Áfuriduni15
Leremuhan Moisesi
1Ábati leremuhani Moisesi uremu le hau sun Ísüraelina, lidan liri Bungiu:«Ladüga adügaali aban agañeiruni wéiriguti Neremuhaba lidan liri Nabureme luagu lañaradaguagüdüniña gabayu baranaha hau sun ha agalufehabaliña.2Lun Nabureme neremuha, ligía nérebei, ligía nesefuragüle. Ligía Nubungiutebei, ani lunti neremuhan lun: Ligía Lubungiutebei núguchi, gasu níchugun uéiriguni lun.3Aban óunwenbu gawuribuhati Nabureme. Aburemei, ligía líribei!4Bulugüda lumutu Nabureme likarün urúei Ehiptuna hau sun lisudaranigu; ñaraguatiña habuidun-agei hábutigu lisudaranigu urúei lidan barana funati!5Ábürühatiña guribinin kei dübü, aba ladouragun barana hau.6Nabureme, búhabu bóunwenren le hérebei, le gabafubei, ligía agünrinchagubaliña áganiñu.7Buregua bumutiña ha agagibudagubaña buma, lau óunwenbu bubafu; durunguati bigañi, aba láguduniña kei sagadi sáühali.8Aba báfurun lau igañi, aba lafanreinragun lidunari barana; aba liñuragun lugudi barana lungua kei aban baríeiru; aba lerederun lamidangua barana deregüdagu!9Ariñagaaña yebe wáganiñu hóunguarügü: Wéibaahaaña darí wárügüdüniña, wafanreinhabei le lunbei wagidaruni hawéi darí lumoun lagumuhóun, wasagaruboun wefeinte, ábame wagünrinchaguniña.10Gama lumoun aba báfurun, aba láhuluchuniña barana; aba habuluchun kei balu lidan luéinamun barana.11Nabureme, úati ni aban Bungiu kei buguya! Úati ni aban sánduti kei buguya! Adügatibu katei wéinamuti ani hanarimeguti! Gadünatibu lun leremuhóun bun!12Arufuda bumuti bubafu aba hóunwegun!13Badundehañadiwa, sefu bumutiwa lau bínsiñehabu, banügüñadiwa lau bubafu tidoun buban to sánduboun.14Hadadagaruba néchanigu danme hasubudiruni, hasandiruba Filistéana igarigu.15Lóutiña ábutigu Edomuna, heferidirubei ábutigu Moábüna haguraasun, hadadagaruba sun Kananna lau anufudei.16Nabureme, larú hamá! Hanufudegua hamá! Redei hamá kei dübü deregüdagu ladüga anufudei, ladüga lere barüna, darime sügühadiwa, darime sügühadiwa wagía le bumutuniña!17Nabureme, barübawa aganawa lidan buwübüri sánduti, fulasu le banúadirubei lun baganóun ñein, tidan sanduariu to bederebudagüdüboun lau búhabu.18Arúeihati Nabureme gumugua dan!»
Teremuhan María
19Dan le tebelurunbei likarün urúei hama ligabayun baranahoun, aba ladügün Bungiu lun ladouragun barana hau; ánhaña Ísüraelina hiñuguatiña kei luéigiñe üma mábeiti.20Ábati tanügün María to litu Aarón aban panderu, aba houdin híbiri würiña tárigi tárigi, abinaheina áfareina panderu,21tuguya eremuheina ítara:«Heremuha lun Wabureme, le abuluchagüdübaliña gabayu baranaha hau sun ha agalufehabaliña».
Duna gífiti
22Aba ladisedagüdüniña Moisesi Ísüraelina luéi Barana Funati. Ábati houdin lidoun fulasu mageirawati le gíribei Suru, ǘrüwa weyu hau éibuga madaritiña duna.23Daritiña duna Mará, gama lumoun siñati hátuni duna le ñeinbei, ladüga gífiti. Ligía Mará lubéi líribei fulasu ligía.24Aba hagumeserun gürigia adimureha wuriba luagu Moisesi, hariñaga: «Kaba san wata?»25Ábati lamuriahan Moisesi luma Bungiu lun líderaguni, aba larufudun Bungiu aban tídibu wewe lun. Aba láguruni Moisesi tídibu wewe ligía dúnarugun, aba labimedun duna.Ñein lóuchaguaña Bungiu, aba líchugun aban lúrudu houn luma ida luba lan ligaburi hóuserun.26Lariñaga houn:
—Anhaün ñüdün lau le nariñagubei hun au le Hubungiute, adüga humeime le aubei nagundaara, lau haganbuni nugumadin, luma hagunfuliruni nilurudun, móunahanbadina ni aban hádangiñe igei ha nóunahabaña hawagun Ehiptuna huagun, au Haburemebei le areidaguagüdübalün.27Lárigiñe aba hachülürün Elimü le ñein lubéi duusu lísensen duna tuma ǘrüwa-wein-diisi tídibu yaraüwa, ñein hemeraagua laru duna.
Bible Society of Honduras