Amosu7
Furumiñeti uénedü: Chagagaru
1Anihán katei le larufudubei Wabureme nun. Dan le lagumeserunbei nadü le tárübei láhüchün áhücha, le adügǘbei lárigiñe alubahani le lani urúei, aba narihini Wabureme adaagua chagagaru.2Dan le héigiñein lubéi chagagaru lagumuhóun híduru aba nariñagun:—Bungiu Baba, ferudunabawa! Ida lubagia hawandun bumutuniña Ísüraelina, míbetiñaga?3Ábati madügün lani Wabureme le yebe laritagubei ladügün, aba lariñagun:
—Masuseredunbei katei le!
Libiaman uénedü: Watu gemeti
4Anihán katei le larufudubei Wabureme nun: Ariha numuti óunaha watu gemeti, aba lamabeidun barana sunsuinagubei, gumuguagüdalei murusun lídangiñe múa.5Aba nariñagun:—Fuleseihabubá, Wabureme, ráramabei búhabu! Ida lubagia hawanduni Ísüraelina ha bumutuniña katei le, míbetiñaga?6Ábati madügün lani Wabureme laritagun, aba lariñagun:
—Masuseredunbei giñe katei le!
Lǘrüwan uénedü: Pulomulaini
7Arufuda lumuti giñe Wabureme katei le nun: Lubaduñein aban baríeiru, lau aban hani gábunaguaditiña muna pulomulaini lúhaburugu.8Aba lariñagun nun:—Ka barihubei, Amosu?
Nariñaga lun:
—Aban hani gábunaguaditiña muna pulomulaini.
Lariñagati nun:
—Lauba pulomulaini le narihei ida liña lan lísurun hagaburi Ísüraelina ha numutuniña. Úadigiaali feruduna nániña.9Tagünrinchawaguba burí lani Isaakü sanduariu, tárigirugurügüba burí litenpulun Ísüraeli eredera Niñuruboun nefeinte hawagun liduheñu Heroboamü!
Lagagibudagun Amosu luma Amasíasi
10Aba lóunahan Amasíasi le lufadirin Beteli ariñaga lun Heroboamü le lurúeite Ísüraeli:—Anihein Amosu hadan lumutuniña Ísüraeli eledegua hubá urúei. Buchá hawagu lílana fulasu aganbei ladimurehan, mawandun hamaali.11Lugundun lariñahare: «Lafarúba Heroboamü tau eféin, hanügǘba sun Ísüraelina keisi adaürǘtiña».12Aba lariñagun Amasíasi lun Amosu:
—Beiba yáagiñe, profeta! Anhein busén bubéi buadigimaridun keisi profeta, beiba Hudáun;13gama lumoun hebé bayanuhan ya Beteli, lugundun lani urúei sanduariu Beteli, ani anuhán giñe litenpulun arúeihani to wéirigutimaboun.14Aba lóunabuni Amosu, lariñaga lun:
—Mama au profeta, máluahantina giñe nanügǘn keisi profeta. Lau nóunigirun mudún luma nabudahan igu áraabuna nagañeiroun neigan fein,15gama lumoun aba lagidarunina Wabureme lídangiñe nóunigirun mudún, aba lariñagun nun: «Beiba adimureha houn Ísüraelina ha numutuniña lidan niri».16Aganbabéi lubeiti lererun Wabureme. Bariñahare nun: «Madimurehabá ni kata lidan liri Bungiu kóntüra Ísüraelina; mariñagun buguyame ni kata hawagu ladügawagun Isaakü».17Gama lumoun anihán le lariñagubei Aburemei: «Tahoruhaba búmari uburugu, háfarawaguba giñe birahüñü tau eféin; lafanreinhouba bumúan lau ubunuruni; ánheinti buguya bóunweba hamúanrugu gibe tubungiutegu, hanaawaguba giñe Ísüraelina keisi adaürütiña dise luéi hageira».
Bible Society of Honduras