisesi lun Aarón:
—Ariñagabá houn Ísüraelina lun hayarafadun lun liñúarü Bungiu, ladüga aganba laali hagülülühan luagu.10Lidan oura le anihán lubéi Aarón adimureha houn Ísüraelina, aba harihin sun hagía fulasurugún mageirawati, aba lasaliragun luéirigun Bungiu lidan aban dúeri.11Aba lariñagun Bungiu lun Moisesi:12—Aganba naali hagülülühan Ísüraelina. Badimureha hama, bariñagame houn: “Héigiba úi rábounweyu, héigame fein binaafin darí hakimuledun. Ítara luba hasubudiruni luagu au lan Aburemeibei le Hubungiute”.13Rábounweyumeme ligía, aba hayabin saragu dunuru ha buítiña lun heiginiwa lidoun fulasu le ñein habéi Ísüraelina, larugan binaafin, ñeinñein serenu geyegu tau hakianpun-agei.14Lárigiñe lamabeidun serenu ligía, aba lerederun aban katei fínuti adouragua lau múa.15Kei ibidiñe lan houn Ísüraelina katei lan, dan harihinbalin aba hariñagun hámagua:
“Ka san le?”
Lariñaga Moisesi houn:
—Fein to, to líchuguboun Wabureme hun lun tuguyaba lan heiga.16Ani anihán dimurei le líchugubei Bungiu: Budala kada aban hídangiñe tórügü lunboun léiginu hau sun tílana luban.17Ítara liña hadügüni Ísüraelina. Añahein abudutiña gíbetu, añahein míbetu,18según hiibe gürigia hábiñe; mígiraguntu luma le abudubei gíbetu, malouguan lun le abudubei míbetu. To lemegeiruboun kada aban lun leigin, tuguyarügüñoun labuda.19Lariñaga Moisesi houn:
—Ualá ni aban ígiruti tídangiñe lubá le aban weyu.20Gama lumoun ñéinñanu hádangiñe madügüntiña gasu lau Moisesi, aba hareidun tídangiñe lubá le aban weyu; gama lumoun to hareiduboun, aba tabuinchun hau héweraü aba tíngidun. Ábati lagañidun Moisesi hama.21Kada aban ábaha labudunu to lemegeiruboun lun leigin sagü binaafin, lásüdün weyu, aba tarürüdagun.22Gama lumoun lidan lisisin weyu, ábaha habudun lun bián dan éigini, Ábati houdin ábutigu ariñaaha lun Moisesi,23lariñaga Moisesi houn:
—Ítara liña lariñaguni Bungiu. Haruga luéyuri emeraaguni, aban emeraaguni lun Bungiu. Ábougua huméi sun le lunbei hábouguni uguñe, áhuraagüda huméi sun le lunbei háhuraagüdüni, hareideime le ígiragubei lubá haruga.24Ítara kei lariñaguni Moisesi houn, aba hareiduni le ígiragubei lubá le aban weyu, míngidunti, madaga hagía héweraü luagu.25Ábati lariñagun Moisesi houn:
—Hou humóun uguñe lidan luéyuri emeraaguni, ladüga uguñe madaribadün áraabu.26Hadariruboun luagu sisi weyu lidan dimaasu, ánheinti lidan lisedün weyu, le luéyuribei emeraaguni, úaboun.27Ñéinñanu hádangiñe, áfuridutiña yebe áluaha lidan lisedün weyu, gama lumoun madaritiña ni kata.28Ábati lariñagun Bungiu lun Moisesi:
—Ídaba san lásura hadüraaguni nugumadin luma narufudahan?29Subudi huméi luagu rúhadina lan aban weyu hun lun hemeraagun au le Habureme; ligía níchugunbei éigini lubá bián weyu hun lidan lisisin weyu. Lunti lubeiti lerederun kada aban lúbiñe lidan lisedün weyu, máfuridala.30Ábati hemeraagun gürigia lidan lisedün weyu.31Aba hagúarun Ísüraelina lun éigini le habudahabei, maná. Haruti kei lila bariñe, bime kei furidasi lau sírudu.32Lárigiñe aba lariñagun Moisesi:
—Anihán dimurei le líchugubei Wabureme: “Buíngüda humá aban liraüraü faniñe lau maná, ábame hareiduni habá hadügawagun, ariha hamaamugei luwuyeri éigini le níchugubei hun lidan fulasu mageirawati dan le nasagarunbalün Ehiptugiñe”.33Lariñaga Moisesi lun Aarón:
—Barüba aban faniñe, babuinchagüdeime lau maná. Lárigiñeme bíchigeime ligibugiñe Wabureme, ábame lareidúniwa habá hadügawagun.34Aba líchuguni Aarón faniñe tigibugiñe bágüsi to lánina daradu lun lareidúniwa.35Hóutiña Ísüraelina maná luagu bián wein irumu, darí hachülürün lidoun fulasu le ñein lumuti haganawa gürigia; hou hamuti darí hachülürün ligibugiñe Kanán.36(Labuinchun faniñe ligía hamisurahabei kei aban gómerü o bián líturu.)
Bible Society of Honduras